ກອງທັບປະຊາຊົນຫວຽດນາມ ແມ່ນກອງທັບວິລະຊົນຂອງຊາດຫວຽດນາມວິລະຊົນ

ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ຢັ້ງຢືນຄືແນວນັ້ນເມື່ອຕອບສຳພາດຕໍ່ນັກຂ່າວໜັງສືພິມກອງທັບປະຊາຊົນຫວຽດນາມ, ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ (22-12-1944 / 22-12-2024) ແລະ 35 ປີແຫ່ງວັນບຸນທົ່ວປວງຊົນປ້ອງກັນຊາດ (22-12-1989 / 22-12-2024).

ນັກຂ່າວ: ສະຫາຍສາມາດແບ່ງປັນຄວາມຮູ້ສຶກຂອງຕົນກ່ຽວກັບຄວາມໝາຍປະຫວັດສາດ, ບົດບາດຂອງເຫດການສ້າງຕັ້ງກອງທັບປະຊາຊົນຫວຽດນາມ ກໍ່ຄືແນວທາງປ້ອງກັນຊາດຂອງຫວຽດນາມ?

ທ່ານນາງ ຄຳເພົາ ເອີນທະວັນ: ດ້ວຍວິໄສທັດຍຸດທະສາດ, ປະທານໂຮ່ຈີມິນ ໄດ້ຊີ້ໃຫ້ເຫັນວ່າ ເພື່ອປະຕິບັດພາລະກິດການປະຕິວັດຫວຽດນາມ ຢ່າງມີໄຊ, ຕ້ອງສ້າງຕັ້ງກຳລັງປະກອບອາວຸດ. ດ້ວຍເລື່ອງກອງທະຫານໂຄສະນາປົດປ່ອຍຫວຽດນາມ ເປັນກຳລັງຫຼວງທຳອິດ, ອົງການຈັດຕັ້ງຕົ້ນກຳເນີດຂອງກອງທັບປະຊາຊົນຫວຽດນາມ ໄດ້ຮັບການສ້າງຕັ້ງຢ່າງເປັນທາງການໃນວັນທີ 22 ທັນວາ 1944 ດ້ວຍນັກຮົບຈຳນວນ 34 ຄົນ ໂດຍສະຫາຍ ຫວໍງວຽນຢາບ ຮັບຜິດຊອບແມ່ນປັດໄຈທີ່ກຳເນີດເກີດຂຶ້ນຢ່າງພາວະວິໄສໃນພາລະກິດປົດປ່ອຍຂອງປະເທດຫວຽດນາມ, ບາດລ້ຽວໃນພາລະກິດຕໍ່ສູ້ປະຕິວັດ ແລະຕອບສະໜອງຄວາມຮຽກຮ້ອງພັດທະນາຂອງການປະຕິວັດໃນໄລຍະນັ້ນ.

ກອງທະຫານໂຄສະນາປົດປ່ອຍຫວຽດນາມ ໄດ້ຮັບການສ້າງຕັ້ງຢູ່ເຂດປ່າ ເຈີ່ນຮຶງດ້າວ. ພາບເອກະສານ

ມື້ຕໍ່ສູ້ທຳອິດ, ກອງທະຫານຫຼວງທຳອິດຂອງຫວຽດນາມ ຍາດເອົາໄຊຊະນະດັງກ້ອງກັງວານ, ປົດປ່ອຍເຂດດິນທີ່ກວ້າງຂວາງເພື່ອສ້າງຖານທີ່ໝັ້ນສຳລັບການເຄື່ອນໄຫວຕໍ່ສູ້ຍາດເອົາເອກະລາດ, ເປີດສາກມູນເຊື້ອ "ເດັດດ່ຽວຕໍ່ສູ້ - ເດັດຂາດມີໄຊ" ຂອງກອງທັບປະຊາຊົນຫວຽດນາມ. ວັນທີ 15 ພຶດສະພາ 1945, ກອງທະຫານໂຄສະນາປົດປ່ອຍຫວຽດນາມ ໂຮມເຂົ້າກັບກອງກູ້ຊາດ ແລະປ່ຽນຊື່ເປັນກອງທັບປົດປ່ອຍຊາດ, ກາຍເປັນກຳລັງການທະຫານຂອງແນວໂຮມຫວຽດມິງ ເມື່ອດຳເນີນການລຸກຮື້ຂຶ້ນຄັ້ງໃຫຍ່, ດຳເນີນການປະຕິວັດເດືອນສິງຫາ ປີ 1945 ປະສົບຜົນສຳເລັດ, ຍາດເອົາອຳນາດການປົກຄອງມາສູ່ມືປະຊາຊົນ, ສ້າງຕັ້ງປະເທດສາທາລະນະລັດ ປະຊາທິປະໄຕຫວຽດນາມ.

ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ຕອບສຳພາດຕໍ່ນັກຂ່າວໜັງສືພິມກອງທັບປະຊາຊົນຫວຽດນາມ. ພາບ: qdnd.vn

ແຕ່ກອງທັບເຂົ້າຮ່ວມການລຸກຮື້ຂຶ້ນ ມີຈຳນວນພຽງແຕ່ 200 ຄົນເທົ່ານັ້ນ, ກອງທັບປະຊາຊົນຫວຽດນາມ ພັດທະນາເປັນບັນດາກອງພົນແຂງແຮງ, ຍາດເອົາໄຊຊະນະດັງກ້ອງກັງວານ ເຊິ່ງສຸດດຍອດແມ່ນໄຊຊະນະດ້ຽນບຽນຝູ ວັນທີ 7 ພຶດສະພາ 1954, ທັບມ້າງກົນອຸບາຍສ້າງລະບອບຫົວເມືອງຂຶ້ນຄືນໃໝ່ຂອງພວກລ່າເມືອງຂຶ້ນຝລັ່ງ; ຍາດເອົາໄຊຊະນະຈາກການບຸກໂຈມຕີ ແລະລຸກຮື້ຂຶ້ນລະດູບານໃໝ່ ປີ 1975, ປົດປ່ອຍພາກໃຕ້, ທ້ອນໂຮມປະເທດຊາດຫວຽດນາມເປັນເອກະພາບ.

ພາຍຫຼັງປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ, ກອງທັບປະຊາຊົນຫວຽດນາມ ຍາມໃດກໍ່ແມ່ນກຳລັງປະຈັນບານນຳໜ້າໃນວຽກງານປ້ອງກັນ ແລະຕ້ານໄພທຳມະຊາດ, ຊອກຫາ, ກູ້ຊີບກູ້ໄພ, ແກ້ໄຂຜົນຮ້າຍຢ້ອນຫຼັງຈາກສົງຄາມ; ພ້ອມທັງປະຕິບັດວຽກງານເຊື່ອມໂຍງgເຂົ້າກັບສາກົນ ແລະການທູດປ້ອງກັນຊາດ, ຕັ້ງໜ້າເຂົ້າຮ່ວມກຳລັງຮັກສາສັນຕິພາບສະຫະປະຊາຊາດ, ປະກອບສ່ວນຍົກສູງຖານະບົດບາດ, ອິດທິພົນຊື່ສຽງຂອງຫວຽດນາມ ໃນເວທີສາກົນ.

ນັບແຕ່ເມື່ອໄດ້ຮັບການສ້າງຕັ້ງຈົນຮອດປະຈຸບັນ, ກອງທັບປະຊາຊົນຫວຽດນາມ ນັບມື້ນັບເຕີບໃຫຍ່ຂະຫຍາຍຕົວ, ພ້ອມກັບທົ່ວປວງຊົນຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ, ປະກອບສ່ວນອັນໃຫຍ່ຫຼວງເຂົ້າໃນພາລະກິດຕໍ່ສູ້ປົດປ່ອຍຊາດ, ສ້າງສາ ແລະປົກປັກຮັກສາປະເທດຊາດ. ພາບ: chinhphu.vn

ນັກຂ່າວ: ເນື່ອງໃນໂອກາດາສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ ແລະ 35 ປີແຫ່ງວັນບຸນທົ່ວປວງຊົນປ້ອງກັນຊາດ, ກະຊວງປ້ອງກັນປະເທດຫວຽດນາມ ຈັດຕັ້ງງານວາງສະແດງປ້ອງກັນຊາດສາກົນຫວຽດນາມ 2024. ທ່ານນາງເອກອັກຄະລັດຖະທູດ ຕີລາຄາຄືແນວໃດກ່ຽວກັບບົດບາດ, ຄວາມໝາຍຂອງເຫດການນີ້?

ທ່ານນາງ ຄຳເພົາ ເອີນທະວັນ: ແຕ່ວັນທີ 19 ທັນວາ ຫາວັນທີ 22 ທັນວາ, ກະຊວງປ້ອງກັນປະເທດຫວຽດນາມ ຈັດຕັ້ງເຫດການງານວາງສະແດງປ້ອງກັນຊາດສາກົນຫວຽດນາມ ປີ 2024. ງານວາງສະແດງຄັ້ງນີ້ມີຫຼາຍອັນຫຼາຍກວ່າເມື່ອທຽບໃສ່ກັບຄັ້ງທີ 1, ຄື: ຂະໜາດໃຫຍ່ກວ່າ, ກິດຈະກຳຫຼາຍກວ່າ, ຄະນະແຂກສາກົນຫຼາຍກວ່າ, ຈຳນວນອາວຸດຍຸດໂທປະກອນຂອງບັນດາປະເທດ ແລະຫວຽດນາມ ເຂົ້າຮ່ວມວາງສະແດງຫຼາຍກວ່າເມື່ອທຽບໃສ່ກັບຄັ້ງທີ 1, ພິສູດໃຫ້ເຫັນອິດທິພົນຊື່ສຽງ ແລະຄວາມດຶງດູດນັບມື້ນັບເພີ່ມຂຶ້ນຂອງເຫດການ ໂດຍກະຊວງປ້ອງກັນປະເທດຫວຽດນາມ ຈັດຕັ້ງ, ພ້ອມທັງ, ງານວາງສະແດງແມ່ນກາລະໂອກາດ ເພື່ອເປີດກວ້າງການພົວພັນຮ່ວມມືສາກົນ, ການທູດປ້ອງກັນຊາດ, ສ້າງຄວາມໄວ້ເນື້ອເຊື່ອໃຈລະຫວ່າງຫວຽດນາມ  ກັບປະເທດຕ່າງໆໃນໂລກ, ປະກອບສ່ວນຢັ້ງຢືນການເຕີບໃຫຍ່ຂະຫຍາຍຕົວຂອງກອງທັບປະຊາຊົນຫວຽດນາມ ແລະສະແດງໃຫ້ເຫັນກຳລັງແຮງ, ສະຕິປັນຍາ, ຄຸນທາດຫວຽດນາມ, ວັດທະນະທຳການທະຫານຂອງກອງທັບປະຊາຊົນຫວຽດນາມ ເຖິງເພື່ອນມິດສາກົນ.

ບັນດາລາຍການສະແດງວັດທະນະທຳ, ສິລະປະ ປະກອບສ່ວນໂຄສະນາເຜີຍແຜ່ຮູບພາບປະເທດຫວຽດນາມ, ວັດທະນະທຳ, ຊາວຫວຽດນາມ, ວັດທະນະທຳການທະຫານຂອງກອງທັບປະຊາຊົນຫວຽດນາມ ເຖິງເພື່ອນມິດສາກົນ. ພາບ: qdnd.vn

ເນື່ອງໃນໂອກາດນີ້, ທ່ານພົນໂທ ຄຳລຽງ ອຸທະໄກສອນ, ກຳມະການສູນກາງພັກປະຊາຊົນປະຕິວັດລາວ, ລັດຖະມົນຕີກະຊວງປ້ອງກັນປະເທດລາວ ພ້ອມດ້ວຍຄະນະຜູ້ແທນກະຊວງປ້ອງກັນປະເທດລາວ ມາຢ້ຽມຢາມຫວຽດນາມຢ່າງເປັນທາງການ ແລະເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024.

ນີ້ແມ່ນການໄປຢ້ຽມຢາມຕ່າງປະເທດຄັ້ງທຳອິດຂອງທ່ານ ໃນຖານະຕຳແໜ່ງລັດຖະມົນຕີກະຊວງປ້ອງກັນປະເທດລາວ, ສະແດງໃຫ້ເຫັນການຖືເປັນສຳຄັນຕໍ່ການພັດທະນາການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລາວ-ຫວຽດນາມ. ພິເສດ, ຕອນບ່າຍວັນທີ 19 ທັນວາ, ທີ່ສຳນັກງານກະຊວງປ້ອງກັນປະເທດຫວຽດນາມ, ທ່ານພົນເອກ ຟານວັນຢາງ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບການນຳກະຊວງປ້ອງກັນປະເທດ, ກອງທັບບັນດາປະເທດເນື່ອງໃນໂອກາດມາ ຫວຽດນາມ ເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024. ທ່ານພົນໂທ ຄຳລຽງ ອຸທະໄກສອນ ຖືວ່າ ງານວາງສະແດງປ້ອງກັນຊາດສາກົນຫວຽດນາມ 2024 ນຳເອົາມາເຊິ່ງຄຸນຄ່າພ້ອມກັບກາລະໂອກາດ ເພື່ອໃຫ້ຂະແໜງອຸດສາຫະກຳປ້ອງກັນຊາດພາກພື້ນ ແລະທົ່ວໂລກຂຸດຄົ້ນເຕັກໂນໂລຢີປ້ອງກັນຊາດ, ເຕັກໂນໂລຢີການທະຫານ; ພັດທະນາ ແລະຊຸກຍູ້ການຄົ້ນຄວ້າວິທະຍາສາດ, ຜະລິດໃນຂະແໜງອຸດສາຫະກຳປ້ອງກັນຊາດ, ແລກປ່ຽນຂໍ້ມູນຂ່າວສານ, ຮ່ວມມືໃນຂົງເຂດນີ້, ເພື່ອສັນຕິພາບ ແລະຄວາມໝັ້ນຄົງຢູ່ພາກພື້ນ ແລະໂລກ.

ນັກຂ່າວ: ກວ່າ 60 ປີຜ່ານມາ, ການພົວພັນຫວຽດນາມ-ລາວ ນັບມື້ນັບພັດທະນາ, ໃນນັ້ນການຮ່ວມມືປ້ອງກັນຊາດໄດ້ຖືວ່າແມ່ນເສົາຄ້ຳ, ແມ່ນຈຸດພົ້ນເດັ່ນຂອງການພົວພັນສອງປະເທດ. ຕາມທ່ານນາງເອກອັກຄະລັດຖະທູດ, ການພົວພັນສອງຝ່າຍໃນຂົງເຂດປ້ອງກັນຊາດໄດ້ປະກອບສ່ວນທີ່ມີຄວາມສຳຄັນແນວໃດສຳລັບການພົວພັນພິເສດຂອງສອງປະເທດ ຫວຽດນາມ-ລາວ?

ທ່ານນາງ ຄຳເພົາ ເອີນທະວັນ: ໃນການຕໍ່ສູ້ຕ້ານພວກລ່າເມືອງຂຶ້ນຝລັ່ງ ແລະຈັກກະພັດອາເມລິກາ, ການຮ່ວມມື, ຮ່ວມສຳພັນສູ້ຮົບຫວຽດນາມ-ລາວ ແມ່ນສັນຍະລັກອັນຜ່ອງໃສກ່ຽວກັບຈິດໃຈສາມັກຄີ, ຜ່ອງໃສ, ຕໍ່ສູ້ຕ້ານສັດຕູໂຕດຽວ. ປະຊາຊົນສອງປະເທດໄດ້ຮ່ວມທຸກຮ່ວມສຸກ, ສະໜັບສະໜູນກັນດ້ານວັດຖຸ ແລະຈິດໃຈ, ແມ່ນໜຶ່ງໃນບັນດາປັດໄຈສຳຄັນ, ຕັດສິນຜົນສຳເລັດຂອງການປະຕິວັດຂອງສອງປະເທດ.

ປະຊາຊົນລາວ ບໍ່ສາມາດຫຼົງລື້ມເລື່ອງປະຊາຊົນ ແລະທະຫານຮຸ່ນຕ່າງໆນັບຫຼາຍໝື່ນຄົນຂອງຫວຽດນາມ ໄດ້ມາຊ່ວຍເຫຼືອປະຊາຊົນລາວ ໃນການຕໍ່ສູ້ຍາດເອົາເອກະລາດ ແລະເສລີພາບໃຫ້ແກ່ປະເທດລາວ, ໃນນັ້ນ, ຫຼາຍຄົນໄດ້ອຸທິດສ່ວນຕະຫຼອດຊີວິດເພື່ອຮັບໃຊ້ການປະຕິວັດລາວ. ໃນທຸກເສັ້ນທາງຂອງປະເທດລາວ, ເລືອດເນື້ອເຊື້ອໄຂຂອງບັນດານັກຮົບຫວຽດນາມ ປົນກັບເລືອດເນື້ອເຊື້ອໄຂຂອງພະນັກງານ, ສະມາຊິກພັກ, ນັກຮົບ ແລະປະຊາຊົນລາວ ເພື່ອຄວາມເປັນຕາຍຂອງປະເທດລາວ.

ປະຊາຊົນລາວ ຕ້ອນຮັບທະຫານອາສາສະໝັກຫວຽດນາມ. ພາບ: ເອກະສານ

ພາຍຫຼັງສອງປະເທດໄດ້ຮັບການປົດປ່ອຍຢ່າງສົມບູນໃນປີ 1975, ພ້ອມດ້ວຍການພັດທະນາແບບຍືນຍົງຂອງການພົວພັນສອງປະເທດ, ການພົວພັນຮ່ວມມືດ້ານປ້ອງກັນຊາດຫວຽດນາມ-ລາວ ກໍ່ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ, ກາຍເປັນໜຶ່ງໃນບັນດາເສົາຄ້ຳສຳຄັນໃນການພົວພັນສອງປະເທດ, ປະກອບສ່ວນຢ່າງຕັ້ງໜ້າເຂົ້າໃນກິດຈະການສ້າງສາ ແລະປົກປັກຮັກສາປະເທດຊາດສັງຄົມນິຍົມຢູ່ແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.

ນັກຂ່າວ: ຕາມສະຫາຍ, ໃນໄລຍະຈະມາເຖິງສອງປະເທດຄວນເຮັດແນວໃດເພື່ອຮັກສາ, ເພີ່ມພູນຄູນສ້າງການພົວພັນສາມັກຄີຫວຽດນາມ-ລາວ ພັດທະນາຂຶ້ນສູ່ລະດັບສູງໃໝ່?

ທ່ານນາງ ຄຳເພົາ ເອີນທະວັນ: ນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດແມ່ນຊັບສົມບັດອັນລ້ຳຄ່າ ເຊິ່ງສອງພັກ, ສອງຊາດລາວ-ຫວຽດນາມ ເພາະວ່າມັນໄດ້ກໍ່ສ້າງ, ເພີ່ມພູນຄູນສ້າງ, ຮັກສາດ້ວຍສະຕິປັນຍາ ແລະເລືອດເນື້ອເຫື່ອແຮງຂອງປະຊາຊົນລາວ ແລະຫວຽດນາມ ຮຸ່ນຕ່າງໆ ທີ່ບໍ່ສາມາດນັບໄດ້, ບໍ່ມີສັດຕູໂຕໃດສາມາດທຳລາຍໄດ້. ນັ້ນແມ່ນການພົວພັນເຊິ່ງປະທານ ໂຮ່ຈີມິນ ເຄີຍເວົ້າວ່າ:

ສອງຊາດລາວ-ຫວຽດໄດ້ຝັງຄວາມຮັກຢູ່ໃນໃຈ

ຮົ່ງຮາ ທັງແມ່ຂອງບໍ່ເລິກປຸນປານໄດ້”

ປະທານ ໄກສອນ ພົມວິຫານ ທີ່່ແສນເຄົາລົບຮັກ ເຄີຍເວົ້າວ່າ: "ພູຜາອາດເຈື່ອນ ແມ່ນ້ຳລຳເຊອາດຈະເຫືອດແຫ້ງກໍ່ຕາມ, ແຕ່ຄວາມຮັກແພງລະຫວ່າງສອງຊາດລາວ-ຫວຽດນາມ ຈະໝັ້ນຄົງທະນົງແກ່ນຊົ່ວກາລະນານ”. ເພື່ອຮັກສາ, ເສີມຂະຫຍາຍການພົວພັນອັນຜ່ອງໃສ, ຫາຍາກນັ້ນ, ການນຳສອງພັກ ໄດ້ຕັກເຕືອນພວກເຮົາວ່າ ຄວນຕັ້ງໜ້າປະກອບສ່ວນຂອງຕົນເຂົ້າໃນການປົກປັກຮັກສາ, ເສີມຂະຫຍາຍການພົວພັນນັ້ນ, ໂດຍສະເພາະແມ່ນຕ້ອງສຶກສາໃຫ້ຄົນຮຸ່ນໜຸ່ມຂອງສອງປະເທດຮູ້ເຄົາລົບນັບຖື, ຮັກສາ, ເພີ່ມພູນຄູນສ້າງສາຍພົວພັນນັ້ນຈົ່ງຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.

ນັກຂ່າວ: ຂໍຂອບໃຈທ່ານນາງເອກອັກຄະລັດຖະທູດ!

ໂດຍ: ແສງເດືອນ