ກໍ່ສ້າງເຂດຊາຍແດນສັນຕິພາບ, ສະຖຽນລະພາບ ແລະພັດທະນາ

ທີ່ການພົບປະ, ສອງຝ່າຍໄດ້ຕີລາຄາສູງຜົນການສົມທົບກັນປົກປັກຮັກສາຊາຍແດນແຕ່ເດືອນກໍລະກົດ ປີ 2023 ມາຮອດປະຈຸບັນ. ກອງບັນຊາການທະຫານຊາຍແດນ 3 ແຂວງ, ຄື: ກວາງນາມ, ເທື່ອທຽນເຫວ້, ກອນຕູມ ໄດ້ສົມທົບກັນຢ່າງແໜ້ນແຟ້ນກັບກອງບັນຊາການທະຫານແຂວງເຊກອງ ໃນການຄຸ້ມຄອງ, ປົກປັກຮັກສາຊາຍແດນ, ລະບົບເສັ້ນຊາຍແດນ, ຫຼັ້ກໝາຍຊາຍແດນແຫ່ງຊາດ; ສົມທົບກັນຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ສອງຟາກຊາຍແດນ ແລະດໍາເນີນການລາດຕະເວນ, ຄວບຄຸມ ແລະສະກັດກັ້ນການເຄື່ອນໄຫວເຂົ້າອອກເມືອງຜິດກົດໝາຍຢ່າງມີປະສິດທິຜົນ; ປະຕິບັດອະນຸສັນຍາວ່າດ້ວຍເສັ້ນຊາຍແດນ ແລະຫຼັກໝາຍຊາຍແດນແຫ່ງຊາດ; ສັນຍາວ່າດ້ວຍກົດລະບຽບເຂດຊາຍແດນ ຫວຽດນາມ - ລາວ ຢ່າງເຂັ້ມງວດ, ສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດ-ສັງຄົມ; ເພີ່ມທະວີສາຍພົວພັນສາມັກຄີແບບພິເສດລະຫວ່າງອໍານາດການປົກຄອງ, ກຳລັງປະກອບອາວຸດ ແລະປະຊາຊົນສອງຟາກຊາຍແດນ.

ສອງຝ່າຍລົງນາມໃນບົດບັນທຶກກອງປະຊຸມພົບປະ. ພາບ: baothuathienhue.vn

ອະທິປະໄຕຊາຍແດນແຫ່ງຊາດ ໄດ້ຮັບການຮັກສາ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຢູ່ເຂດຊາຍແດນແຂວງ ກວາງນາມ, ເທື່ອທຽນເຫ້ວ ແລະກອນຕູມ ທີ່ຕິດຈອດກັບແຂວງເຊກອງ ເປັນປົກກະຕິ; ສອງຝ່າຍຈັດຕັ້ງການລາດຕະເວນສອງຝ່າຍ, ຖາງຫຍ້າ, ເຮັດອະນາໄມຢູ່ອ້ອມເຂດຫຼັກໝາຍຊາຍແດນ,  ສົມທົບກັນຮັກສາກົດໝາຍວ່າດ້ວຍຊາຍແດນ, ພົບເຫັນ ແລະສະກັດກັ້ນ, ແກ້ໄຂການກະທໍາລະເມີດກົດໝາຍຢ່າງທັນການ, ບໍ່ປະໃຫ້ຕົກຢູ່ໃນທ່າຮັບໂດຍບັງເອີນຢ່າງເດັດຂາດ.

ທ່ານພັນເອກພິເສດ ຟ້າມຕຸ່ງເລິມ, ຫົວໜ້າການເມືອງກອງບັນຊາການທະຫານຊາຍແດນແຂວງເທື່ອທຽນເຫວ້ (ເບື້ອງຊ້າຍ) ມອບຂອງຂວັນໃຫ້ຝ່າຍລາວ. ພາບ: baothuathienhue.vn

ສອງຝ່າຍໄດ້ເຫັນດີເປັນເອກະສັນຕໍ່ທິດທາງສົມທົບກັນໃນປີ 2025 ໂດຍສຸມໃສ່ເນື້ອໃນຕົ້ນຕໍ, ຄື: ຕັ້ງໜ້າເປັນເສນາທິການໃຫ້ອໍານາດການປົກຄອງທຸກຂັ້ນຂອງສອງຝ່າຍ ໃນການພັດທະນາເສດຖະກິດ, ສັງຄົມຢູ່ເຂດຊາຍແດນ; ຍູ້ແຮງການໂຄສະນາເຜີຍແຜ່ໃຫ້ປະຊາຊົນຢູ່ເຂດຊາຍແດນ ເພື່ອຍົກສູງຄວາມຮັບຮູ້ໃນການປະຕິບັດສັນຍາວ່າດ້ວຍກົດລະບຽບຊາຍແດນ ຫວຽດນາມ - ລາວ, ກໍ່ສ້າງເສັ້ນຊາຍແດນສັນຕິພາບ, ສະຖຽນລະພາບ ແລະພັດທະນາ. ຮັກສາການລາດຕະເວນສອງຝ່າຍ ເພື່ອປົກປັກຮັກສາເສັ້ນຊາຍແດນ ແລະຫຼັກໝາຍຊາຍແດນໃຫ້ປອດໄພ, ຄວບຄຸມການເຄື່ອນໄຫວໄປມາຂ້າມຊາຍແດນຢ່າງເຂັ້ມງວດ. ສືບຕໍ່ຮັກສາການແລກປ່ຽນສະພາບການ, ຂໍ້ມູນຂ່າວສານ, ສົມທົບກັນແກ້ໄຂບັນດາກໍລະນີທີ່ກ່ຽວຂ້ອງເຖິງອະທິປະໄຕ, ຜືນແຜ່ນດິນ, ຄວາມໝັ້ນຄົງ ແລະຄວາມເປັນລະບຽບຮຽບຮ້ອຍຢູ່ເຂດຊາຍແດນ; ສົມທົບກັນຢ່າງແໜ້ນແຟ້ນໃນການຕໍ່ສູ້ຕ້ານອາດຊະຍາກຳ ບົນຈິດໃຈສາມັກຄີ, ເຄົາລົບອະທິປະໄຕ ແລະກົດໝາຍຂອງແຕ່ລະປະເທດ...

ໂດຍ: ທູຈາງ