ຄະນະຜູ້ແທນຕໍາຫຼວດທະເລຫວຽດນາມ ເຂົ້າຢ້ຽມຂໍ່ານັບການນໍາກໍາລັງປ້ອງກັນຝັ່ງທະເລ ຟີລິບປິນ
ກປ.ອອນໄລ - ໃນຂອບເຂດການຢ້ຽມຢາມ, ພົບປະແລກປ່ຽນກັບກໍາລັງປ້ອງກັນຝັ່ງທະເລຟີລິບປິນ ຂອງກໍາປັ່ນຕໍາຫຼວດທະເລ 8002, ຕອນເຊົ້າວັນທີ 6 ສິງຫາ, ຄະນະຜູ້ແທນຕໍາຫຼວດທະເລຫວຽດນາມ ນໍາໂດຍ ທ່ານພັນເອກ ຮວ່າງກ໊ວກດາດ ຮອງຜູ້ບັນຊາການທະຫານຕໍາຫຼວດທະເລເຂດ 2 ພ້ອມຄະນະ ໄດ້ເຂົ້າຢ້ຽມຂໍ່ານັບທ່ານພົນເອກ Ronnie Gil L Gavan ຜູ້ບັນຊາການກໍາລັງປ້ອງກັນຝັ່ງທະເລ ຟີລິບປິນ.
    |
 |
|
ພັນເອກ ຮວ່າງກ໊ວກດາດ ຂຽນໃສ່ປຶ້ມອະນຸສອນທີ່ສໍານັກງານກໍາລັງປ້ອງກັນຝັ່ງທະເລ ຟີລິບປິນ. ພາບ: ຮວ່າງແທ່ງ |
ຍິນດີຕ້ອນຮັບຄະນະຜູ້ແທນຕໍາຫຼວດທະເລຫວຽດນາມ, ທ່ານພົນເອກ Ronnie Gil L Gavan ຢັ້ງຢືນວ່າ ການຢ້ຽມຢາມແມ່ນການຫັນເນື້ອໃນບົດບັນທຶກຊ່ວຍຈໍາວ່າດ້ວຍການຮ່ວມມືທະເລລະຫວ່າງສອງກໍາລັງທີ່ໄດ້ລົງນາມໃນເດືອນມັງກອນ ປີ 2024 ໃຫ້ເປັນລະອຽດ; ເຊື່ອໝັ້ນວ່າ ການຢ້ຽມຢາມຈະບັນລຸໝາກຜົນອັນດີງາມ, ປະກອບສ່ວນຊຸກຍູ້ການຮ່ວມມືແທດຈິງລະຫວ່າງສອງຝ່າຍ, ໂດຍສະເພາະແມ່ນໃນການສົມທົບກັນຝຶກແອບຊອກຫາກູ້ໄພ, ຕ້ານ ແລະສະກັດກັ້ນອັກຄີໄຟ, ລະເບີດຢູ່ທະເລ.
|
|
 |
|
ພົນເອກ Ronnie Gil L Gavan ມອບຂອງຂວັນໃຫ້ພັນເອກ ຮວ່າງກ໊ວກດາດ. ພາບ: ຮວ່າງແທ່ງ |
|
|
 |
|
ພັນເອກ ຮວ່າງກ໊ວກດາດ ມອບຂອງຂວັນຂອງຕໍາຫຼວດທະເລຫວຽດນາມ ໃຫ້ພົນເອກ Ronnie Gil L Gavan. ພາບ: ຮວ່າງແທ່ງ |
ພັນເອກ ຮວ່າງກ໊ວກດາດ ໃຫ້ຮູ້ວ່າ ປີ 2024 ເປັນຂີດໝາຍແຫ່ງການຮ່ວມມືສໍາເລັດຜົນຂອງສອງກໍາລັງ, ດ້ວຍການລົງນາມບົດບັນທຶກຊ່ວຍຈໍາວ່າດ້ວຍການຮ່ວມມືທະເລ ໃນເດືອນມັງກອນ ປີ 2024. ຜ່ານນັ້ນ ປະກອບສ່ວນຍົກສູງປະສິດທິຜົນການແບ່ງປັນຂໍ້ມູນຂ່າວສານ ແລະສົມທົບກັນປະຕິບັດກົດໝາຍຢູ່ທະເລ; ຮັກສາ ແລະຮັບປະກັນຄວາມໝັ້ນຄົງ, ຄວາມປອດໄພຢູ່ບັນດາເຂດທະເລໃນພາກພື້ນ. ຕໍາຫຼວດທະເລຫວຽດນາມ ປາດຖະໜາຢາກຊຸກຍູ້ການພົວພັນຮ່ວມມືກັບກໍາລັງປ້ອງກັນຝັ່ງທະເລ ຟີລິບປິນໃຫ້ນັບມື້ນັບແໜ້ນແຟ້ນ ແລະມີປະສິດທິຜົນ, ເພື່ອສັນຕິພາບ, ສະຖຽນລະພາບ, ຄວາມວັດທະນາຖາວອນ ແລະພັດທະນາ.
ຕອນບ່າຍຂອງວັນດຽວກັນ, ຄະນະຕໍາຫຼວດທະເລຫວຽດນາມ ແລະກໍາລັງປ້ອງກັນຝັ່ງທະເລຟີລິບປິນ ດໍາເນີນບັນດາການເຄື່ອນໄຫວແຂ່ງຂັນກິລາມິດຕະພາບ.
ໂດຍ: ໄຊຊະນະ