ຄະນະພະນັກງານສື່ມວນຊົນ ສປປ ລາວ ຢ້ຽມຢາມ ແລະເຮັດວຽກກັບໜັງສືພິມກອງທັບປະຊາຊົນຫວຽດນາມ

ຕາງໜ້າຄະນະພັກ, ຄະນະບັນນາທິການ ແລະຖັນແຖວນັກຂ່າວໜັງສືພິມກອງທັບປະຊາຊົນ, ສະຫາຍພັນເອກພິເສດ ຫງວຽນຮົ່ງຫາຍ ຮອງຫົວໜ້າບັນນາທິການ ໄດ້ສະແດງຄວາມປິຕິຊົມຊື່ນເມື່ອໄດ້ຕ້ອນຮັບຄະນະພະນັກງານສື່ມວນຊົນລາວ, ອວຍພອນຄະນະໄດ້ຮັບຜົນງານສູງ, ໄດ້ຮັບຫຼາຍບົດຮຽນ, ປະສົບການທີ່ມີປະໂຫຍດ, ມີຄວາມປະທັບໃຈ, ຄວາມຊົງຈຳທີ່ດີໃນໄລຍະຝຶກອົບຮົມຢູ່ຫວຽດນາມ. ສະຫາຍຮອງຫົວໜ້າບັນຍາທິການ ຢືນຢັນວ່າ ການຢ້ຽມຢາມຂອງຄະນະຜູ້ແທນປະກອບສ່ວນເພີ່ມພູນຄູນສ້າງສາຍພົວພັນສາມັກຄີ, ຄວາມສະໜິດຕິດພັນແບບພິເສດລະຫວ່າງ ຫວຽດນາມ-ລາວ, ລາວ-ຫວຽດນາມ ເຊິ່ງໄດ້ຮັບການກໍ່ສ້າງ ແລະພັດທະນາໃນຕະຫຼອດຊຸມປີຜ່ານມາ.

ສະຫາຍ ພັນເອກພິເສດ ຫງວຽນຮົ່ງຫາຍ ກ່າວຄຳເຫັນທີ່ການເຮັດວຽກ. ພາບ: qdnd.vn

ໃນຂອບເຂດການເຮັດວຽກ, ສະຫາຍ ພັນເອກພິເສດ ຫງວຽນຮົ່ງຫາຍ ໄດ້ແນະນຳໂດຍສັງເຂບໄລຍະ 70 ກວ່າປີແຫ່ງການກຳເນີດ, ພັດທະນາ ແລະການເຕີບໃຫຍ່ຂະຫຍາຍຕົວຂອງໜັງສືພິມກອງທັບປະຊາຊົນ. ໂດຍແມ່ນອົງການຂອງຄະນະພັກການທະຫານສູນກາງ ແລະສຽງຂອງກໍາລັງປະກອບອາວຸດ ແລະປະຊາຊົນຫວຽດນາມ, ໜັງສືພິມກອງທັບປະຊາຊົນ ແມ່ນໜຶ່ງໃນບັນດາໜັງສືພິມການເມືອງທີ່ມີອິດທິພົນຊື່ສຽງແຖວໜ້າໃນລະບົບສື່ມວນຊົນປະຕິວັດຫວຽດນາມ, ປະຕິບັດໜ້າທີ່ໂຄສະນາ 2 ໜ້າທີ່ຍຸດທະສາດຂອງປະເທດ ນັ້ນແມ່ນການສ້າງສາ ແລະປົກປັກຮັກສາປະເທດຫວຽດນາມ ສັງຄົມນິຍົມ. ໜັງສືພິມກອງທັບປະຊາຊົນໄດ້ຮັບຄວາມເອົາໃຈໃສ່ ແລະຄວາມໄວ້ເນື້ອເຊື່ອໃຈຈາກການນໍາຂອງພັກ, ລັດ ແລະກອງທັບ; ມີອິດທິພົນຊື່ສຽງ, ຜົນສະທ້ອນຢ່າງເລິກເຊິ່ງກວ້າງຂວາງໃນກອງທັບ ແລະສັງຄົມ; ໄດ້ປະກອບສ່ວນຢ່າງຕັ້ງໜ້າເຂົ້າໃນການຕໍ່ສູ້ປົດປ່ອຍຊາດ, ປົກປັກຮັກສາປະເທດ ກໍ່ຄືພາລະກິດສ້າງສາ ແລະປົກປັກຮັກສາປະເທດຊາດໃນປະຈຸບັນ.

ປະຕິບັດແນວທາງເປີດກວ້າງການພົວພັນກັບຕ່າງປະເທດຂອງພັກ ແລະລັດຫວຽດນາມ, ໜັງສືພິມກອງທັບປະຊາຊົນຫວຽດນາມ ໄດ້ເອົາໃຈໃສ່ໂຄສະນາເຜີຍແຜ່ກ່ຽວກັບສະພາບການໂລກ, ພິເສດແມ່ນໂຄສະນາກ່ຽວກັບປະເທດ, ປະຊາຊົນ ແລະບັນດາຜົນງານອັນພົ້ນເດັ່ນຂອງປະເທດລາວອ້າຍນ້ອງ ກໍ່ຄືສາຍພົວພັນແບບພິເສດລະຫວ່າງຫວຽດນາມ ແລະລາວ.

ສະຫາຍ ໂອລຳ ຈັນທະວິໄລ ຫົວໜ້າຫ້ອງການ, ວິທະຍຸກະຈາຍສຽງແຫ່ງຊາດລາວ ສະແດງຄວາມຂອບໃຈຕໍ່ໜັງສືພິມກອງທັບປະຊາຊົນ. ພາບ: qdnd.vn

ກ່າວຄຳເຫັນທີ່ການເຮັດວຽກ, ສະຫາຍ ໂອລໍາ ຈັນທະວິໄລ ໄດ້ສະແດງຄວາມຂອບອົກຂອບໃຈຢ່າງຈິງໃຈຕໍ່ໜັງສືພິມກອງທັບປະຊາຊົນທີ່ໄດ້ໃຫ້ການຕ້ອນຮັບຢ່າງອົບອຸ່ນ, ສ້າງເງື່ອນໄຂສະດວກໃຫ້ຄະນະພະນັກງານສື່ມວນຊົນລາວ ລົງຊອກຮູ້, ແລກປ່ຽນບັນດາການເຄື່ອນໄຫວດ້ານສື່ມວນຊົນ; ພ້ອມທັງຢືນຢັນວ່າ ຜ່ານການຢ້ຽມຢາມ ແລະເຮັດວຽກຄັ້ງນີ້, ຈະປະກອບສ່ວນເພີ່ມທະວີຄວາມສາມັກຄີ, ການແບ່ງປັນ ແລະແລກປ່ຽນດ້ານວິຊາຊີບລະຫວ່າງສື່ມວນຊົນຂອງສອງປະເທດ, ເປັນພື້ນຖານ ເພື່ອສະເໜີຕໍ່ການນຳສອງປະເທດກ່ຽວກັບບັນດາມາດຕະການຊຸກຍູ້ການຮ່ວມມືດ້ານສື່ມວນຊົນລະຫວ່າງສອງປະເທດໃນຊຸມປີຕໍ່ໄປ.

ສະຫາຍ ພັນເອກພິເສດ ຫງວຽນຮົ່ງຫາຍ ມອບຂອງຂວັນເປັນທີ່ລະນຶກ ແລະສື່ສິ່ງ​ພິມຂອງໜັງສືພິມກອງທັບປະຊາຊົນ ໃຫ້ຄະນະພະນັກງານຄຸ້ມຄອງສື່ມວນຊົນລາວ. ພາບ: qdnd.vn

ສະຫາຍ ໂອລຳ ຈັນທະວິໄລ ຕາງໜ້າໃຫ້ຄະນະພະນັກງານຄຸ້ມຄອງສື່ມວນຊົນລາວ ມອບຂອງຂວັນເປັນທີ່ລະນຶກໃຫ້ແກ່ໜັງສືພິມກອງທັບປະຊາຊົນ. ພາບ: qdnd.vn

ບັນດາຜູ້ແທນຖ່າຍຮູບເປັນທີ່ລະນຶກ. ພາບ: qdnd.vn

ໃນໄລຍະຈະມາເຖິງ, ສະຫາຍ ໂອລໍາ ຈັນທະວິໄລ ສະເໜີໃຫ້ໜັງສືພິມກອງທັບປະຊາຊົນ ແລະບັນດາອົງການສື່ມວນຊົນລາວ ສືບຕໍ່ເພີ່ມທະວີການຮ່ວມມືໃນການບໍາລຸງສ້າງ, ຝຶກອົບຮົມບັນດານັກຂ່າວ, ບັນນາທິການ, ແບ່ງປັນຂໍ້ມູນຂ່າວສານ, ແລກປ່ຽນວິຊາສະເພາະເພື່ອປະຕິບັດໜ້າທີ່ໂຄສະນາຂອງອົງການສື່ມວນຊົນສອງປະເທດໃຫ້ນັບມື້ນັບດີຂຶ້ນ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.

ໂດຍ: ຈາງຫງວຽນ