ນັກຂ່າວ: ສະເໜີສະຫາຍ ໃຫ້ຮູ້ກ່ຽວກັບຈຸດປະສົງ ແລະຄວາມໝາຍຂອງການປະຕິບັດງານຄັ້ງນີ້?

ພັນເອກພິເສດ ຫງວຽນວິງນາມ: ກ່ອນອື່ນໝົດ, ການສົ່ງກຳປັ່ນພ້ອມດ້ວຍຄະນະປະຕິບັດງານໄປເຂົ້າຮ່ວມ AMNEX 3 ແມ່ນ ເພື່ອແນໃສ່ປະຕິບັດທັດສະນະຊີ້ນໍາຂອງຄະນະພັກການທະຫານສູນກາງ, ຫົວໜ້າກະຊວງປ້ອງກັນປະເທດ ກ່ຽວກັບການເຊື່ອມໂຍງເຂົ້າກັບສາກົນ ແລະການພົວພັນຕ່າງປະເທດປ້ອງກັນຊາດ. ດ້ວຍການຕັ້ງໜ້າເຂົ້າຮ່ວມການເຄື່ອນໄຫວໃນຂອບເຂດ AMNEX 3, ພວກເຮົາຍັງສະແດງໃຫ້ເຫັນຄວາມຮັບຜິດຊອບຂອງສະມາຊິກກອງປະຊຸມຜູ້ບັນຊາການທະຫານເຮືອບັນດາປະເທດອາຊຽນ, ໂດຍຕອບສະໜອງຕາມຄໍາເຊີນຂອງທະຫານເຮືອແຫ່ງລາຊະອານາຈັກ ມາເລເຊຍ ແລະສະແດງໃຫ້ເຫັນການສະໜັບສະໜູນສໍາລັບການເຄື່ອນໄຫວສາກົນຫຼາຍຝ່າຍໂດຍມາເລເຊຍ ຈັດຕັ້ງ.

ຄຽງຂ້າງກັນນັ້ນ, ການຝຶກຊ້ອມໄດ້ຊ່ວຍຍົກສູງຄວາມສາມາດໃນການສົມທົບກັນຮັບມືກັບບັນດາສິ່ງທ້າທາຍລວມກ່ຽວກັບຄວາມໝັ້ນຄົງໃນການເດີນທະເລ ກໍ່ຄືການເພີ່ມທະວີການພົວພັນ, ຮ່ວມມື, ຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງທະຫານເຮືອບັນດາປະເທດທີ່ເຂົ້າຮ່ວມ ເພື່ອສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.

leftcenterrightdel
ພັນເອກພິເສດ ຫງວຽນວິງນາມ ທີ່ພິທີສວນສະໜາມກຳປັ່ນທະຫານເຮືອບັນດາປະເທດອາຊຽນ ເມື່ອວັນທີ 21 ສິງຫາ ຢູ່ Penang, ປະເທດມາເລເຊຍ. ພາບ: ນາມລອງ

ນັກຂ່າວ: ບັນດາການເຄື່ອນໄຫວລະອຽດ ເຊິ່ງພະນັກງານ, ລູກເຮືອກຳປັ່ນ 016-ກວາງຈຸງ ແລະຄະນະປະຕິບັດງານໄດ້ເຂົ້າຮ່ວມຢູ່ AMNEX 3 ແມ່ນຫຍັງແດ່, ຂໍຮຽນສະຫາຍ?

ພັນເອກພິເສດ ຫງວຽນວິງນາມ: ກໍາປັ່ນ 016-ກວາງຈຸງ ໄດ້ອອກຈາກທ່າ​ກ່ຳປັ່ນທະຫານກາມແຣງ ໃນວັນທີ 10 ສິງຫາ ແລະເຂົ້າທຽບ Swettenham ຢູ່ລັດ Penang, ມາເລເຊຍ ໃນວັນທີ 15 ສິງຫາ. ການເດີນທາງໄປມາເລເຊຍ ແລະກັບຄືນຫວຽດນາມ ແມ່ນມີໄລຍະທາງຍາວກວ່າ 2.500 ໄມທະເລ ເຊິ່ງແມ່ນໂອກາດທີ່ດີ ເພື່ອໃຫ້ລູກເຮືອໄດ້ຍົກສູງຄວາມສາມາດໃນການຈັດຕັ້ງການບັນຊາປະສານງານ, ຄວາມສາມາດກຽມພ້ອມສູ້ຮົບ, ການເປັນເຈົ້າຂອງອາວຸດ, ການປະກອບໃນເງື່ອນໄຂທີ່ເຄື່ອນໄຫວໄລຍະຍາວຢູ່ທະເລ; ຈັດຕັ້ງການສືບສວນ, ກໍາແໜ້ນສະພາບການເຂດທະເລຕ່າງໆ.

ພາຍຫຼັງເຂົ້າທຽບທ່າກຳປັ່ນ, ຄະນະທະຫານເຮືອປະຊາຊົນຫວຽດນາມ ໄດ້ເຂົ້າຮ່ວມການເຄື່ອນໄຫວຢ່າງສຸດອົກສຸດໃຈ, ຄື: ພິທີຕ້ອນຮັບກຳປັ່ນ, ພິທີໄຂ AMNEX 3, ການຊ້ອມຄັ້ງໃຫຍ່ ແລະການເດີນຂະບວນ, ການປະຊຸມວາງແຜນລ່ວງໜ້າກ່ອນທີ່ຈະອອກສູ່ທະເລ, ກອງປະຊຸມເຕັກນິກທະຫານເຮືອ ແລະຢ້ຽມຊົມທັດສະນະ. ພິເສດ, ງານລ້ຽງຢູ່ກຳປັ່ນ 016-ກວາງຈຸງ ຍັງມີການເຂົ້າຮ່ວມຂອງຜູ້ຕາງໜ້າສະຖານທູດ, ທີ່ປຶກສາທູດປ້ອງກັນຊາດ, ຊາວຫວຽດນາມ ອາໄສ ແລະຮ່ຳຮຽນຢູ່ ມາເລເຊຍ ພ້ອມດ້ວຍຜູ້ຕາງໜ້າທະຫານເຮືອບັນດາປະເທດອາຊຽນ ເປັນການປະກອບສ່ວນໂຄສະນາພາບພົດປະເທດ, ກອງທັບ ແລະປະຊາຊົນຫວຽດນາມ ເຖິງເພື່ອນມິດສາກົນ.

ຈາກນັ້ນ, ວັນທີ 20 ແລະ 21 ສິງຫາ, ພວກເຮົາໄດ້ເຂົ້າຮ່ວມການຊ້ອມໃຫຍ່ ແລະພິທີສວນສະໜາມກໍາປັ່ນທະຫານເຮືອບັນດາປະເທດອາຊຽນ (AFR) ດ້ວຍການເຂົ້າຮ່ວມຂອງພົນຕີ ເຈິ່ນແທັງງຽມ ຜູ້ບັນຊາການທະຫານເຮືອປະຊາຊົນຫວຽດນາມ.

ຕອນທ່ຽງວັນທີ 21 ສິງຫານີ້, ພາຍຫຼັງສິ້ນສຸດການຝຶກຊ້ອມ AFR, ກຳປັ່ນ 016-ກວາງຈຸງ ແລະກຳປັ່ນ 9 ລໍາຂອງທະຫານເຮືອບັນດາປະເທດອາຊຽນ ໄດ້ຫັນປ່ຽນໄປສູ່ການຝຶກຊ້ອມຢູ່ທະເລ. ນີ້ແມ່ນໄລຍະສຳຄັນຂອງ AMNEX 3 ດ້ວຍບັນດາເນື້ອໃນ, ຄື: ລະດົມກຳລັງພົນ, ການເຄື່ອນໄຫວລຳລຽງຢູ່ທະເລ, ການເຂົ້າລະຫັດ, ຖອດລະຫັດໂທລະເລກ, ການສື່ສານຕິດຕໍ່ດ້ວຍແສງໄຟ, ການເດີນທາງໄປມາໃນຍາມກາງຄືນ,... ຮັບມືກັບໄພຂົ່ມຂູ່ດ້ານຄວາມໝັ້ນຄົງຢູ່ທະເລຈາກເຮືອອີໂມ, ຖ່າຍຮູບຮູບຖານກຳລັງພົນຈາກທາງອາກາດ ແລະຂໍ່ານັບກັນຢູ່ທະເລ. ຂ້າພະເຈົ້າດີໃຈທີ່ສຸດເພາະວ່າໃນໄລຍະນີ້, ກຳປັ່ນ 016-ກວາງຈຸງ ໄດ້ປະຕິບັດເນື້ອໃນຢ່າງຄົບຖ້ວນ, ຖືກຕ້ອງຊັດເຈນ ແລະມີປະສິດທິຜົນ; ຮັບປະກັນຄວາມປອດໄພຢ່າງເດັດຂາດ, ຍົກສູງລະດັບຄວາມຮູ້, ຄວາມສາມາດໃນການສົມທົບ, ປະສານງານພ້ອມກັບທະຫານເຮືອບັນດາປະເທດ, ປະກອບສ່ວນເຂົ້າໃນຜົນສຳເລັດລວມຂອງ AMNEX 3.

ນັກຂ່າວ: ສະນັ້ນ, ກົມກອງໄດ້ກະກຽມຄືແນວໃດ ເພື່ອບັນລຸໝາກຜົນທີ່ກ່າວມາຂ້າງເທິງນີ້, ຂໍຮຽນສະຫາຍ?

ພັນເອກພິເສດ ຫງວຽນວິງນາມ: ພາຍຫຼັງໄດ້ຮັບໜ້າທີ່ເຂົ້າຮ່ວມ AMNEX 3, ຄະນະພັກ, ກອງບັນຊາການທະຫານເຮືອເຂດ 4 ໄດ້ສຸມໃສ່ການຊີ້ນຳນຳພາບັນດາອົງການທີ່ກ່ຽວຂ້ອງ, ພິເສດແມ່ນກອງພົນນ້ອຍ 162, ກະກຽມທຸກດ້ານຢ່າງລອບຄອບຖີ່ຖ້ວນ.

ພວກຂ້າພະເຈົ້າໄດ້ກໍານົດເອົາການເຂົ້າຮ່ວມບັນດາເນື້ອໃນໃນ AMNEX 3 ແມ່ນໂອກາດອັນດີ ເພື່ອໃຫ້ທະຫານເຮືອປະຊາຊົນຫວຽດນາມ ໄດ້ສະແດງໃຫ້ເຫັນພາບພົດກຳລັງຫຼວງ, ຍອດຢ້ຽມ, ເຕັມໄປດ້ວຍຄຸນທາດ. ນີ້ກໍ່ແມ່ນໂອກາດ ເພື່ອໃຫ້ພະນັກງານ, ນັກຮົບໄດ້ພົບປະແລກປ່ຽນ, ຮ່ຳຮຽນ ແລະແລກປ່ຽນບົດຮຽນກັບທະຫານເຮືອບັນດາປະເທດອາຊຽນ. ສິ່ງສຳຄັນກວ່ານັ້ນ, ບັນດາການເຄື່ອນໄຫວທີ່ແທດຈິງຢູ່ໃນການຝຶກຊ້ອມໄດ້ປະກອບສ່ວນເພີ່ມທະວີຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ຊຸກຍູ້ການຮ່ວມມືທີ່ແທດຈິງລະຫວ່າງທະຫານເຮືອບັນດາປະເທດໃນພາກພື້ນ, ຄືດັ່ງຫົວຂໍ້ຂອງ AMNEX 3 ແມ່ນ “ນ້ຳໃຈແຫ່ງຄວາມເປັນເພື່ອນມິດ ແລະສົມທົບກັນກະທໍາ”.

ໃນນາມສ່ວນຕົວຂ້າພະເຈົ້າ ແລະບັນດາພະນັກງານ, ນັກຮົບທຸກຄົນທີ່ຢູ່ກຳປັ່ນ 016-ກວາງຈຸງ ຮູ້ສຶກເປັນກຽດ ແລະພາກພູມໃຈທີ່ໄດ້ເປັນຕົວແທນໃຫ້ເຫຼົ່າທັບທະຫານເຮືອເຂົ້າຮ່ວມເຫດການສໍາຄັນນີ້. ພວກຂ້າພະເຈົ້າເຊື່ອໝັ້ນວ່າ, ປະສົບການອັນລ້ຳຄ່າ, ການປະກອບສ່ວນ ແລະໝາກຜົນແທດຈິງຈາກການຝຶກຊ້ອມຄັ້ງນີ້ຈະສືບຕໍ່ປະກອບສ່ວນຢັ້ງຢືນອິດທິພົນຊື່ສຽງ, ຖານະບົດບາດ, ທີ່ຕັ້ງຂອງທະຫານເຮືອປະຊາຊົນຫວຽດນາມ ໃນເວທີສາກົນ, ພ້ອມທັງເປັນກໍາລັງໜູນໃຫ້ພະນັກງານ, ນັກຮົບຝຶກຝົນຫຼໍ່ຫຼອມຕົນເອງຢ່າງບໍ່ຢຸດຢັ້ງ, ກຽມພ້ອມຮັບ ແລະປະຕິບັດສຳເລັດທຸກໜ້າທີ່ເຊິ່ງພັກ, ລັດ ແລະກອງທັບມອບໝາຍໃຫ້ຢ່າງດີເລີດ.

ນັກຂ່າວ: ຂໍຂອບໃຈສະຫາຍ!

ໂດຍ: ໄຊນີດາ