ຜ່ານການເວລາຂອງປະຫວັດສາດ ແລະການຜັນແປຂອງຍຸກສະໄໝ, ການພົວພັນທີ່ເປັນມູນເຊື້ອ, ຄວາມສະໜິດຕິດພັນມາແຕ່ເຫິງນານລະຫວ່າງຫວຽດນາມ-ກໍາປູເຈຍ ນັບມື້ນັບສະໜິດແໜ້ນ, ໝັ້ນແກ່ນ, ໄດ້ທົດສອບຜ່ານພຶດຕິກຳຕົວຈິງດ້ວຍເລືອດເນື້ອເຫື່ອແຮງ ແລະການເສຍສະຫຼະຊີວິດຂອງນັກຮົບວິລະຊົນທີ່ເສຍສະຫຼະຊີວິດ ກໍ່ຄືການສູ້ຊົນຂອງປະຊາຊົນຮຸ່ນຕ່າງໆຂອງສອງປະເທດ, ກາຍເປັນຊັບສົມບັດອັນລ້ຳຄ່າ, ສັກກະລະບູຊາ ແລະໝັ້ນແກ່ນຂອງຫວຽດນາມ ແລະກຳປູເຈຍ. ສາມາດເວົ້າໄດ້ວ່າ 46 ປີຜ່ານມາແມ່ນເວລາບໍ່ດົນເມື່ອທຽບໃສ່ກັບໄລຍະທາງຂອງປະຫວັດສາດແຫ່ງການພົວພັນສອງປະເທດ, ແຕ່ວ່າແມ່ນໄລຍະເວລາທີ່ມີຄວາມໝາຍພິເສດທີ່ສຸດ.

ດ້ວຍໄຊຊະນະປະຫວັດສາດໃນລະດູບານໃໝ່ ປີ 1975, ປະຊາຊົນຫວຽດນາມ ແລະກຳປູເຈຍ ປາດຖະໜາຢາກດຳລົງຊີວິດໃນສັນຕິພາບເພືື່ອຟື້ນຟູ ແລະພັດທະນາປະເທດ ພາຍຫຼັງຊຸມປີເດືອນທີ່ປະສົບກັບຄວາມຫຍຸ້ງຍາກລຳບາກ, ເສຍສະຫຼະຊີວິດ. ແຕ່ເປັນໜ້າເສຍດາຍວ່າ ພວກປະຕິການ Pol Pot ພາຍຫຼັງຂຶ້ນກໍາອໍານາດໃນເດືອນເມສາ 1975 ໄດ້ສວຍໃຊ້ໝາກຜົນຂອງການປະຕິວັດ, ທໍລະຍົດປະຊາຊົນກຳປູເຈຍ ກໍ່ຄືຢຽບຢ່ຳຄຸນຄ່າທີ່ດີງາມຂອງການພົວພັນຖານບ້ານໃກ້ເຮືອນຄຽງອັນດີງາມລະຫວ່າງສອງຊາດ.

leftcenterrightdel
ກຳລັງປະກອບອາວຸດປະຕິວັດ ກຳປູເຈຍ ພ້ອມກັບທະຫານອາສາສະໝັກຫວຽດນາມ ເຂົ້າປົດປ່ອຍນະຄອນຫຼວງພະນົມເປັນ, ວັນທີ 7 ມັງກອນ 1979. ພາບ: ເອກະສານ.

ເຂົາເຈົ້າ ໄດ້ປ່ຽນປະເທດກຳປູເຈຍ ໃຫ້ເປັນ “ສູນ”: ບໍ່ໄດ້ໄປມາຫາສູ່ຢ່າງເສລີ, ບໍ່ໄດ້ເຕົ້າໂຮມປະຊຸມຢ່າງເສລີ, ບໍ່ໄດ້ສະແດງຄວາມຄິດຢ່າງເສລີ, ບໍ່ໄດ້ເຫຼື້ອມໃສເຊື່ອຖືສາສະໜາຢ່າງເສລີ, ບໍ່ໄດ້ຮ່ຳຮຽນຢ່າງເສລີ, ບໍ່ໄດ້ສົມລົດຢ່າງເສລີ, ບໍ່ໄດ້ໃຊ້ເງິນຄຳ, ຄ້າຂາຍ, ບໍ່ມີວັດວາອາຮາມ... ກຳປູເຈຍ ໃນໄລຍະນັ້ນປຽບເໝືອນຄຸກ, ຄື ນາລົກ ຢູ່ເທິງດິນ.

ແມ່ນສອງປະເທດບ້ານໃກ້ເຮືອນຄຽງທີ່ມີພູຜາປ່າໄມ້ແມ່ນ້ຳລຳເຊຕິດຈອດກັນ, ເມື່ອນົກຮ້ອງທັງສອງເຂດຊາຍແດນໄດ້ຍິນພ້ອມກັນເພາະສະນັ້ນຄວາມທຸກຍາກລຳບາກນັ້ນຂອງກຳປູເຈຍ ໄດ້ແຜ່ກະຈາຍມາຮອດຫວຽດນາມ. Pol Pot ໄດ້ລະດົມກໍາລັງແຮງຂອງທະຫານຫຼວງດຳເນີນການຮຸກຮານຊາຍແດນທິດຕາເວັນຕົກສ່ຽງໃຕ້, ລ່ວງລະເມີດເອກະລາດ, ອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຫວຽດນາມ, ບິດເບືອນຄວາມຈິງທາງປະຫວັດສາດ, ຍຸຍົງໃຫ້ເກີດຄວາມກຽດຊັງຕໍ່ຊາດ.

ໂດຍຕອບສະໜອງຄຳຮຽກຮ້ອງຢ່າງຮີບດ່ວນຂອງແນວໂຮມສາມັກຄີກູ້ຊາດກຳປູເຈຍ ແລະເລີ່ມຈາກມູນເຊື້ອສາມັກຄີ, ສະໜິດຕິດພັນ, ການຊ່ວຍເຫຼືອກັນລະຫວ່າງສອງຊາດ, ພາຍຫຼັງທັບມ້າງສົງຄາມຮຸກຮານຊາຍແດນທິດຕາເວັນຕົກສ່ຽງໃຕ້ຫວຽດນາມ ຂອງລະບອບ Pol Pot, ຫວຽດນາມ ໄດ້ຈັດສົ່ງທະຫານອາສາສະໝັກໄປ “ຄຽງບ່າຄຽງໄຫຼ່”, ບໍ່ຫວາດຫວັ່ນຕໍ່ຄວາມເສຍສະຫຼະຊີວິດ, ພ້ອມກັບກຳລັງປະກອບອາວຸດປະຕິວັດ ແລະປະຊາຊົນກຳປູເຈຍ ຕໍ່ສູ້, ກູ້ເອົາປະເທດ ກຳປູເຈຍ ຫຼຸດພົ້ນອອກຈາກການດັບສູນເຊື້ອຊາດ, ກ້າວເຂົ້າສູ່ໄຊຊະນະວັນທີ 7 ມັງກອນ 1979. ໄຊຊະນະປະຫວັດສາດນີ້ແມ່ນໄຊຊະນະລວມຂອງສອງຊາດ, ປິດໜ້າປະຫວັດສາດຊົ່ວຮ້າຍທີ່ສຸດຂອງປະເທດກຳປູເຈຍ, ນຳປະຊາຊົນກໍາປູເຈຍ ຫຼຸດພົ້ນອອກຈາກລະບອບດັບສູນເຊື້ອຊາດ, ກ້າວເຂົ້າສູ່ໄລຍະເອກະລາດ, ເສລີພາບ. ທ່ານ Samdech Techo Hun Sen ເຄີຍຢັ້ງຢືນວ່າ ວັນທີ 7 ມັງກອນ ແມ່ນ “ວັນເກີດທີສອງ” ຂອງປະຊາຊົນກຳປູເຈຍ ແລະເລື່ອງຫວຽດນາມ ຈັດສົ່ງທະຫານອາສາສະໝັກມາກູ້ຊ່ວຍປະຊາຊົນກຳປູເຈຍ ໃຫ້ຫຼຸດພົ້ນອອກຈາກລະບອບດັບສູນເຊື້ອຊາດ “ປະຫວັດສາດໄດ້ຈົດຈຳ”. “ພວກເຮົາສາມາດຖາມວ່າໃນໜ່ວຍໂລກນີ້, ມີປະເທດໃດໄດ້ຊ່ວຍເຫຼືອປະຊາຊົນກຳປູເຈຍ, ພິເສດແມ່ນປົດປ່ອຍຈາກລະບອບດັບສູນເຊື້ອຊາດ Pol Pot ແລະສະກັດກັ້ນການກັບຄືນຂອງພວກມັນ? ຄໍາຕອບແມ່ນປະຊາຊົນ ແລະກອງທັບຫວຽດນາມ. ປະຊາຊົນ ກຳປູເຈຍ ມີຄວາມໄວ້ເນື້ອເຊື່ອໃຈ, ພຽງແຕ່ມີເທວະດາ ແລະພະເຈົ້າ ຈຶ່ງສາມາດກູ້ຊ່ວຍຜູ້ປະສົບຄວາມທຸກຍາກທີ່ສຸດໄດ້. ໃນເວລາປະຊາຊົນໃກ້ຊິຕາຍ, ພຽງແຕ່ພາວະນາຂໍເທວະດາ ແລະພະເຈົ້າ ມາກູ້ຊ່ວຍ ທະຫານອາສາສະໝັກຫວຽດນາມ ປະກົດຂຶ້ນ. ທະຫານຫວຽດນາມ ແມ່ນທະຫານແຫ່ງເທບພະເຈົ້າ”, ທ່ານ Samdech Techo Hun Sen ຢັ້ງຢືນແນວນັ້ນເມື່ອເຂົ້າຮ່ວມພິທີເປີດນຳໃຊ້ເຂດຮ່ອງຮອຍປະຫວັດສາດບ່ອນສ້າງຕັ້ງຄະນະ 124 ຕົ້ນກຳເນີດຂອງກຳລັງປະກອບອາວຸດປະຕິວັດສາມັກຄີກູ້ຊາດ ກຳປູເຈຍ ໂດຍທ່ານ Samdech Techo Hun Sen ເປັນຫົວໜ້າ, ຢູ່ດົ່ງນາຍ, ເດືອນມັງກອນ 2012.

leftcenterrightdel
ປະຊາຊົນນະຄອນຫຼວງພະນົມເປັນ ອໍາລາທະຫານອາສາສະໝັກຫວຽດນາມ ທີ່ເຮັດສຳເລັດ ພັນທະສາກົນກັບເມືອປະເທດ. ພາບ: ເອກະສານ.

ໃນຕົວຈິງ, ພາຍຫຼັງທັບມ້າງລະບອບດັບສູນເຊື້ອຊາດ Pol Pot, ພ້ອມກັບການເຄື່ອນໄຫວການທະຫານເພື່ອສະກັດກັ້ນການກັບມາຂອງລະບອບດັບສູນເຊື້ອຊາດ, ຫວຽດນາມ ສືບຕໍ່ຄຽງບ່າຄຽງໄຫຼ່ຊ່ວຍກຳປູເຈຍ ກໍ່ສ້າງອຳນາດການປົກຄອງຮາກຖານ, ໜູນຊ່ວຍວັດຖູຊ່ວຍຟື້ນຟູເສດຖະກິດ. ຜ່ານວິວັດທະນາການຄຽງບ່າຄຽງໄຫຼ່ຕໍ່ສູ້, ກໍ່ສ້າງດ້ວຍຄວາມທຸກຍາກລຳບາກ, ການເສຍສະຫຼະຊີວິດຂອງທະຫານອາສາສະໝັກຫວຽດນາມ ບໍ່ຈັກວ່າເທົ່າໃດ, ກຳລັງປະກອບອາວຸດປະຕິວັດ ແລະກຳລັງປະກອບອາວຸດປະຕິວັດກຳປູເຈຍ ນັບມື້ນັບເຕີບໃຫຍ່ເຂັ້ມແຂງ, ມີຄວາມສາມາດປົກປັກຮັກສາປະເທດຊາດ.  ຈາກພຶດຕິກໍາຕົວຈິງນີ້, ຕາມຂໍ້ຕົກລົງລະຫວ່າງສອງປະເທດ, ປີ 1989, ທະຫານອາສາສະໝັກຫວຽດນາມ ໄດ້ຖອນທັບກັບຄືນປະເທດໃນຄວາມປິຕິຊົມຊື່ນ, ສະຫງ່າລາສີ, ດ້ວຍນ້ຳໃຈຮັກແພງຂອງປະຊາຊົນປະເທດແຫ່ງວັດວາອາຮາມ.

ພວກເຮົາຮູ້ສຶກປິຕິຊົມຊື່ນເມື່ອເຫັນວ່າ ດ້ວຍການຊ່ວຍເຫຼືອຂອງພັກ, ລັດ, ກອງທັບ ແລະປະຊາຊົນຫວຽດນາມ ກໍ່ຄືເພື່ອນມິດສາກົນ, ປະເທດ ກຳປູເຈຍ ໄດ້ບືນຕົວຂຶ້ນ, ມີຄວາມສາມາດປົກປັກຮັກສາ, ສ້າງສາ ແລະພັດທະນາປະເທດຕົນເອງໄດ້ແລ້ວ. ສືບທອດມູນເຊື້ອສາມັກຄີ ກໍຄືຈິດໃຈໄຊຊະນະວັນທີ 7 ມັງກອນ 1979, ຫວຽດນາມ ແລະກຳປູເຈຍ ໄດ້ນຳການພົວພັນຖານບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານພັດທະນາຂຶ້ນສູ່ລະດັບສູງໃໝ່ຢ່າງບໍ່ຢຸດຢັ້ງ, ສົມກັບການປະກອບສ່ວນ, ການເສຍສະຫຼະຂອງຄົນຮຸ່ນກ່ອນ, ຕອບສະໜອງຄວາມມຸ່ງມາດປາດຖະໜາ, ຜົນປະໂຫຍດຂອງປະຊາຊົນສອງປະເທດ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ສະຖຽນລະພາບ, ພັດທະນາຢ່າງວັດທະນາຖາວອນຢູ່ພາກພື້ນ ແລະໃນໂລກ.

ປະຫວັດສາດຈົດຈຳບໍ່ສາມາດຫຼົງລືມໄດ້ ແລະບໍ່ມີໃຜຫຼົງລືມ. ປີເດືອນຜ່ານພົ້ນໄປ ແຕ່ ສາຍໃຈ ຫວຽດນາມ-ກຳປູເຈຍ ໄດ້ສ້າງຂຶ້ນດ້ວຍເລືອດເນື້ອເຫື່ອແຮງ ແລະນ້ຳຕາ ເພື່ອພ້ອມກັນຍາດເອົາຊະນະ, ສັນຕິພາບໃນປະຈຸບັນ. ໄຊຊະນະວັນທີ 7 ມັງກອນ 1979 ຈະຍືນຍົງໄປຊົ່ວກາລະນານ.

ໂດຍ: ແສງເດືອນ