ພົນເອກ ຟານວັນຢາງ ສະແດງຄວາມຮູ້ບຸນຄຸນຕໍ່ອະດີດການນໍາກະຊວງປ້ອງກັນປະເທດ, ກົມໃຫຍ່ເສນາທິການ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 49 ປີແຫ່ງວັນປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ (30-4-1975 / 30-4-2024) ແລະສະເຫຼີມສະຫຼອງ 70 ປີແຫ່ງວັນໄຊຊະນະດ້ຽນບຽນຝູ (7-5-1954 / 7-5-2024), ຕອນເຊົ້າວັນທີ 27 ເມສາ, ຄະນະປະຕິບັດງານຂອງຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ນໍາໂດຍສະຫາຍພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ ໄດ້ໄປຢ້ຽມຢາມ, ອວຍພອນບັນດາສະຫາຍອະດີດການນໍາ ກະຊວງປ້ອງກັນປະເທດ, ກົມໃຫຍ່ເສນາທິການກອງທັບປະຊາຊົນຫວຽດນາມ.
ສະຫາຍລັດຖະມົນຕີ ຟານວັນຢາງ ແລະບັນດາສະຫາຍໃນຄະນະ ໄດ້ໄປຢ້ຽມຢາມ, ອວຍພອນສະຫາຍພົນເອກ ໂງຊວນລິກ, ອະດີດລັດຖະມົນຕີກະຊວງປ້ອງກັນປະເທດ; ສະຫາຍພົນເອກ ໂດ໋ບ໊າຕິ, ອະດີດຮອງປະທານສະພາແຫ່ງຊາດ, ອະດີດຫົວໜ້າກົມໃຫຍ່ເສນາທິການ, ອະດີດຮອງລັດຖະມົນຕີກະຊວງປ້ອງກັນປະເທດ; ສະຫາຍພົນໂທ ເຈືອງກວາງແຄ໊ງ, ອະດີດຮອງລັດຖະມົນຕີກະຊວງປ້ອງກັນປະເທດ; ສະຫາຍພົນໂທ ຟ້າມຊວນຮຸ່ງ, ອະດີດຮອງຫົວໜ້າກົມໃຫຍ່ເສນາທິການ; ສະຫາຍພົນຕີ ຫງວຽນກວ໊ກແຄ໊ງ, ອະດີດຮອງຫົວໜ້າກົມໃຫຍ່ເສນາທິການ.
|
|
ສະຫາຍລັດຖະມົນຕີ ຟານວັນຢາງ ຢ້ຽມຢາມ, ອວຍພອນສະຫາຍພົນເອກ ໂງຊວນລິກ. ພາບ: qdnd.vn |
|
|
ສະຫາຍພົນເອກ ຟານວັນຢາງ ຢ້ຽມຢາມຄອບຄົວສະຫາຍພົນເອກ ໂດ໋ບ໊າຕິ. ພາບ: qdnd.vn |
ດ້ວຍຄວາມຈິງໃຈໃນການຢ້ຽມຢາມຖາມຂ່າວ, ອວຍພອນບັນດາສະຫາຍອະດີດການນໍາກະຊວງປ້ອງກັນປະເທດ ແລະກົມໃຫຍ່ເສນາທິການ, ສະຫາຍພົນເອກ ຟານວັນຢາງ ໄດ້ແຈ້ງໃຫ້ບັນດາສະຫາຍຮັບຊາບກ່ຽວກັບບັນດາໝາກຜົນອັນພົ້ນເດັ່ນໃນການປະຕິບັດໜ້າທີ່ການທະຫານ, ການປ້ອງກັນຊາດຂອງທົ່ວກອງທັບໃນໄລຍະຜ່ານມາ ແລະບາງໜ້າທີ່ຈຸດສຸມ ເຊິ່ງຄະນະພັກການທະຫານສູນກາງ, ກະຊວງປ້ອງກັນປະເທດພວມສຸມໃສ່ຜັນຂະຫຍາຍ, ຈັດຕັ້ງປະຕິບັດ. ຕາມນັ້ນແລ້ວ, ຄະນະພັກການທະຫານສູນກາງ, ກະຊວງປ້ອງກັນປະເທດໄດ້ນໍາພາ-ຊີ້ນໍາທົ່ວກອງທັບປະຕິບັດສໍາເລັດໜ້າທີ່ຢ່າງຮອບດ້ານ, ເປັນຕົ້ນແມ່ນໜ້າທີ່ຝຶກແອບ, ກຽມພ້ອມສູ້ຮົບ; ສືບຕໍ່ເສີມຂະຫຍາຍບົດບາດຫຼັກແຫຼ່ງໃນພາລະກິດປົກປັກຮັກສາປະເທດຊາດ, ຕັ້ງໜ້າເຂົ້າຮ່ວມການສ້າງສາປະເທດຊາດ, ເປັນບ່ອນອີງອັນໜັກແໜ້ນ, ໄວ້ເນື້ອເຊື່ອໃຈຂອງພັກ, ລັດ ແລະປະຊາຊົນ; ໄດ້ຮັບການຕີລາຄາສູງຈາກການນຳພັກ, ລັດ, ຄະນະພັກ ແລະອຳນາດການປົກຄອງທ້ອງຖິ່ນ...
|
|
ສະຫາຍພົນເອກ ຟານວັນຢາງ ແລະຄະນະປະຕິບັດງານຢ້ຽມຢາມ, ອວຍພອນສະຫາຍພົນໂທ ເຈືອງກວາງແຄ໊ງ. ພາບ: qdnd.vn |
ສະຫາຍພົນເອກ ຟານວັນຢາງ ອວຍພອນໃຫ້ບັນດາສະຫາຍອະດີດການນໍາກະຊວງປ້ອງກັນປະເທດ ແລະກົມໃຫຍ່ເສນາທິການ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ; ຫວັງວ່າບັນດາສະຫາຍຈະສືບຕໍ່ເອົາໃຈໃສ່, ຕິດຕາມ ແລະປະກອບຄຳເຫັນທີ່ມີຄ່າ, ສຸດອົກສຸດໃຈ ເພື່ອກໍ່ສ້າງກອງທັບໃຫ້ນັບມື້ນັບໝັ້ນຄົງເຂັ້ມແຂງຂຶ້ນເລື້ອຍໆ.
ໂດຍ: ເຈິ່ນຮວ່ຽນ