ທ່ານພັນເອກ Shatrujeet Signh ກັບຕັນກໍາປັ່ນ ICGS SAKSHAM, ກໍາລັງປ້ອງກັນຝັ່ງທະເລອິນເດຍ ເປັນປະທານພິທີຕ້ອນຮັບຄະນະປະຕິບັດງານຕໍາຫຼວດທະເລຫວຽດນາມ. ພາຍຫຼັງການເດີນທາງຢູ່ທະເລກວ່າ 2.700 ໄມທະເລ ເປັນເວລາ 12 ວັນ ໃນເງື່ອນໄຂສະພາບອາກາດສັບສົນ, ກໍາປັ່ນຕໍາຫຼວດທະເລ 8005 ພ້ອມດ້ວຍຄະນະ ໄດ້ໄປຮອດນະຄອນ Kochi ຖືກຕາມແຜນການ.
    |
 |
|
ທ່ານພັນເອກ Shatrujeet Signh ກັບຕັນ ກໍາປັ່ນ ICGS SAKSHAM, ກໍາລັງປ້ອງກັນຝັ່ງທະເລອິນເດຍ ກ່າວຄໍາເຫັນທີ່ພິທີຕ້ອນຮັບກໍາປັ່ນຕໍາຫຼວດທະເລ 8005. |
ກ່າວຄໍາເຫັນທີ່ພິທີ, ທ່ານພັນເອກ Shatrujeet Signh ສະແດງຄວາມຍິນດີຕ້ອນຮັບ ແລະຊົມເຊີຍທ່ານພັນເອກພິເສດ ຫງວຽນມິງແຄ໋ງ ພ້ອມຄະນະມາຢ້ຽມຢາມ; ພ້ອມທັງຫວັງວ່າການຢ້ຽມຢາມ, ພົບປະແລກປ່ຽນຄັ້ງນີ້ ຈະສ້າງຄວາມປະທັບໃຈທີ່ດີງາມໃຫ້ພະນັກງານ, ນັກຮົບຕໍາຫຼວດທະເລຫວຽດນາມ ກ່ຽວກັບປະເທດອິນເດຍ ທີ່ຮັກແຂກແພງຄົນ ແລະເຕັມໄປດ້ວຍສີສັນວັດທະນະທໍາ.
|
|
 |
|
ທ່ານພັນເອກພິເສດ ຫງວຽນມິງແຄ໋ງ ຮອງຜູ້ບັນຊາການ, ຫົວໜ້າເສນາທິການກອງບັນຊາການຕໍາຫຼວດທະເລ ເຂດ 3 ກ່າວຄໍາເຫັນທີ່ພິທີຕ້ອນຮັບກໍາປັ່ນຕໍາຫຼວດທະເລ 8005. |
ຕາງໜ້າຄະນະປະຕິບັດງານຕໍາຫຼວດທະເລຫວຽດນາມ, ທ່ານພັນເອກພິເສດ ຫງວຽນມິງແຄ໋ງ ສະແດງຄວາມປິຕິຊົມຊື່ນ ແລະພາກພູມໃຈເມື່ອໄດ້ມາຢ້ຽມຢາມ, ພົບປະແລກປ່ຽນກັບກໍາລັງປ້ອງກັນຝັ່ງທະເລອິນເດຍ. ສະຫາຍ ຫົວໜ້າຄະນະ ເນັ້ນໜັກວ່າ ນີ້ແມ່ນໂອກາດທີ່ດີເພື່ອໃຫ້ສອງຝ່າຍ ເພີ່ມທະວີຄວາມເຂົ້າໃຈ, ຮັດແໜ້ນສາຍພົວພັນມິດຕະພາບ, ການຮ່ວມມືຮອບດ້ານກວ່າອີກ, ຍົກສູງຄວາມສາມາດປະຕິບັດກົດໝາຍ ແລະຄວາມສາມາດສົມທົບກັນແກ້ໄຂກໍລະນີສຸກເສີນໃນທະເລ, ປະກອບສ່ວນຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນເຂດທະເລຢູ່ພາກພື້ນ.
|
|
 |
|
ຜູ້ແທນສອງຝ່າຍ ຖ່າຍຮູບເປັນທີ່ລະນຶກ. |
ຄາດວ່າ ໃນການຢ້ຽມຢາມ, ພົບປະແລກປ່ຽນ ແລະເຮັດວຽກຂອງຕໍາຫຼວດທະເລຫວຽດນາມ ຢູ່ນະຄອນ Kochi ຈະດໍາເນີນບັນດາການເຄື່ອນໄຫວ: ຢ້ຽມຢາມ, ເຂົ້າຢ້ຽມຂໍ່ານັບຜູ້ບັນຊາການ ເຂດ 4, ກໍາລັງປ້ອງກັນຝັ່ງທະເລອິນເດຍ; ຢ້ຽມຢາມສູນກູ້ຊີບ, ກູ້ໄພ ແລະສູນອົບຮົມຫັດແອບຂອງກໍາລັງປ້ອງກັນຝັ່ງທະເລອິນເດຍ; ແຂ່ງຂັນກິລາມິດຕະພາບ; ສົມທົບກັນຝຶກຊ້ອມຮ່ວມກ່ຽວກັບການຊອກຫາກູ້ໄພ, ຕ້ານ ແລະສະກັດກັ້ນອັກຄີໄພ ແລະຮັບມືກັບອຸບັດຕິເຫດນ້ຳມັນຮົ່ວໃນທະເລ...
ການເຄື່ອນໄຫວໄປຢ້ຽມຢາມ, ພົບປະແລກປ່ຽນ, ແບ່ງປັນບົດຮຽນກັບກໍາລັງປ້ອງກັນຝັ່ງທະເລອິນເດຍ ມີຄວາມໝາຍດ້ານການເມືອງຢ່າງເລິກເຊິ່ງ, ປະກອບສ່ວນປັບປຸງການພົວພັນມິດຕະພາບທີ່ເປັນມູນເຊື້ອ, ເພີ່ມທະວີການຮ່ວມມື, ຄວາມເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນແລະກັນລະຫວ່າງຕໍາຫຼວດທະເລຫວຽດນາມ ແລະກໍາລັງປ້ອງກັນຝັ່ງທະເລອິນເດຍ; ສ່ອງແສງຄໍາໝັ້ນສັນຍາຂອງສອງຝ່າຍໃນການກໍ່ສ້າງເຂດທະເລແຫ່ງຄວາມໝັ້ນຄົງ, ປອດໄພ, ສະຖຽນລະພາບ ແລະວັດທະນາຖາວອນ; ທັງແມ່ນໂອກາດ ເພື່ອໃຫ້ສອງຝ່າຍຕີລາຄາປະສິດທິຜົນຂອງບົດບັນທຶກຊ່ວຍຈໍາການຮ່ວມມືລະຫວ່າງສອງກໍາລັງທີ່ໄດ້ລົງນາມໃນປີ 2015, ຈາກນັ້ນເປີດກວ້າງຂົງເຂດຮ່ວມມືໃໝ່ໃນອະນາຄົດ.
|
|
 |
|
ທ່ານພັນເອກພິເສດ ຫງວຽນມິງແຄ໋ງ ເຂົ້າຢ້ຽມຂໍ່ານັບທ່ານພົນຈັດຕະວາ Dig N Ravi ຜູ້ບັນຊາການເຂດ 4, ກໍາລັງປ້ອງກັນຝັ່ງທະເລ ອິນເດຍ. |
ຕອນບ່າຍວັນດຽວກັນ, ທີ່ນະຄອນ Kochi (ອິນເດຍ), ຄະນະປະຕິບັດງານຕໍາຫຼວດທະເລຫວຽດນາມ ນໍາໂດຍ ທ່ານພັນເອກພິເສດ ຫງວຽນມິງແຄ໋ງ ຮອງຜູ້ບັນຊາການ, ຫົວໜ້າເສນາທິການ ຕໍາຫຼວດທະເລ ເຂດ 3 ໄດ້ເຂົ້າຢ້ຽມຂໍ່ານັບທ່ານພົນຈັດຕະວາ Dig N Ravi ຜູ້ບັນຊາການເຂດ 4, ກໍາລັງປ້ອງກັນຝັ່ງທະເລ ອິນເດຍ.
|
|
 |
|
ທ່ານພົນຈັດຕະວາ Dig N Ravi ແນະນໍາການເຄື່ອນໄຫວພົ້ນເດັ່ນຈໍານວນໜຶ່ງຂອກຳລັງປ້ອງກັນຝັ່ງທະເລອິນເດຍ ໃຫ້ຄະນະປະຕິບັດງານຕໍາຫຼວດ ທະເລຫວຽດນາມ ຮັບຊາບ. |
ໃນບັນຍາກາດທີ່ເຕັມໄປດ້ວຍໄມຕີຈິດມິດຕະພາບ, ສົມກຽດ, ທ່ານພົນຈັດຕະວາ Dig N Ravi ສະແດງຄວາມຍິນດີຕ້ອນຮັບ ແລະຊົມເຊີຍຄະນະປະຕິບັດງານຕໍາຫຼວດທະເລຫວຽດນາມ ມາຢ້ຽມຢາມ. ທ່ານພົນຈັດຕະວາ Dig N Ravi ຢັ້ງຢືນວ່າ ການມາຢ້ຽມຢາມອິນເດຍຂອງຄະນະ ໃນຄັ້ງນີ້ ແມ່ນພະຍານຫຼັກຖານໃຫ້ແກ່ນໍ້າໃຈມິດຕະພາບທີ່ນັບມື້ນັບໜັກແໜ້ນລະຫວ່າງສອງກໍາລັງ; ພິເສດແມ່ນໃນສະພາບການຄວາມໝັ້ນຄົງໃນການເດີນທະເລຢູ່ພາກພື້ນພວມປະເຊີນໜ້າກັບຫຼາຍບັນຫາທີ່ສັບສົນ, ການຢ້ຽມຢາມຈະເປີດໂອກາດທີ່ດີເພື່ອໃຫ້ສອງຝ່າຍເພີ່ມທະວີການຮ່ວມມື, ແບ່ງປັນບົດຮຽນ ແລະໜູນຊ່ວຍເຊິ່ງກັນ ແລະກັນໃນການຮັບປະກັນຄວາມໝັ້ນຄົງ, ຄວາມປອດໄພ ແລະປະຕິບັດກົດໝາຍໃນທະເລ.
ຂອບໃຈອາລົມຈິດ ແລະການຕ້ອນຮັບຢ່າງສົມກຽດຂອງກໍາລັງປ້ອງກັນຝັ່ງທະເລ ອິນເດຍ ກໍຄື ສ່ວນຕົວທ່ານພົນຈັດຕະວາ Dig N Ravi ທີ່ສະຫງວນໃຫ້ແກ່ຄະນະ, ທ່ານພັນເອກພິເສດ ຫງວຽນມິງແຄ໋ງ ໃຫ້ຮູ້ວ່າ ການຢ້ຽມຢາມບໍ່ພຽງ ແຕ່ແມ່ນໂອກາດ ເພື່ອໃຫ້ສອງກໍາລັງແລກປ່ຽນບົດຮຽນວິຊາສະເພາະ ເທົ່ານັ້ນ ຫາກຍັງແມ່ນໂອກາດ ເພື່ອໃຫ້ບັນດາສະມາຊິກໃນຄະນະ ເຂົ້າໃຈກວ່າກ່ຽວ ກັບວັດທະນະທໍາ, ຄົນອິນເດຍ ອີກດ້ວຍ.
|
|
 |
|
ພະນັກງານສູນກູ້ຊີບ, ກູ້ໄພ ເຂດ 4, ກໍາລັງປ້ອງກັນຝັ່ງທະເລອິນເດຍ ແລກປ່ຽນວິຊາສະເພາະກັບຄະນະປະຕິບັດງານຕໍາຫຼວດທະເລຫວຽດນາມ. |
|
|
 |
|
ຄະນະປະຕິບັດງານຕໍາຫຼວດທະເລຫວຽດນາມ ໄປທັດສະນະສຶກສາຢູ່ສູນອົບຮົມຫັດແອບເຂດ 4, ກໍາລັງປ້ອງກັນຝັ່ງທະເລອິນເດຍ. |
ສະຫາຍຫົວໜ້າຄະນະ ຫວັງວ່າຜ່ານການເຄື່ອນໄຫວຢ້ຽມຢາມ ແລະພົບປະແລກປ່ຽນຄັ້ງນີ້, ການພົວພັນມິດຕະພາບທີ່ເປັນມູນເຊື້ອລະຫວ່າງສອງກໍາລັງຈະນັບມື້ນັບໜັກແໜ້ນ, ປະກອບສ່ວນເພີ່ມພູນຄູນສ້າງ, ປັບປຸງ ແລະພັດທະນາການພົວພັນຮ່ວມມືອັນດີງາມທີ່ມີຢູ່ແລ້ວ, ສ້າງພື້ນຖານເພື່ອໃຫ້ສອງຝ່າຍເພີ່ມທະວີ ແລະເປີດກວ້າງບັນດາກົນໄກຮ່ວມມືໃນອະນາຄົດ ກວ່າອີກ. ພາຍຫຼັງການຕ້ອນຮັບ, ຄະນະປະຕິບັດງານຕໍາຫຼວດທະເລຫວຽດນາມ ໄດ້ຢ້ຽມຢາມສູນກູ້ໄພ, ກູ້ຊີບ ແລະສູນອົບຮົມຫັດແອບຂອງກໍາລັງປ້ອງກັນຝັ່ງ ທະເລອິນເດຍ.
ໂດຍ: ໄຊຊະນະ