ພວກຂ້າພະເຈົ້າ ພ້ອມກັບຄະນະປະຕິບັດງານຂອງກອງພົນ 968 ໂດຍທ່ານພັນເອກພິເສດ ຫງວຽນແທັງຮຸ່ງ, ເລຂາພັກ, ຫົວໜ້າການເມືອງ ເປັນຫົວໜ້າຄະນະ ໄດ້ລົງກວດກາວຽກງານກະກຽມຕ້ອນຮັບບຸນເຕັດຢູ່ບັນດາກົມກອງທີ່ຂຶ້ນກັບກອງພັນໃຫຍ່ 19. ຜ່ານການກວດກາ ສະແດງໃຫ້ເຫັນວ່າ ມາຮອດປັດຈຸບັນ ບັນດາກົມກອງໄດ້ຈັດຕັ້ງຜັນຂະຫຍາຍວຽກງານກະກຽມຕ້ອນຮັບບຸນເຕັດດ້ວຍຫຼາຍກິດຈະກຳທີ່ແທດຈິງ.
ພົນທະຫານຊັ້ນໜຶ່ງ ຫງວຽນວັນຖັ໊ງ, ໝວດທະຫານ 1, ກອງຮ້ອຍ 5, ກອງພັນ 5, ກອງພັນໃຫຍ່ 19 ໄດ້ແບ່ງປັນວ່າ: “ໂດຍໄດ້ຮັບການມອບໜ້າທີ່ສ້າງຮູບຮ່າງໂຕງູ, ຂ້າພະເຈົ້າທັງດີໃຈ ແລະຄິດກ່ຽວກັບວິທີການສ້າງຮູບຮ່າງໃຫ້ເໝາະສົມ, ມີລັກສະນະສິລະປະ. ນີ້ກໍ່ແມ່ນໂອກາດ ເພື່ອໃຫ້ຂ້າພະເຈົ້າໄດ້ເສີມຂະຫຍາຍສີມືແຮງງານຂອງຕົນ ແລະຂ້າພະເຈົ້າຈະມານະພະຍາຍາມສ້າງຮູບຮ່າງທີ່ສວຍງາມ, ສ້າງຈຸດພົ້ນເດັ່ນໃຫ້ແກ່ກົມກອງໃນບຸນເຕັດ”.
    |
 |
|
ພະນັກງານ, ນັກຮົບບັນດາອົງການ, ກົມກອງ ຂຶ້ນກັບກອງພົນ 968 ປະຕິບັດວຽກງານກະກຽມທຸກດ້ານ ເພື່ອຕ້ອນຮັບບຸນເຕັດໃຫ້ມີຄວາມເບີກບານມ່ວນຊຶ່ນ. ພາບ: qdnd.vn |
ໂດຍຮູ້ວ່າ, ເພື່ອປະດັບປະດາລະດູບານໃໝ່ຢູ່ກົມກອງ, ແຕ່ຫຼາຍເດືອນກ່ອນນີ້, ບັນດາກົມກອງຂຶ້ນກັບກອງພັນໃຫຍ່ 19 ໄດ້ເປັນເຈົ້າການຊື້ແນວພັນ ແລະປູກດອກໄມ້ຫຼາຍຊະນິດ, ມາຮອດປະຈຸບັນ, ດອກໄມ້ທຸກຊະນິດລ້ວນແຕ່ເຕີບໂຕດີ ແລະເບີກກົງກັບໂອກາດບຸນເຕັດ.
ພົນທະຫານຊັ້ນໜຶ່ງ ຮີ່ງເທ໊ທ້ວນ, ໝວດທະຫານ 2, ກອງຮ້ອຍ 15, ກອງພັນໃຫຍ່ 19 ແບ່ງປັນວ່າ: “ນີ້ແມ່ນຄັ້ງທຳອິດທີ່ຂ້າພະເຈົ້າໄດ້ຕ້ອນຮັບບຸນເຕັດຢູ່ຫ່າງໄກຈາກບ້ານເກີດ. ຂ້າພະເຈົ້າດີໃຈຫຼາຍທີ່ໄດ້ເຂົ້າຮ່ວມກິດຈະກຳເຄື່ອນໄຫວກະກຽມຕ້ອນຮັບລະດູບານໃໝ່, ຕ້ອນຮັບບຸນເຕັດຢູ່ກົມກອງ. ຂ້າພະເຈົ້າມີຄວາມກະຕືລືລົ້ນຕ້ອນຮັບບຸນເຕັດ ໃນກອງທັບພ້ອມກັບເພື່ອນຮ່ວມກົມກອງ".
ຕາມການສັງເກດຂອງພວກຂ້າພະເຈົ້າ, ບັນດາກິດຈະກຳເຄື່ອນໄຫວອື່ນໆຄື: ການປັບປຸງທັດສະນີຍະພາບຄ້າຍທະຫານ, ແຕ້ມຮູບ, ຈັດໂຄມໄຟ, ຂຽນຕົວໜັງສືຈີນເພື່ອປະດັບປະດາແທ່ນບູຊາ... ໄດ້ຮັບການຜັນຂະຫຍາຍຢ່າງຕັ້ງໜ້າ ແລະງາມຕາໂດຍບັນດາພະນັກງານ, ນັກຮົບໃນກົມກອງ. ນອກຈາກການເຄື່ອນໄຫວດັ່ງກ່າວ, ບັນດາກົມກອງຍັງໄດ້ຕັ້ງໜ້າເປັນເຈົ້າການໃນວຽກງານເພີ່ມພູນຜະລິດຜົນ ແລະ ລ້ຽງສັດເພື່ອຮັບປະກັນສະບຽງອາຫານ, ທັນຍາຫານ ທີ່ປອດໄພເພື່ອໃຫ້ທະຫານນຳໃຊ້ໃນໂອກາດບຸນເຕັດ.
|
|
 |
|
ເປັນເຈົ້າການເພີ່ມພູນຜະລິດຜົນ, ລ້ຽງສັດ ເພື່ອຮັບປະກັນແຫຼ່ງສະບຽງອາຫານ, ທັນຍາຫານທີ່ປອດໄພ ໃຫ້ແກ່ທະຫານນໍາໃຊ້ໃນໂອກາດບຸນເຕັດ. ພາບ: qdnd.vn |
ແບ່ງປັນຕື່ມອີກກ່ຽວກັບກິດຈະກຳເຄື່ອນໄຫວໃນໂອກາດບຸນເຕັດ, ທ່ານ ພັນເອກພິເສດ ຫງວຽນແທັງຮຸ່ງ ໃຫ້ຮູ້ວ່າ: ໃນໂອກາດບຸນເຕັດ, ຄຽງຂ້າງໜ້າທີ່ປະຈໍາການກຽມພ້ອມສູ້ຮົບ, ບັນດາອົງການ, ກົມກອງໃນທົ່ວກອງພົນ ຈະຈັດຕັ້ງການເຄື່ອນໄຫວຫຼາຍຢ່າງຄື: ລາຍການ “ລະດູບານໃໝ່ທີ່ອົບອຸ່ນ, ບຸນເຕັດແຫ່ງຄວາມຮັກແພງ, ເຂົ້າຕົ້ມໃຫ້ຄົນທຸກຍາກ"; ມອບຂອງຂວັນໃຫ້ພະນັກງານ, ນັກຮົບຢູ່ບັນດາກົມກອງທີ່ປະສົບກັບຄວາມຫຍຸ້ງຍາກ, ບັນດາຄອບຄົວນະໂຍບາຍ, ຜູ້ທີ່ມີຄຸນງາມຄວາມດີຕໍ່ການປະຕິວັດຢູ່ບໍລິເວນ; ຈັດຕັ້ງການແຂ່ງຂັນຫໍ່ເຂົ້າຕົ້ມ, ຈັດດອກໄມ້, ຈັດການລະຫຼີ້ນພື້ນເມືອງ, ແລກປ່ຽນວັດທະນະທຳ, ສິລະປະ, ກິລາກາຍຍະກໍາ... ຜ່ານນັ້ນ ສ້າງບັນຍາກາດທີ່ຟົດຟື້ນມ່ວນຊື່ນ ເພື່ອໃຫ້ທະຫານມີຄວາມອຸ່ນອ່ຽນໃຈປະຕິບັດໜ້າທີ່, ຕ້ອນຮັບບຸນເຕັດຢ່າງເບີກບານມ່ວນຊື່ນ, ປອດໃສເຂັ້ມແຂງ, ປອດໄພ, ປະຢັດ ແລະກຽມພ້ອມສູ້ຮົບສູງ.
ລະດູບານໃໝ່ວຽນມາ, ເຖິງວ່າຕ້ອນຮັບບຸນເຕັດຢູ່ຫ່າງໄກຈາກບ້ານ ແລະ ຍາດຕິພີ່ນ້ອງກໍ່ຕາມ, ແຕ່ດ້ວຍຈິດໃຈເປັນເຈົ້າການ, ກະກຽມທຸກດ້ານຢ່າງຮອບຄອບຖີ່ຖ້ວນ, ພ້ອມກັບຄວາມເອົາໃຈໃສ່ ແລະ ການເບິ່ງແຍງດູຈາກການນຳ, ຜູ້ບັນຊາການກອງພົນ 968 ພ້ອມດ້ວຍຄະນະພັກ-ຜູ້ບັນຊາການທຸກຂັ້ນ ຈະປະກອບສ່ວນສ້າງກຳລັງໜູນເພື່ອໃຫ້ພະນັກງານ, ນັກຮົບບັນດາອົງການ, ກົມກອງມີຄວາມອຸ່ນອ່ຽນໃຈຕ້ອນຮັບລະດູບານໃໝ່, ບຸນເຕັດ, ຍົກສູງຈິດໃຈກຽມພ້ອມສູ້ຮົບ, ປະຕິບັດທຸກໜ້າທີ່ທີ່ໄດ້ຮັບມອບໝາຍໃຫ້ເປັນຢ່າງດີ.
ໂດຍ: ທູຈາງ