ຫວຽດນາມ ແລະ ລາວ ຮ່ວມມືບຳລຸງສ້າງຊັບພະຍາກອນມະນຸດ
ກປ.ອອນໄລ - ກອງປະຊຸມລັດຖະມົນຕີ ສະໄໝພິເສດກ່ຽວກັບແຮງງານ, ສະຫວັດດີການສັງຄົມ ແລະພັດທະນາຊັບພະຍາກອນມະນຸດ ຫວຽດນາມ - ລາວ ເນື່ອງໃນໂອກາດສະເຫຼີມສະຫຼອງ 60 ປີ ແຫ່ງວັນສ້າງຕັ້ງສາຍພົວພັນທາງດ້ານການທູດ ລະຫວ່າງສອງປະເທດ ໄດ້ຖືກໄຂຂຶ້ນໃນເຊົ້າຂອງວັນທີ 29 ພະຈິກ 2022 ຢູ່ນະຄອນ ຮະລ່ອງ, ແຂວງກວາງນິງ.
|
|
ພິທີລົງນາມຂໍ້ຕົກລົງຮ່ວມມືໃນຂົງເຂດພັດທະນາຊັບພະຍາກອນມະນຸດ. ພາບ: VOV |
ຢູ່ທີ່ກອງປະຊຸມ ສອງຝ່າຍ ໄດ້ເຫັນດີເປັນເອກະພາບນໍາກັນ ສືບຕໍ່ຊຸກຍູ້ ແລະສ້າງເງື່ອນໄຂສະດວກໃຫ້ແຮງງານສອງປະເທດ ເຮັດວຽກຢູ່ລາວ ແລະຫວຽດນາມ; ແບ່ງປັນບົດຮຽນປະສົບການ ແລະ ພັດທະນາທັກສະດ້ານວີຊາຊີບໃນສະພາບການໃໝ່, ຄຸ້ມຄອງແຮງງານຍົກຍ້າຍ, ໜູນຊ່ວຍແຮງງານຖືກຜົນສະທ້ອນຈາກໂລກລະບາດໂຄວິດ-19; ໜູນຊ່ວຍຜູ້ຮັບເຄາະຮ້າຍຈາກລູກລະເບີດໝາກມີນ, ຄວາມປອດໄພດ້ານສຸຂະອານາໄມຂອງຜູ້ອອກແຮງງານ ແລະຄົນພິການ… ກອງປະຊຸມເຫັນດີເປັນເອກະພາບກັນ ແລະລົງນາມ “ຂໍ້ຕົກລົງຮ່ວມມືໃນຂົງເຂດພັດທະນາຊັບພະຍາກອນມະນຸດ” ລະຫວ່າງ 3 ກະຊວງ: ກະຊວງແຮງງານ-ທະຫານເສຍອົງຄະ ແລະສັງຄົມ ຫວຽດນາມ, ກະຊວງແຮງງານ ແລະ ສະຫວັດດີການສັງຄົມ ລາວ ແລະກະຊວງສຶກສາທິການ ແລະກິລາ ລາວ. ທ່ານລັດຖະມົນຕີກະຊວງແຮງງານ-ທະຫານເສຍອົງຄະ ແລະສັງຄົມ ຫວຽດນາມ ດ່າວຫງອກຢຸ່ງ ຢືນຢັນວ່າ:
ຫວຽດນາມ ໃຫ້ຄຳໝັ້ນສັນຍາວ່າ ຈະສຸມໃສ່ປະຕິບັດໂຄງການທີ່ວາງອອກໃຫ້ມີປະສິດທິຜົນສູງສຸດ, ຫວັງວ່າ ສອງປະເທດ ຈະມີຫຼາຍການເຄື່ອນໄຫວນັບມື້ນັບມີປະໂຫຍດ, ຮັດແໜ້ນກວ່າເກົ່າ, ບໍ່ພຽງແຕ່ເປັນຄູ່ຮ່ວມມື ເທົ່ານັ້ນ ແຕ່ຍັງເປັນໝູ່ເພື່ອນ, ອ້າຍນ້ອງໃນຄອບຄົວດຽວກັນ.
ກອງປະຊຸມລັດຖະມົນຕີ ແຮງງານ ແລະສະຫວັດດີການສັງຄົມ ຫວຽດນາມ - ລາວ ຄັ້ງທີ 8 ຈະໄດ້ຈັດຕັ້ງຢູ່ ລາວ ໃນປີ 2023.
ໂດຍ: ກວຽດເຕິມ