ຍູ້ແຮງການຮ່ວມມືດ້ານປ້ອງກັນຊາດລະຫວ່າງຫວຽດນາມ ແລະສິງກະໂປ
ກປ.ອອນໄລ - ຕອນບ່າຍວັນທີ 17 ມິຖຸນາ, ຢູ່ນະຄອນໂຮ່ຈີມິນ ໄດ້ດໍາເນີນການເຈລະຈານະໂຍບາຍດ້ານປ້ອງກັນຊາດຫວຽດນາມ - ສິງກະໂປ ຄັ້ງທີ 10. ທ່ານພົນໂທ ຫງວຽນຈີ໊ວີ້ງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຄະນະຫວຽດນາມ ແລະທ່ານ Chan Yeng Kit, ເລຂາຜູ້ປະຈໍາການກະຊວງປ້ອງກັນປະເທດສິງກະໂປ ເປັນປະທານຮ່ວມການເຈລະຈາ.
ທີ່ການເຈລະຈາ, ສອງຝ່າຍພ້ອມກັນແລກປ່ຽນສະພາບຄວາມໝັ້ນຄົງຢູ່ພາກພື້ນອາຊີ-ປາຊີຟິກ; ວິວັດທະນາການຮ່ວມມືທີ່ກອງປະຊຸມ ລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ (ADMM) ແລະກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນເປີດກວ້າງ (ADMM+); ຕີລາຄາໝາກຜົນການຮ່ວມມືດ້ານປ້ອງກັນຊາດ ພາຍຫຼັງການເຈລະຈານະໂຍບາຍດ້ານປ້ອງກັນຊາດ ຫວຽດນາມ-ສິງກະໂປ ຄັ້ງທີ 9 ແລະເຫັນດີເປັນເອກະພາບຕໍ່ທິດທາງການຮ່ວມມືໃນໄລຍະຈະມາເຖິງ.
ສອງຝ່າຍ ຕີລາຄາສູງບັນດາໝາກຜົນທີ່ບັນລຸໄດ້ໃນການຮ່ວມມືດ້ານປ້ອງກັນຊາດລະຫວ່າງສອງປະເທດໃນໄລຍະຜ່ານມາ, ພົ້ນເດັ່ນແມ່ນບັນດາຂົງເຂດ: ການແລກປ່ຽນຄະນະຜູ້ແທນ, ການບໍາລຸງສ້າງ, ການພົບປະແລກປ່ຽນນາຍທະຫານໜຸ່ມ, ການຮ່ວມມືທະຫານເຮືອ, ທະຫານອາກາດ, ການແລກປ່ຽນຂໍ້ມູນຂ່າວສານ, ເສນາຮັກ, ແລະການສົມທົບກັນທີ່ບັນດາເວທີປາໄສຫຼາຍຝ່າຍ ເຊິ່ງສອງຝ່າຍພ້ອມກັນເປັນສະມາຊິກ. ໃນນັ້ນ, ສຸມໃສ່ຊຸກຍູ້ການຮ່ວມມືບໍາລຸງສ້າງ, ເປັນຕົ້ນແມ່ນກ່ຽວກັບພາສາ ແລະການພົວພັນກັບສາກົນ; ການຮ່ວມມືກ່ຽວກັບເສນາຮັກ, ໃນນັ້ນມີການແບ່ງປັນບົດຮຽນປິ່ນປົວພະຍາດ; ການຮ່ວມມືລະຫວ່າງບັນດາເຫຼົ່າທັບ, ເຫຼົ່າຮົບ.
|
|
ທ່ານພົນໂທ ຫງວຽນຈີ໊ວີ້ງ ແລະທ່ານ Chan Yeng Kit ລົງນາມໃນແຜນການຮ່ວມມື. ພາບ: ມິງເງິນ. |
ດ້ວຍຄວາມປາດຖະໜາຢາກເພີ່ມທະວີການຮ່ວມມືດ້ານປ້ອງກັນຊາດ ສືບຕໍ່ພັດທະນາຮອບດ້ານ, ແທດຈິງໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບສົມທົບກັນ ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ, ເປັນຕົ້ນແມ່ນໃນປີ 2020 ເມື່ອຫວຽດນາມ ດໍາລົງຕໍາແໜ່ງເປັນປະທານອາຊຽນ. ສິ້ນສຸດການເຈລະຈາ, ທ່ານພົນໂທ ຫງວຽນຈີ໊ວີ້ງ ແລະທ່ານ Chan Yeng Kit ໄດ້ລົງນາມໃນແຜນການຮ່ວມມື 3 ປີ (2019-2021) ລະຫວ່າງກະຊວງປ້ອງກັນປະເທດສອງປະເທດ.
ໂດຍ: ທູຈາງ