ຄະນະຜູ້ແທນທະຫານເຮືອເຂດ 5 ຢ້ຽມຢາມທະຫານເຮືອແຫ່ງລາຊະອານາຈັກ ໄທ ເຂດ 1

ທີ່ການຕ້ອນຮັບ, ທ່ານພົນໂທ Chalermchai Suankaew, ຜູ້ບັນຊາການທະຫານເຮືອແຫ່ງລາຊະອານາຈັກໄທ ເຂດ 1 ໄດ້ສະແດງຄວາມປິຕິຊົມຊື່ນທີ່ໄດ້ຕ້ອນຮັບຄະນະຜູ້ແທນທະຫານເຮືອປະຊາຊົນຫວຽດນາມ ເຂດ 5 ມາຢ້ຽມຢາມ ແລະສົ່ງຄໍາຢ້ືຢາມຖາມຂ່າວ, ແບ່ງປັນຄວາມເສຍຫາຍຂອງປະຊາຊົນຫວຽດນາມ ໃນຄັ້ງນໍ້າຖ້ວມປະຫວັດສາດທີ່ຜ່ານມາ.

ພິທີຕ້ອນຮັບຄະນະປະຕິບັດງານຂອງທະຫານເຮືອປະຊາຊົນຫວຽດນາມ ເຂດ 5 ທີ່ທ່າກໍາປັ່ນ Chuk Samet (ປະເທດໄທ). ພາບ: ເຈິ່ນກຽນ

ທ່ານພົນໂທ Chalermchai Suankaew ເນັ້ນໜັກວ່າ: ໃນໄລຍະຜ່ານມາ, ທະຫານເຮືອແຫ່ງລາຊະອານາຈັກ ໄທ ເຂດ 1 ແລະທະຫານເຮືອປະຊາຊົນຫວຽດນາມ ເຂດ 5 ໄດ້ສົມທົບກັນຢ່າງມີປະສິດທິຜົນກົດລະບຽບການລາດຕະເວນຮ່ວມ; ຮັກສາດີຊ່ອງທາງຕິດຕໍ່ສື່ສານເປັນຢ່າງດີ, ໂດຍສະເພາະແມ່ນສາຍໂທດ່ວນ; ແລກປ່ຽນ, ແກ້ໄຂເປັນຢ່າງດີບັນດາບັນຫາທີ່ເກີດຂຶ້ນຢູ່ເຂດທະເລຕິດກັບກັນຢ່າງທັນການ.

ຜູ້ບັນຊາການທະຫານເຮືອເຂດ 1 ເຊື່ອໃຈວ່າ ບົນພື້ນຖານການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ, ການຢ້ຽມຢາມຂອງຄະນະປະຕິບັດງານທະຫານເຮືອປະຊາຊົນຫວຽດນາມ ເຂດ 5 ຈະປະກອບສ່ວນເຂົ້າໃນການເພີ່ມທະວີຄວາມໄວ້ເນື້ອເຊື່ອໃຈ ແລະຊຸກຍູ້ການຮ່ວມມືແທດຈິງລະຫວ່າງທະຫານເຮືອປະຊາຊົນຫວຽດນາມ ແລະທະຫານເຮືອລາຊະອານາຈັກໄທ.

ຄະນະປະຕິບັດງານທະຫານເຮືອປະຊາຊົນຫວຽດນາມ ເຂດ 5 ເຂົ້າຢ້ຽມຂໍ່ານັບກອງບັນຊາການທະຫານເຮືອແຫ່ງ ລາຊະອານາຈັກ ໄທ ເຂດ 1. ພາບ: ເຈິ່ນກຽນ

ຜູ້ແທນຖ່າຍຮູບເປັນທີ່ລະນຶກ. ພາບ: ເຈິ່ນກຽນ

ຕາງໜ້າຄະນະປະຕິບັດງານ, ທ່ານພັນເອກພິເສດ ລູກດຶກຕຽນ ໄດ້ສະແດງຄວາມຂອບໃຈຕໍ່ກອງບັນຊາການທະຫານເຮືອແຫ່ງ ລາຊະອານາຈັກ ໄທ ເຂດ 1 ທີ່ໄດ້ຕ້ອນຮັບຢ່າງອົບອຸ່ນ; ປາດຖະໜາວ່າໃນໄລຍະຈະມາເຖິງ, ສອງຝ່າຍຈະສືບຕໍ່ເປີດກວ້າງການເຄື່ອນໄຫວພົບປະແລກປ່ຽນ ແລະແລກປ່ຽນປະສົບການ; ແຈ້ງໃຫ້ຊາບຢ່າງທັນການ ແລະແກ້ໄຂເຫດການທີ່ເກີດຂຶ້ນທາງທະເລຢ່າງກົມກຽວບົນຈິດໃຈຮ່ວມມື ແລະມິດຕະພາບ.

ທ່ານພັນເອກພິເສດ ລູກດຶກຕຽນ ສະເໜີໃຫ້ສອງຝ່າຍສົມທົບກັນມີປະສິດທິຜົນໃນການລາດຕະເວນຮ່ວມ, ປະສານສົມທົບກັນໂຄສະນາ, ປຸກລະດົມຊາວປະມົງສອງປະເທດປະຕິບັດບັນດາລະບຽບການກ່ຽວກັບການຂຸດຄົ້ນສິນໃນທະເລ, ປະກອບສ່ວນຮັກສາຄວາມໝັ້ນຄົງ, ຄວາມເປັນລະບຽບຮຽບຮ້ອຍ, ສັນຕິພາບ, ສະຖຽນລະພາບບົນທະເລຕິດກັບຊາຍແດນຫວຽດນາມ-ໄທ ຢ່າງເຂັ້ມງວດ.

ໃນລະຫວ່າງການຢ້ຽມຢາມ, ຄະນະປະຕິບັດງານທະຫານເຮືອປະຊາຊົນຫວຽດນາມ ເຂດ 5 ໄດ້ເຂົ້າຢ້ຽມຂ່ຳນັບຜູ້ບັນຊາການຖານທັບທະຫານເຮືອ Sattahip; ຢ້ຽມຊົມບາງທັດສະນີຍະພາບ, ເຂດປູຊະນີຍະສະຖານຂອງທ້ອງຖິ່ນ.

ເນື່ອງໃນໂອກາດນີ້, ທະຫານເຮືອສອງປະເທດຫວຽດນາມ ແລະໄທ ຈັດຕັ້ງຢ້ຽມຊົມກໍາປ່ັນຂອງກັນ ແລະແຂ່ງຂັນກິລາອີກດ້ວຍ.

ໂດຍ:​ ໄຊນີດາ