ຫວຽດນາມ-ລາວ ຜັນຂະຫຍາຍຂໍ້ຕົກລົງຮ່ວມມືດ້ານການແພດທະຫານຢ່າງມີປະສິດທິຜົນ
ກປ.ອອນໄລ - ຕອນເຊົ້າວັນທີ 15 ມີນາ, ຢູ່ນະຄອນຫຼວງວຽງຈັນ, ຄະນະຜູ້ແທນໂຮງໝໍສູນກາງກອງທັບ 108 ນໍາໂດຍທ່ານພົນຈັດຕະວາ, ສຈ.ປອ ເລຮືວຊອງ, ຫົວໜ້າໂຮງໝໍ 108 ໄດ້ເຂົ້າຢ້ຽມຂໍ່ານັບທ່ານພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ.
ທີ່ການຕ້ອນຮັບ, ທ່ານພົນຈັດຕະວາ, ສຈ.ປອ ເລຮືວຊອງ ໄດ້ລາຍງານໃຫ້ທ່ານພົນເອກ ຈັນສະໝອນ ຈັນຍາລາດ ກ່ຽວກັບໝາກຜົນການຮ່ວມມືລະຫວ່າງໂຮງໝໍສູນກາງກອງທັບ 108 ແລະ ໂຮງໝໍສູນກາງກອງທັບ 103 ຂອງລາວ ໃນໄລຍະຜ່ານມາ; ຢືນຢັນວ່າ ທາງໂຮງໝໍ 108 ຈະສືບຕໍ່ສົມທົບກັນ, ໜູນຊ່ວຍ ແລະສົ່ງນັກຊ່ຽວຊານໄປຊ່ວຍເຫຼືອໂຮງໝໍສູນກາງກອງທັບ 103 ຂອງລາວ ເວົ້າສະເພາະ ແລະຂະແໜງການແພດທະຫານຂອງລາວ ເວົ້າລວມ; ພ້ອມກັນນັ້ນຍັງຈະສືບຕໍ່ໜູນຊ່ວຍບຳລຸງສ້າງຊັບພະຍາກອນມະນຸດໃຫ້ແກ່ໂຮງໝໍສູນກາງກອງທັບ 103 ກໍ່ຄືໃນຂົງເຂດແພດທະຫານຂອງລາວ.
|
|
ພົນຈັດຕະວາ, ສຈ.ປອ ເລຮືວຊອງ ລາຍງານກ່ຽວກັບຜົນການຮ່ວມມືໃຫ້ທ່ານພົນເອກ ຈັນສະໝອນ ຈັນຍາລາດ. ພາບ: ສໍານັກຂ່າວສານຫວຽດນາມ |
ທ່ານພົນເອກ ຈັນສະໝອນ ຈັນຍາລາດ ສະເໜີວ່າ ໃນໄລຍະຈະມາເຖິງ, ສອງໂຮງໝໍສືບຕໍ່ສົມທົບກັນ ແລະໜູນຊ່ວຍເຊິ່ງກັນ ແລະກັນ, ເປັນຕົ້ນແມ່ນໃນການບຳລຸງສ້າງຍົກສູງລະດັບວິຊາອາຊີບໃຫ້ແກ່ພະນັກງານແພດໝໍຂອງໂຮງໝໍສູນກາງກອງທັບ 103 ຂອງລາວ ເວົ້າສະເພາະ ແລະຂະແໜງການແພດທະຫານຂອງລາວ ເວົ້າລວມ; ສະເໜີໃຫ້ສອງໂຮງໝໍສືບຕໍ່ສົມທົບກັນຈັດຕັ້ງການຜັນຂະຫຍາຍບັນດາຂໍ້ຕົກລົງຮ່ວມມືລະຫວ່າງຂະແໜງການແພດທະຫານຂອງສອງປະເທດ ໃຫ້ມີປະສິດທິຜົນ; ຮຽກຮ້ອງໃຫ້ໂຮງໝໍ 108 ສືບຕໍ່ຈັດສົ່ງຄະນະຊ່ຽວຊານ ມາຊ່ວຍເຫຼືອໂຮງໝໍສູນກາງກອງທັບ 103 ຂອງລາວ ເວົ້າສະເພາະ ແລະ ຂະໜແໜງການແພດທະຫານຂອງລາວ ເວົ້າລວມ.
|
|
ໂຮງໝໍສູນກາງກອງທັບ 108 ຂອງຫວຽດນາມ ແລະໂຮງໝໍສູນກາງກອງທັບ 103 ຂອງລາວ ແລກປ່ຽນບົດບັນທຶກຊ່ວຍຈໍາການຮ່ວມມືນຳກັນ. ພາບ: ສໍານັກຂ່າວສານຫວຽດນາມ |
ກ່ອນໜ້ານັ້ນໄດ້ດຳເນີນການເຮັດວຽກ ແລະພິທີລົງນາມໃນບົດບັນທຶກຊ່ວຍຈຳ ແລະທິດທາງການຮ່ວມມືປີ 2024 ລະຫວ່າງໂຮງໝໍສູນກາງກອງທັບ 108 ຂອງຫວຽດນາມ ແລະ ໂຮງໝໍສູນກາງກອງທັບ 103 ຂອງລາວ.
ສອງຝ່າຍກໍ່ສະເໜີແຜນການແລກປ່ຽນແພດໝໍລະຫວ່າງສອງໂຮງໝໍ ຫຼືໂຮງໝໍສູນກາງກອງທັບ 103 ຂອງລາວ ຈັດສົ່ງແພດໝໍໄປທັດສະນະສຶກສາ, ເຂົ້າຮ່ວມການກວດ ແລະປິ່ນປົວພະຍາດໃຫ້ຄົນເຈັບລາວ ຢູ່ໂຮງໝໍສູນກາງກອງທັບ 108 ຂອງຫວຽດນາມ. ສ່ວນໂຮງໝໍສູນກາງກອງທັບ 108 ຂອງຫວຽດນາມ ຈັດສົ່ງແພດໝໍໄປໜູນຊ່ວຍການກວດ, ໃຫ້ຄໍາປຶກສາດ້ານສຸຂະພາບແກ່ຄົບເຈັບ ທີ່ໂຮງໝໍສູນກາງກອງທັບ 103 ຂອງລາວ.
ໂດຍ: ທູຈາງ