ຄະນະຈັດຕັ້ງງານແຂ່ງຂັນລົດຖີບ “ກັບຄືນສູ່ດ້ຽນບຽນຝູ - 2024, ຊິງຂັນໜັງສືພິມກອງທັບປະຊາຊົນຫວຽດນາມ” ຖະຫວາຍທູບທຽນອາໄລຫາບັນດາວິລະຊົນນັກຮົບເສຍສະຫຼະຊີວິດເພື່ອຊາດຢູ່ດ້ຽນບຽນຝູ
ກປ.ອອນໄລ - ວັນທີ 5 ພຶດສະພາ, ຢູ່ນະຄອນ ດ້ຽນບຽນຝູ, ແຂວງ ດ້ຽນບຽນ, ຄະນະຈັດຕັ້ງງານແຂ່ງຂັນລົດຖີບ “ກັບຄືນສູ່ດ້ຽນບຽນຝູ - 2024, ຊິງຂັນໜັງສືພິມກອງທັບປະຊາຊົນຫວຽດນາມ” ນໍາໂດຍທ່ານພົນຈັດຕະວາ ດວ່ານຊວນໂບະ, ຫົວໜ້າບັນນາທິການໃຫຍ່ໜັງສືພິມກອງທັບປະຊາຊົນຫວຽດນາມ, ຫົວໜ້າຄະນະຈັດຕັ້ງງານແຂ່ງຂັນ ໄດ້ຖະຫວາຍທູບທຽນ, ດອກໄມ້ສະແດງຄວາມຮູ້ບຸນຄຸນຕໍ່ບັນດາວິລະຊົນ, ນັກຮົບທີ່ເສຍສະຫຼະຊີວິດເພື່ອຊາດຢູ່ສຸສານນັກຮົບເສຍສະຫຼະຊີວິດເພື່ອຊາດ ດ້ຽນບຽນຝູ, ວິຫານບູຊານັກຮົບເສຍສະຫຼະຊີວິດເພື່ອຊາດຢູ່ສະໜາມຮົບ ດ້ຽນບຽນຝູ.
ທ່າມກາງບັນຍາກາດອັນເຄັ່ງຂຶ້ມ, ຄະນະຜູ້ແທນໄດ້ວາງພວງມາລາ, ຖະຫວາຍທູບທຽນອາໄລຫາສະແດງຄວາມຮູ້ບຸນຄຸນຕໍ່ບັນດາວິລະຊົນ, ນັກຮົບເສຍສະຫຼະຊີວິດເພື່ອຊາດ, ເຂົາເຈົ້າໄດ້ອຸທິດເລືອດເນື້ອ, ຕໍ່ສູ້ຢ່າງພິລະອາດຫານເພື່ອສ້າງເປັນໄຊຊະນະປະຫວັດສາດດ້ຽນບຽນຝູ.
    |
 |
|
ຄະນະຈັດຕັ້ງງານແຂ່ງຂັນວາງດອກໄມ້ອາໄລຫາວິລະຊົນນັກຮົບເສຍສະຫຼະຊີວິດເພື່ອຊາດຢູ່ສຸສານນັກຮົບເສຍສະຫຼະຊີວິດ ດ້ຽນບຽນຝູ. ພາບ: qdnd.vn |
ນີ້ແມ່ນຄັ້ງທີ 5 ທີ່ໜັງສືພິມກອງທັບປະຊາຊົນຫວຽດນາມ ເປັນປະທານ, ສົມທົບກັບສະຫະພັນລົດຖີບ-ລົດຈັກກິລາຫວຽດນາມ ແລະບັນດາອົງການ, ຫົວໜ່ວຍ, ທ້ອງຖິ່ນຈັດຕັ້ງການແຂ່ງຂັນລົດຖີບກັບຄືນສູ່ດ້ຽນບຽນຝູ.
ການແຂ່ງຂັນມີຄວາມໝາຍປຸກລຸກຈິດໃຈຮັກຊາດ, ຄວາມມະຫາສາມັກຄີ, ຄວາມເອກອ້າງທະນົງໃຈ, ເຊີດຊູຊາດ, ມູນເຊື້ອ ແລະຫຼັກສິນທຳ ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ, ສະແດງຄວາມຮູ້ບຸນຄຸນ, ຕອບບຸນແທນຄຸນຕໍ່ພີ່ນ້ອງຮ່ວມຊາດ, ນັກຮົບເສຍສະຫຼະຊີວິດເພື່ອຊາດ, ປະກອບສ່ວນສ້າງເປັນໄຊຊະນະດ້ຽນບຽນຝູ.
|
|
 |
|
ຄະນະຈັດຕັ້ງງານແຂ່ງຂັນອາໄລຫາວິລະຊົນນັກຮົບເສຍສະຫຼະຊີວິດເພື່ອຊາດຢູ່ສຸສານນັກຮົບເສຍສະຫຼະຊີວິດເພື່ອຊາດ ດ້ຽນບຽນຝູ. ພາບ: qdnd.vn |
ກັບຄືນສູ່ດິນແດນປະຫວັດສາດ ດ້ຽນບຽນຝູ, ພ້ອມກັບບັນດາການເຄື່ອນໄຫວແຂ່ງຂັນລົດຖີບ, ວຽກງານສັງຄົມ, ຄະນະຈັດຕັ້ງຍັງໄປຢ້ຽມຢາມບັນດາສະຖານທີ່ປະຫວັດສາດ, ຖະຫວາຍທູບທຽນອາໄລຫາບັນດາວິລະຊົນນັກຮົບເສຍສະຫຼະຊີວິດເພື່ອຊາດ, ສະແດງຄວາມຮູ້ບຸນຄຸນຕໍ່ຮຸ່ນພໍ່ຮຸ່ນອ້າຍທີ່ເສຍສະຫຼະຊີວິດເພື່ອເອກະລາດ ແລະເສລີພາບຂອງປະເທດຊາດ. ນີ້ກໍ່ແມ່ນກິດຈະກຳທີ່ມີຄວາມໝາຍແນໃສ່ສຶກສາມູນເຊື້ອຕໍ່ລຸ້ນໃນປະຈຸບັນ
ໂດຍ: ຈາງຫງວຽນ