ຊຸກຍູ້ການພົບປະແລກປ່ຽນ, ຄວາມສະໜິດຕິດພັນລະຫວ່າງປະຊາຊົນສອງປະເທດ ຫວຽດນາມ-ລາວ

ບັນຍາກາດທີ່ການຕ້ອນຮັບ. ພາບ: mattran.org.vn

ທີ່ການຕ້ອນຮັບ, ສະຫາຍ ໂດ໊ວັນຈ໊ຽນ ຕີລາຄາສູງຕໍ່ການປະກອບສ່ວນທີ່ຕັ້ງໜ້າຂອງສະມາຄົມມິດຕະພາບລາວ-ຫວຽດນາມ ທີ່ໄດ້ປະກອບສ່ວນຮັກສາ ແລະພັດທະນາສາຍພົວພັນລະຫວ່າງສອງປະເທດ. ສະຫາຍ ໂດ໊ວັນຈ໊ຽນ ສະເໜີວ່າ, ໃນໄລຍະຈະມາເຖິງ, ສອງສະມາຄົມມິດຕະພາບ ຄວນສືບຕໍ່ຍູ້ແຮງບັນດາການເຄື່ອນໄຫວສຶກສາອົບຮົມ, ໂຄສະນາໃຫ້ປະຊາຊົນ ສືບຕໍ່ຮັກສາ ແລະພັດທະນາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ.

ສະຫາຍ ໂດ໊ວັນຈ໊ຽນ ກໍ່ສະເໜີໃຫ້ສະຫາຍ ບໍ່ວຽງຄໍາ ວົງດາຣາ ເອົາໃຈໃສ່, ຊ່ວຍເຫຼືອ ແລະສ້າງເງື່ອນໄຂສະດວກໃຫ້ແກ່ປະຊາຄົມຊາວຫວຽດນາມ ທີ່ພວມທໍາມາຫາກິນ, ດໍາລົງຊີວິດຢູ່ລາວ.

ສະຫາຍ ໂດ໊ວັນຈ໊ຽນ ປະທານຄະນະກໍາມະການສູນກາງແນວໂຮມປະເທດຊາດຫວຽດນາມ ມອບຂອງຂວັນທີ່ລະນຶກໃຫ້ສະຫາຍ ບໍ່ວຽງຄໍາ ວົງດາຣາ ລັດຖະມົນຕີກະຊວງເຕັກໂນໂລຢີ ແລະການສື່ສານລາວ, ປະທານສະມາຄົມມິດຕະພາບລາວ-ຫວຽດນາມ. ພາບ: mattran.org.vn

ສ່ວນສະຫາຍ ບໍ່ວຽງຄໍາ ວົງດາຣາ ໃຫ້ຮູ້ວ່າ, ໃນໄລຍະຜ່ານມາ, ສະມາຄົມມິດຕະພາບລາວ-ຫວຽດນາມ ໄດ້ໂຄສະນາໃຫ້ປະຊາຊົນ, ພິເສດແມ່ນໄວໜຸ່ມ, ນັກຮຽນ, ນັກສຶກສາລາວ ທີ່ພວມຮໍ່າຮຽນ, ດໍາລົງຊີວິດຢູ່ຫວຽດນາມ ສຳຜັດ, ຊອກຮູ້ວັດທະນະທໍາ, ມູນເຊື້ອຂອງຫວຽດນາມ, ສຶກສາອົບຮົມໃຫ້ພວກນ້ອງມີຄວາມເຂົ້າໃຈຢ່າງຈະແຈ້ງ, ເຄົາລົບ, ຮັກສາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງປະເທດ ລາວ-ຫວຽດນາມ. ພິເສດ, ໃນປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມ 2022, ສະມາຄົມ ພວມຜັນຂະຫຍາຍການເຄື່ອນໄຫວແທດຈິງຫຼາຍຢ່າງ ຄື: ຕ້ອນຮັບອະດີດຊາວໜຸ່ມອາສາສະໝັກຂອງຫວຽດນາມ ໄປຢ້ຽມຢາມລາວ ແລະຈັດຕັ້ງກອງປະຊຸມສໍາມະນາ, ການພົບປະເຈລະຈາ, ປະດິດແຕ່ງບົດເພງ, ກະວີ... ເພື່ອປະກອບສ່ວນສຶກສາອົບຮົມ, ໂຄສະນາກ່ຽວກັບສາຍພົວພັນລະຫວ່າງສອງປະເທດ.

ໂດຍ: ທູຈາງ