ພະແນກພະລາທິການ ສັງກັດກອງບັນຊາການທະຫານຊາຍແດນ ໄດ້ຮັບຫຼຽນໄຊປົກປັກຮັກສາປະເທດຊາດ ຊັ້ນ III
ກປ.ອອນໄລ - ວັນທີ 14 ເມສາ, ພະແນກພະລາທິການ ສັງກັດກອງບັນຊາການທະຫານຊາຍແດນ ໄດ້ຈັດພິທີຮັບປະດັບຫຼຽນໄຊປົກປັກຮັກສາປະເທດຊາດ ຊັ້ນ III ແລະສະເຫຼີມສະຫຼອງ 65 ປີແຫ່ງວັນມູນເຊື້ອ (23-4-1959 / 23-4-2024). ທ່ານພົນໂທ ຮວ່າງຊວນຈ໊ຽນ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ເຂົ້າຮ່ວມພິທີ.
|
|
ໂດຍໄດ້ຮັບການມອບສິດຈາກປະທານປະເທດ, ທ່ານພົນຕີ ເລດຶກຖ໊າຍ, ຜູ້ບັນຊາການກອງບັນຊາການທະຫານຊາຍແດນ ມອບໃບຢັ້ງຢືນຫຼຽນໄຊປົກປັກຮັກສາປະເທດຊາດ ຊັ້ນ III ໃຫ້ແກ່ພະແນກພະລາທິການ. ພາບ: qdnd.vn |
ພາຍຫຼັງ 65 ປີແຫ່ງການກໍ່ສ້າງ, ສູ້ຮົບ ແລະເຕີບໃຫຍ່ຂະຫຍາຍຕົວ, ພະແນກພະລາທິການ (ກອງບັນຊາການທະຫານຊາຍແດນ) ໄດ້ປະກອບສ່ວນເຂົ້າໃນພາລະກິດຄຸ້ມຄອງ, ປົກປັກຮັກສາອະທິປະໄຕຜືນແຜ່ນດິນ ແລະຄວາມສະຫງົບຢູ່ເຂດຊາຍແດນແຫ່ງຊາດ. ໃນຊຸມປີຜ່ານມາ, ໄປພ້ອມກັບການປະຕິບັດໜ້າທີ່ການເມືອງຈຸດສຸມເປັນຢ່າງດີແລ້ວ, ພະແນກພະລາທິການ (ກອງບັນຊາການທະຫານຊາຍແດນ) ໄດ້ສົມທົບກັນປະຕິບັດວຽກງານນະໂຍບາຍ, ວຽກງານຂົນຂວາຍປະຊາຊົນເປັນຢ່າງດີ, ເຂົ້າຮ່ວມບັນດາໂຄງການສົມທົບກັນລະຫວ່າງທະຫານຊາຍແດນ ກັບບັນດາຄະນະ, ຂະແໜງການ, ອົງການຈັດຕັ້ງມະຫາຊົນຂັ້ນສູນກາງ ແລະທ້ອງຖິ່ນຢ່າງມີປະສິດທິຜົນ ຄື: ໂຄງການ “ສົມທົບກັນລະຫວ່າງແພດທະຫານ ແລະປະຊາຊົນ”, “ແພດທະຫານຊາຍແດນ”, “ຊ່ວຍນ້ອງໄປໂຮງຮຽນ-ລູກລ້ຽງຄ້າຍທະຫານຊາຍແດນ” ແລະບັນດາຮູບແບບ, ຄື: “ໃຫ້ຄໍາປຶກສາ ແລະເບິ່ງແຍງດູແລສຸຂະພາບໃຫ້ແກ່ປະຊາຊົນບັນດາເຜົ່າຢູ່ເຂດຊາຍແດນ”...
|
|
ທ່ານພັນເອກພິເສດ ຫງວຽນດຶກສີ໋, ຫົວໜ້າພະແນກພະລາທິການ ກ່າວຄໍາເຫັນທີ່ພິທີ. ພາບ: qdnd.vn |
ໂດຍສືບທອດ ແລະເສີມຂະຫຍາຍໝາກຜົນທີ່ບັນລຸໄດ້, ໃນໄລຍະຈະມາເຖິງ, ການນຳ, ຜູ້ບັນຊາການ, ພະນັກງານ, ລັດຖະກອນ ແລະນັກຮົບພະແນກພະລາທິການ (ກອງບັນຊາການທະຫານຊາຍແດນ) ກຳນົດວ່າ: ສືບຕໍ່ຊາບຊຶມ ແລະປະຕິບັດຄຳສັ່ງ, ມະຕິ, ແຜນການຂອງຂັ້ນເທິງຢ່າງເຂັ້ມງວດ, ເປັນເຈົ້າການກໍາແໜ້ນສະພາບການ ແລະຄວາມຮຽກຮ້ອງຕ້ອງການຂອງໜ້າທີ່ຂອງບັນດາກົມກອງ ທີ່ຕັ້ງທັບຢູ່ຕາມເສັ້ນຊາຍແດນ ເພື່ອເປັນເສນາທິການ, ຜັນຂະຫຍາຍຮັບປະກັນວຽກງານພະລາທິການໃຫ້ເປັນຢ່າງດີ; ເອົາໃຈໃສ່ສ້າງຂະແໜງພະລາທິການ (ທະຫານຊາຍແດນ) ໃຫ້ເຂັ້ມແຂງຮອບດ້ານ; ຜັນຂະຫຍາຍ, ຈັດຕັ້ງປະຕິບັດການໂຮມພະແນກພະລາທິການ ກັບພະແນກເຕັກນິກເຂົ້າກັນ ກາຍເປັນພະແນກພະລາທິການ-ເຕັກນິກ ຮັບປະກັນຄວາມກະທັດຮັດ, ເຂັ້ມແຂງ, ກຽມພ້ອມຮັບ ແລະປະຕິບັດສໍາເລັດທຸກໜ້າທີ່ທີ່ໄດ້ຮັບມອບໝາຍໃຫ້.
ໂດຍ: ທູຈາງ