ຄະນະກອງທັບປະຊາຊົນຫວຽດນາມ ເດີນທາງເຂົ້າຮ່ວມ Army Games 2019
ກປ.ອອນໄລ - ຕອນບ່າຍວັນທີ 22 ກໍລະກົດ, ພິທີສົ່ງຄະນະກອງທັບປະຊາຊົນຫວຽດນາມ ເດີນທາງເຂົ້າຮ່ວມງານແຂ່ງຂັນການທະຫານສາກົນປີ 2019 (Army Games 2019) ໄດ້ດໍາເນີນຢູ່ສໍານັກງານກະຊວງປ້ອງກັນປະເທດ. ທ່ານພົນຕີ ຫງວຽນເຕິນເກືອງ, ຮອງຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຫົວໜ້າຄະນະຊີ້ນໍາງານແຂ່ງຂັນໄດ້ເຂົ້າຮ່ວມ ແລະເປັນປະທານພິທີສົ່ງ.
ຮັບຮູ້ ແລະຕີລາຄາສູງຜົນການຝຶກແອບຂອງບັນດາທີມທີ່ເຂົ້າຮ່ວມ Army Games 2019, ທ່ານພົນຕີ ຫງວຽນເຕິນເກືອງ ຢັ້ງຢືນວ່າ, ການເຂົ້າຮ່ວມງານແຂ່ງຂັນການທະຫານຄັ້ງນີ້ແມ່ນເງື່ອນໄຂເພື່ອໃຫ້ບັນດາທີມສໍາຜັດ, ຮຽນຮູ້, ຍົກສູງວິທີຝຶກແອບ ແລະທັກສະນໍາໃຊ້ອາວຸດຍຸດໂທປະກອນທີ່ທັນສະໄໝປະເພດຕ່າງໆຂອງກອງທັບບັນດາປະເທດໃນໂລກ.
|
|
ຫົວໜ້າກົມໃຫຍ່ເສນາທິການ ຖ່າຍຮູບກັບທີມຊາດເສນາຮັກ. ພາບ: qdnd.vn. |
ເພື່ອໃຫ້ຄະນະເຂົ້າຮ່ວມງານແຂ່ງຂັນຄັ້ງນີ້ບັນລຸໝາກຜົນສູງ, ທ່ານພົນຕີ ຫງວຽນເຕິນເກືອງ ສະເໜີ: ໝູ່ຄະນະບັນດາທີມຊາດເສີມຂະຫຍາຍນໍ້າໃຈສາມັກຄີ, ຄວາມເຫັນດີເປັນເອກະພາບສູງ, ຊ່ວຍເຫຼືອເຊິ່ງກັນ ແລະກັນ, ຜ່ານຜ່າທຸກຄວາມຫຍຸ້ງຍາກເພື່ອປະຕິບັດສໍາເລັດໜ້າທີ່ແຂ່ງຂັນ; ຕ້ອງກໍານົດວ່ານີ້ທັງແມ່ນໜ້າທີ່ທັງແມ່ນຄວາມຮັບຜິດຊອບ, ແມ່ນຄວາມເປັນກຽດຂອງສະມາຊິກແຕ່ລະຄົນ, ເຖິງວ່າຈະເຂົ້າຮ່ວມການແຂ່ງຂັນໃນສະພາບເງື່ອນໄຂຄືແນວໃດກໍຕ້ອງກຳນົດວ່າ, ການແຂ່ງຂັນແມ່ນເພື່ອກຽດສັກສີຂອງປະເທດຊາດ, ກອງທັບ.
ທ່ານພົນຕີ ຫວຽນເຕິນເກືອງ ເນັ້ນໜັກວ່າ ບັນດາທີມຊາດຕ້ອງປະຕິບັດລະບຽບວິໄນຂອງກອງທັບ, ກົດໝາຍຂອງລັດຫວຽດນາມ ກໍຄືກົດໝາຍຂອງບັນດາປະເທດເຈົ້າພາບຈັດງານແຂ່ງຂັນໃນທຸກບ່ອນ, ທຸກເວລາຢ່າງເຂັ້ມງວດ; ເຄົາລົບຮີບຄອງປະເພນີຂອງປະເທດເຈົ້າພາບ, ຮັກສາການພົວພັນສາກົນກັບກອງທັບບັນດາປະເທດເຂົ້າຮ່ວມເປັນຢ່າງດີ, ຮັບປະກັນຄວາມປອດໄພທຸກດ້ານໃນວິວັດການເຄື່ອນທີ່ ແລະແຂ່ງຂັນຢ່າງເດັດຂາດ.
ໂອກາດນີ້, ທ່ານພົນຕີ ຫງວຽນເຕິນເກືອງ ອວຍພອນຄະນະກອງທັບປະຊາຊົນຫວຽດນາມ ເດີນທາງດ້ວຍຄວາມສະຫວັດດີພາບ, ມີສຸຂະພາບເຂັ້ມແຂງ, ມີຄວາມສາມັກຄີ, ແຂ່ງຂັນດ້ວຍຄວາມເຊື່ອໝັ້ນຕົນເອງ ແລະໄດ້ຮັບຜົນງານສູງສຸດທີ່ງານແຂ່ງຂັນປີນີ້.
ໂດຍ: ໄຊຊະນະ