ມອບສົ່ງອັດຖິທະຫານອາເມລິກາ ທີ່ຫາຍສາບສູນໃນປາງສົງຄາມ ຢູ່ ຫວຽດນາມ

ພິທີເຊັນບົດບັນທຶກມອບສົ່ງອັດຖິທະຫານອາເມລິກາ ຄັ້ງທີ 169. ພາບ: qdnd.vn

ພິທີມີການເຂົ້າຮ່ວມຂອງຄະນະອໍານວຍການອົງການຫວຽດນາມ ຊອກຫາຜູ້ຫາຍສາບສູນ (VNOSMP), ຜູ້ຕາງໜ້າບັນດາກົມກອງຂຶ້ນກັບກະຊວງປ້ອງກັນປະເທດ, ກະຊວງການຕ່າງປະເທດ ແລະກະຊວງຕໍາຫຼວດ. ຝ່າຍອາເມລິກາ ມີທ່ານ Marc Knapper ເອກອັກຄະລັດຖະທູດ ອາເມລິກາ ປະຈໍາຫວຽດນາມ, ຜູ້ຕາງໜ້າຫ້ອງການ MIA ອາເມລິກາ ຢູ່ຮ່າໂນ້ຍ, ນັກຮົບເກົ່າອາເມລິກາ ຈໍານວນໜຶ່ງ ແລະນັກວິຊາການ MIA ອາເມລິກາ ເຂົ້າຮ່ວມການຊອກຫາຮ່ວມ ຄັ້ງທີ 158 (ເດືອນມີນາ, ເມສາ ປີ 2025).

ພິທີມອບສົ່ງອັດຖິທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ ຫວຽດນາມ (MIA) ຄັ້ງທີ 169 ຈັດຂຶ້ນຢູ່ນະຄອນດ່ານັ້ງ. ພາບ: qdnd.vn

ທີ່ພິທີ, ຫວຽດນາມ ໄດ້ມອບໃຫ້ຝ່າຍອາເມລິກາ ຈໍານວນ 4 ອັດຖິ. ນີ້ແມ່ນໝາກຜົນຂອງການຊອກຫາຮ່ວມຫວ່າງມໍ່ໆນີ້ລະຫວ່າງບັນດາໜ່ວຍງານຊອກຫາຫວຽດນາມ-ອາເມລິກາ ທີ່ບັນດາແຂວງ, ນະຄອນ: ເຫວ້, ກວ໋າງຈິ ແລະກອນຕຸມ. ອັດຖິຈໍານວນນີ້ ໂດຍບັນດານັກຊ່ຽວຊານນິຕິເວດສາດຂອງຫວຽດນາມ ແລະ ອາເມລິກາ ໄດ້ດໍາເນີນການສັນລະສູດ ແລະສະຫຼຸບວ່າອາດຈະກ່ຽວຂ້ອງເຖິງບັນດາກໍລະນີທະຫານອາເມລິກາ ຫາຍສາບສູນໃນປາງສົງຄາມ ຢູ່ຫວຽດນາມ ແລະຈະໄດ້ເຄື່ອນຍ້າຍໄປຫ້ອງທົດລອງນິຕິເວດສາດ ຢູ່ Hawaii ເພື່ອໄຈ້ແຍກ, ເຮັດແຈ້ງຕື່ມອີກ.

ການເຄື່ອນໄຫວຮ່ວມມືມະນຸດສະທໍາຊອກຫາ ແລະກວດກາທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ຫວຽດນາມ ໂດຍສອງປະເທດ ໄດ້ຜັນຂະຫຍາຍພາຍຫຼັງສັນຍາປາຣີ ໄດ້ຮັບການລົງນາມ ໃນປີ 1973, ມາຮອດປັດຈຸບັນ ບັນລຸໄດ້ໝາກຜົນຕັ້ງໜ້າຫຼາຍຢ່າງ, ຊ່ວຍໃຫ້ອາເມລິກາ ກໍານົດໄດ້ຊື່ ແລະນາມສະກຸນ ແລະມອບສົ່ງໃຫ້ຄອບຄົວໄດ້ 735 ກໍລະນີ ໃນຈໍານວນທັງໝົດ 1.973 ກໍລະນີ ທະຫານອາເມລິກາ ຫາຍສາບສູນໃນປາງສົງຄາມຢູ່ຫວຽດນາມ.

ໂດຍ: ກວຽດເຕິມ