ການພົວພັນຮ່ວມມືດ້ານປ້ອງກັນຊາດ ຫວຽດນາມ - ບຣູໄນ ນັບມື້ນັບພັດທະນາຢ່າງແທດຈິງ ແລະມີປະສິດທິຜົນ
ກປ.ອອນໄລ - ຕອນເຊົ້າວັນທີ 17 ກັນຍາ, ຢູ່ສໍານັກງານກະຊວງປ້ອງກັນປະເທດຫວຽດນາມ, ທ່ານພົນເອກ ຫງວຽນເຕິນເກືອງ, ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຫົວໜ້າກົມໃຫຍ່ເສນາທິການ ກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ເປັນປະທານພິທີຕ້ອນຮັບທ່ານພົນຈັດຕະວາ Dato Paduka Seri Haji Muhammad Haszaimi Bin Bol Hassan, ຜູ້ບັນຊາການກອງທັບ ແຫ່ງລາຊະອານາຈັກ ບຣູໄນ ມາຢ້ຽມຢາມຫວຽດນາມ ຢ່າງເປັນທາງການ.
ພາຍຫຼັງພິທີຕ້ອນຮັບ, ທ່ານພົນເອກ ຫງວຽນເຕິນເກືອງ ແລະທ່ານພົນຈັດຕະວາ Dato Paduka Seri Haji Muhammad Haszaimi Bin Bol Hassan ໄດ້ດໍາເນີນການພົບປະສອງຝ່າຍ.
    |
 |
|
ທ່ານພົນເອກ ຫງວຽນເຕິນເກືອງ ຕ້ອນຮັບທ່ານພົນຈັດຕະວາ Dato Paduka Seri Haji Muhammad Haszaimi Bin Bol Hassan. ພາບ: qdnd.vn |
ທ່ານພົນເອກ ຫງວຽນເຕິນເກືອງ ສະແດງຄວາມປິຕິຊົມຊື່ນຕໍ່ຜົນການຮ່ວມມືດ້ານປ້ອງກັນຊາດສອງຝ່າຍ ໃນໄລຍະຜ່ານມາ, ພົ້ນເດັ່ນແມ່ນໃນບັນດາຂົງເຂດ ຄື: ການແລກປ່ຽນຄະນະຜູ້ແທນທຸກຂັ້ນ; ກົນໄກທາບທາມຄໍາເຫັນລະຫວ່າງກໍາລັງທະຫານເຮືອ ແລະທະຫານອາກາດສອງປະເທດ; ການສົ່ງກຳປັ່ນໄປຢ້ຽມຢາມ, ພົບປະແລກປ່ຽນ, ແລກປ່ຽນວິຊາສະເພາະ; ບໍາລຸງສ້າງ; ການທາບທາມຄໍາເຫັນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ, ເປັນຕົ້ນແມ່ນບັນດາກົນໄກທີ່ອາຊຽນ ນໍາພາ ແລະບັນດາເຫດການສາກົນ ໂດຍແຕ່ລະຝ່າຍຈັດຕັ້ງ.
ສະແດງຄວາມເຫັນດີເປັນເອກະພາບສູງກັບບັນດາເນື້ອໃນ ທີ່ທ່ານພົນເອກ ຫງວຽນເຕິນເກືອງ ໄດ້ຍົກອອກໃນການພົບປະສອງຝ່າຍ, ທ່ານພົນຈັດຕະວາ Dato Paduka Seri Haji Muhammad Haszaimi Bin Bol Hassan ຖືວ່າ ສອງຝ່າຍສາມາດຄົ້ນຄວ້າພັດທະນາບັນດາຂົງເຂດຮ່ວມມືໃໝ່ຕື່ມອີກ ເຊິ່ງ ສອງຝ່າຍມີຄວາມສາມາດບົ່ມຊ້ອນ ແລະຄວາມຕ້ອງການ, ຜ່ານນັ້ນປະກອບສ່ວນຊຸກຍູ້ການພົວພັນຮ່ວມມືດ້ານປ້ອງກັນຊາດສອງຝ່າຍ ໃນໄລຍະຈະມາເຖິງ.
|
|
 |
|
ທ່ານພົນເອກ ຫງວຽນເຕິນເກືອງ ແລະທ່ານພົນຈັດຕະວາ Dato Paduka Seri Haji Muhammad Haszaimi Bin Bol Hassan. ພາບ: qdnd.vn |
ທີ່ການພົບປະ, ສອງຝ່າຍໄດ້ແລກປ່ຽນກ່ຽວກັບສະພາບການຂອງໂລກ, ພາກພື້ນ ແລະບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ. ທ່ານພົນເອກ ຫງວຽນເຕິນເກືອງ ເນັ້ນໜັກເຖິງບົດບາດສຳຄັນຂອງອາຊຽນ ໃນການສ້າງຕັ້ງ ແລະຮັກສາໂຄງສ້າງຄວາມໝັ້ນຄົງພາກພື້ນ, ຊຸກຍູ້ການຮ່ວມມືອັນແທດຈິງລະຫວ່າງບັນດາປະເທດສະມາຊິກ ກໍ່ຄືລະຫວ່າງອາຊຽນ ກັບບັນດາຄູ່ຮ່ວມມື; ພ້ອມທັງ, ຕີລາຄາສູງເອກະສານຍຸດທະສາດ “ADMM ແລະ ADMM+ ກຽມພ້ອມໃຫ້ແກ່ອະນາຄົດ” ໂດຍ ບຣູໄນ ແລະ ສິງກະໂປ ຮຽບຮຽງ, ໄດ້ຮັບການຮັບຮອງເອົາຈາກກອງປະຊຸມ ADMM ໃນປີ 2024 ແລະຂໍ້ລິເລີ່ມ “ຄວາມໝັ້ນຄົງພື້ນຖານໂຄງລ່າງທີ່ສໍາຄັນຍິ່ງໃຕ້ນ້ຳ” ໂດຍ ບຣູໄນ, ສິງກະໂປ ແລະໂທ ຮ່ວມກັນສະເໜີໃນປີ 2025.
ກ່ຽວກັບສະພາບການຢູ່ທະເລຕາເວັນອອກ, ຫວຽດນາມ ປາດຖະໜາວ່າ ບຣູໄນ ຈະສືບຕໍ່ສົມທົບກັນຊຸກຍູ້ຫຼັກໝັ້ນຂອງອາຊຽນ ແມ່ນແກ້ໄຂການແກ່ງແຍ້ງ, ຄວາມບໍ່ລົງຮອຍກັນໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ (UNCLOS) 1982; ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະມີປະສິດທິຜົນ ແລະສິ້ນສຸດການເຈລະຈາ ແລະລົງນາມກົດແຫ່ງການປະພຶດຢູ່ທະເລຕາເວັນອອກ (COC) ໂດຍໄວ ຢ່າງມີປະສິດທິຜົນ ແລະສອດຄ່ອງກັບກົດໝາຍສາກົນ.
ໂດຍ: ຈາງຫງວຽນ