ຄະນະປະຕິບັດງານກະຊວງປ້ອງກັນປະເທດຫວຽດນາມ ເຂົ້າຮ່ວມງານຕະຫຼາດນັດ ປ້ອງກັນຊາດ-ປ້ອງກັນຄວາມສະຫງົບ SEDEC ຄັ້ງທີ 4 ຢູ່ ຕວກກີ
ກປ.ອອນໄລ - ໂດຍໄດ້ຮັບຄຳເຊີນຂອງກະຊວງປ້ອງກັນປະເທດ ແລະອົງການອຸດສາຫະກຳປ້ອງກັນຊາດຕວກກີ, ໃນລະຫວ່າງວັນທີ 19 – 25 ພຶດສະພາ, ຄະນະປະຕິບັດງານກະຊວງປ້ອງກັນປະເທດຫວຽດນາມ ນໍາໂດຍທ່ານພົນຕີ ຟ້າມເຈື່ອງເຊີນ, ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນຫວຽດນາມ ໄດ້ເຂົ້າຮ່ວມງານຕະຫຼາດນັດປ້ອງກັນຊາດ-ປ້ອງກັນຄວາມສະຫງົບ SEDEC ຄັ້ງທີ 4 ຢູ່ນະຄອນ Ankara, ຕວກກີ.
ພາຍຫຼັງເຂົ້າຮ່ວມພິທີເປີດງານຕະຫຼາດນັດ, ຄະນະປະຕິບັດງານກະຊວງປ້ອງກັນປະເທດຫວຽດນາມ ໄດ້ມີການເຮັດວຽກກັບທ່ານພົນເອກ Metin Gurak, ຫົວໜ້າເສນາທິການໃຫຍ່ກອງທັບຕວກກີ ແລະທ່ານ Yasar Guler ລັດຖະມົນຕີກະຊວງປ້ອງກັນປະເທດ ຕວກກີ.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/05/23/upload_2124/qtrang_23052024_01.jpeg?dpi=150&quality=100&w=500) |
ບັນຍາກາດທີ່ການເຮັດວຽກ. ພາບ: ກຽນຫຽບ. |
ທີ່ບັນດາການເຮັດວຽກ, ການນຳກະຊວງປ້ອງກັນປະເທດ, ກອງທັບຕວກກີ ຊົມເຊີຍກະຊວງປ້ອງກັນປະເທດຫວຽດນາມ ໄດ້ຈັດຄະນະຜູ້ແທນຂັ້ນສູງເຂົ້າຮ່ວມງານຕະຫຼາດນັດ SEDEC ຄັ້ງນີ້, ຜ່ານນັ້ນປະກອບສ່ວນສຳຄັນເຂົ້າໃນຜົນສຳເລັດຂອງງານຕະຫຼາດນັດ ກໍ່ຄືຊຸກຍູ້ການພົວພັນຮ່ວມມືຕາມເນື້ອໃນຈິດໃຈທີ່ການນຳຂັ້ນສູງຂອງສອງປະເທດໄດ້ເຫັນດີເປັນເອກະພາບ.
ເນື່ອງໃນໂອກາດນີ້, ການນຳກະຊວງປ້ອງກັນປະເທດ, ກອງທັບຕວກກີ ສະແດງຄວາມຂອບອົກຂອບໃຈຕໍ່ຫວຽດນາມ ທີ່ໄດ້ຈັດສົ່ງກອງກູ້ຊີບເຂົ້າຮ່ວມການກູ້ໄພ, ກູ້ຊີບ ແລະໜູນຊ່ວຍແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວໃນເດືອນກຸມພາ 2023 ຢູ່ພາກໃຕ້ຕວກກີ; ຢືນຢັນວ່າ, ສອງຝ່າຍຍັງມີຄວາມສາມາດບົ່ມຊ້ອນຮ່ວມມືຫຼາຍຢ່າງ ແລະປາດຖະໜາຢາກຊຸກຍູ້ການຮ່ວມມືໃນຂົງເຂດປ້ອງກັນຊາດ, ໃນນັ້ນມີຂະແໜງອຸດສາຫະກຳປ້ອງກັນຊາດ, ບໍາລຸງສ້າງ, ແບ່ງປັນບົດຮຽນ.
ທ່ານພົນຕີ ຟ້າມເຈື່ອງເຊີນ ຂອບໃຈການນໍາກະຊວງປ້ອງກັນປະເທດ, ກອງທັບຕວກກີ ແລະບັນດາອົງການ, ຄະນະຈັດຕັ້ງງານຕະຫຼາດນັດທີ່ໄດ້ຕ້ອນຮັບຄະນະຜູ້ແທນກະຊວງປ້ອງກັນປະເທດຫວຽດນາມ ຢ່າງລອບຄອບ, ສົມກຽດ; ຕີລາຄາສູງການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ ແລະແບ່ງປັນບັນດາຄວາມມານະພະຍາຍາມກໍ່ສ້າງເຂດປະສົບໄພແຜ່ນດິນໄຫວໃນຕົ້ນປີ 2023 ຄືນໃໝ່. ເນື່ອງໃນໂອກາດນີ້, ທ່ານພົນຕີ ຟ້າມເຈື່ອງເຊີນ ໄດ້ສະເໜີໃຫ້ບັນດາການນໍາກະຊວງປ້ອງກັນປະເທດ ແລະກອງທັບຕວກກີ ສ້າງເງື່ອນໄຂໃຫ້ບັນດາວິສາຫະກິດອຸດສາຫະກຳປ້ອງກັນຊາດຕວກກີ ເຂົ້າຮ່ວມແນະນຳຜະລິດຕະພັນຂອງຕົນຢູ່ງານວາງສະແດງປ້ອງກັນຊາດສາກົນຫວຽດນາມ ປີ 2024.
ເນື່ອງໃນໂອກາດນີ້, ຄະນະປະຕິບັດງານກະຊວງປ້ອງກັນປະເທດຫວຽດນາມ ໄດ້ໄປຢ້ຽມຊົມບັນດາຮ້ານວາງສະແດງທີ່ງານຕະຫຼາດນັດ ແລະເຮັດວຽກກັບບາງວິສາຫະກິດອຸດສາຫະກຳປ້ອງກັນຊາດ.
ໂດຍ: ຈາງຫງວຽນ