ຊາວຫວຽດນາມ ອາໄສຢູ່ລາວ ສະເຫຼີມສະຫຼອງວັນຄ້າຍວັນເກີດປະທານໂຮ່ຈີມິນ ຄົບຮອບ 134 ປີ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງວັນຄ້າຍວັນເກີດປະທານໂຮ່ຈີມິນ ຄົບຮອບ 134 ປີ, ວັນທີ 19 ພຶດສະພາ, ທີ່ແຂວງເຊກອງ (ພາກໃຕ້ລາວ), ສະຖານກົງສູນໃຫຍ່ຫວຽດນາມ ປະຈໍາ ນະຄອນປາກເຊ, ແຂວງຈໍາປາສັກ, ໄດ້ສົມທົບກັບສະມາຄົມຊາວຫວຽດນາມ ຢູ່ 4 ແຂວງພາກໃຕ້ລາວ ຈັດຕັ້ງພິທີຖະຫວາຍທູບທຽນອາໄລຫາປະທານໂຮ່ຈີມິນ ແລະຈັດຕັ້ງການແຂ່ງຂັນບານເຕະມິດຕະພາບລະຫວ່າງ 4 ສະມາຄົມຊາວຫວຽດນາມ ຢູ່ພາກໃຕ້ລາວ.
ນີ້ແມ່ນໜຶ່ງໃນບັນດາການເຄື່ອນໄຫວປະຈຳປີ ເພື່ອສະແດງໃຫ້ເຫັນຄວາມສາມັກຄີ, ຄວາມຜູກພັນ ແລະແບ່ງປັນອາລົມຈິດຂອງຊາວຫວຽດນາມ ຢູ່ 4 ແຂວງພາກໃຕ້ຂອງລາວ ກັບລຸງໂຮ່ທີ່ຮັກແພງ, ພ້ອມທັງເພີ່ມທະວີຄວາມສະໜິດຕິດພັນລະຫວ່າງພໍ່ແມ່ປະຊາຊົນກັບບ້ານເກີດເມືອງນອນປະເທດຊາດເນື່ອງໃນວັນບຸນສໍາຄັນ.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/05/20/upload_2123/lao1-19524.jpeg?dpi=150&quality=100&w=500) |
ບັນດາຜູ້ແທນເຂົ້າຮ່ວມງານແຂ່ງຂັນບານເຕະ. ພາບ: ສໍານັກຂ່າວສານຫວຽດນາມ |
ໃນທ່າມກາງບັນຍາກາດທີ່ເຄັ່ງຂຶມ ແລະເຄົາລົບນັບຖື, ບັນດາຜູ້ແທນ ແລະປະຊາຄົມຊາວຫວຽດນາມ ໃນບໍລິເວນໄດ້ຖະຫວາຍທູບທຽນຕໍ່ດວງວິນຍານປະທານໂຮ່ຈີມິນ, ຜູ້ນຳຂອງພັກ ແລະປະຊາຊົນຫວຽດນາມ, ເປັນຄູຜູ້ຍິ່ງໃຫຍ່ຂອງການປະຕິວັດຫວຽດນາມ, ວິລະຊົນປົດປ່ອຍຊາດ, ນັກວັດທະນະທຳຜູ້ມີຊື່ສຽງໂລກ, ນັກຮົບກອມມູນິດສາກົນທີ່ເປັນແບບຢ່າງໄດ້ອຸທິດຕະຫຼອດຊີວິດໃຫ້ແກ່ພາລະກິດປະຕິວັດຂອງພັກ, ຂອງຊາດ.
ຕໍ່ຈາກນັ້ນ, ກ່າວຄຳເຫັນທີ່ພິທີເປີດງານແຂ່ງຂັນບານເຕະມິດຕະພາບລະຫວ່າງ 4 ສະມາຄົມຫວຽດນາມ ຢູ່ພາກໃຕ້ລາວ, ທ່ານ ຫງວຽນວັນຈູງ ຫົວໜ້າກົງສູນໃຫຍ່ຫວຽດນາມ ປະຈໍາ ນະຄອນປາກເຊ ໄດ້ເນັ້ນໜັກເຖິງຄວາມໝາຍຂອງການເຄື່ອນໄຫວປີນີ້ວ່າ ຖືກຈັດຂຶ້ນໃນວັນທີ 19 ພຶດສະພາ ເນື່ອງໃນໂອກາດສະເຫຼີມສະຫຼອງ 134 ປີແຫ່ງວັນຄ້າຍວັນເກີດຂອງປະທານໂຮ່ຈີມິນ.
ທ່ານ ຫງວຽນວັນຈູງ ເຊື່ອໝັ້ນວ່າ: ການເຄື່ອນໄຫວດັ່ງກ່າວຈະປະກອບສ່ວນເພີ່ມອາລົມຈິດກໍ່ຄືຄວາມສາມັກຄີຂອງປະຊາຄົມຊາວຫວຽດນາມ ຢູ່ພາກໃຕ້ລາວ, ພ້ອມທັງສ້າງສະໜາມຫຼິ້ນທີ່ປອດໃສ ແລະເປັນປະໂຫຍດ ເພື່ອຊຸກຍູ້ຂະບວນການກິລາກາຍະກຳໃນຊຸມຊົນ.
ຕາມຄະນະຈັດຕັ້ງແລ້ວ, ຜົນສໍາເລັດຂອງການເຄື່ອນໄຫວສະເຫຼີມສະຫຼອງ 134 ປີແຫ່ງວັນຄ້າຍວັນເກີດປະທານໂຮ່ຈີມິນ ຄັ້ງນີ້ ໄດ້ປະກອບສ່ວນເພີ່ມພູນຄູນສ້າງນ້ຳໃຈສາມັກຄີແບບພິເສດ, ຄວາມສະໜິດຕິດພັນ ແລະມຸ່ງໄປເຖິງບ້ານເກີດເມືອງນອນຂອງປະຊາຄົມຊາວຫວຽດນາມ ຢູ່ອາໄສລາວ, ຜ່ານນັ້ນ ເພີ່ມທະວີການສຶກສາມູນເຊື້ອປະຫວັດສາດຂອງຊາດ ແລະນ້ຳໃຈຮັກຊາດດ້ວຍຈິດໃຈຂະຫຍັນຂັນເຄື່ອນ ແລະມີຫົວຄິດປະດິດສ້າງຕາມແບບຢ່າງຂອງປະທານໂຮ່ຈີມິນ.
ໂດຍ: ໄຊນີດາ