ພົນໂທ ຫງວຽນເຕິນເກືອງ ຕ້ອນຮັບຜູ້ບັນຊາການທະຫານອາກາດລາວ

ສະຫາຍພົນໂທ ຫງວຽນເຕິນເກືອງ ຕ້ອນຮັບສະຫາຍພົນຈັດຕະວາ ຄໍາເຫຼັກ ແສງພະຈັນ. ພາບ: ຮວ່າງຫວູ

ທີ່ການຕ້ອນຮັບ, ສະຫາຍພົນໂທ ຫງວຽນເຕິນເກືອງ ໄດ້ຮັບຮູ້ ແລະຕີລາຄາສູງໝາກຜົນການຮ່ວມມືລະຫວ່າງກໍາລັງທະຫານອາກາດສອງປະເທດໃນໄລຍະຜ່ານມາ; ຢືນຢັນວ່າ ການນຳກະຊວງປ້ອງກັນປະເທດຫວຽດນາມ ຍາມໃດກໍ່ສະໜັບສະໜູນ ແລະສ້າງທຸກເງື່ອນໄຂສະດວກ ເພື່ອໃຫ້ສອງຝ່າຍເພີ່ມທະວີການຮ່ວມມື; ສະເໜີວ່າ ໃນໄລຍະຈະມາເຖິງ, ສອງຝ່າຍສຸມໃສ່ບັນດາເນື້ອໃນສຳຄັນ, ຄື: ວຽກງານກໍ່ສ້າງພະນັກງານ, ແລກປ່ຽນບົດຮຽນປະສົບການ, ວິຊາສະເພາະ, ປະກອບສ່ວນກໍ່ສ້າງກຳລັງທະຫານອາກາດສອງປະເທດໃຫ້ນັບມື້ນັບພັດທະນາໝັ້ນຄົງເຂັ້ມແຂງ.

ສະຫາຍພົນໂທ ຫງວຽນເຕິນເກືອງ ມອບຂອງຂວັນເປັນທີ່ລະນຶກໃຫ້ສະຫາຍພົນຈັດຕະວາ ຄໍາເຫຼັກ ແສງພະຈັນ. ພາບ: ຮວ່າງຫວູ

ສະຫາຍພົນຈັດຕະວາ ຄໍາເຫຼັກ ແສງພະຈັນ ແຈ້ງໃຫ້ພົນໂທ ຫງວຽນເຕິນເກືອງ ຮັບຊາບກ່ຽວກັບໝາກຜົນການເຮັດວຽກກ່ອນໜ້ານັ້ນກັບສະຫາຍພົນຕີ ຫວູວັນຄາ, ຮັກສາການຜູ້ບັນຊາການເຫຼົ່າທັບປ້ອງກັນອາກາດ - ທະຫານອາກາດ; ພ້ອມທັງ, ຂອບໃຈກະຊວງປ້ອງກັນປະເທດ, ກົມໃຫຍ່ເສນາທິການ ແລະເຫຼົ່າທັບປ້ອງກັນອາກາດ - ທະຫານອາກາດ ຫວຽດນາມ ໃນໄລຍະຜ່ານມາໄດ້ໜູນຊ່ວຍການບຳລຸງສ້າງ ແລະຝຶກອົບຮົມໃຫ້ແກ່ພະນັກງານໃຫ້ທະຫານອາກາດລາວ.

ກ່ອນໜ້ານັ້ນ, ຕອນບ່າຍວັນດຽວກັນ, ຢູ່ຮ່າໂນ້ຍ, ສະຫາຍພົນຕີ ຫວູວັນຄາ ໄດ້ມີການເຮັດວຽກກັບສະຫາຍພົນຈັດຕະວາ ຄໍາເຫຼັກ ແສງພະຈັນ. ທີ່ການເຮັດວຽກ, ສອງຝ່າຍຕີລາຄາວ່າ ໃນໄລຍະຜ່ານມາ, ການຮ່ວມມືລະຫວ່າງກໍາລັງທະຫານອາກາດສອງປະເທດບັນລຸໄດ້ໝາກຜົນຕັ້ງໜ້າຫຼາຍຢ່າງໃນຫຼາຍຂົງເຂດ; ເຫັນດີເປັນເອກະພາບວ່າ ໃນໄລຍະຈະມາເຖິງ,  ສືບຕໍ່ເພີ່ມທະວີການຮ່ວມມືໃນຫຼາຍຂົງເຂດ, ໃນນັ້ນສຸມໃສ່ຝຶກແອບອົບຮົມ - ບຳລຸງສ້າງພະນັກງານ, ແລກປ່ຽນຄະນະຜູ້ແທນທຸກຂັ້ນ...

ໂດຍ: ທະນາພອນ