ພົນເອກ ຟານວັນຢາງ ຕ້ອນຮັບເອກອັກຄະລັດຖະທູດ ສ. ເກົາຫຼີ
ກປ.ອອນໄລ - ຕອນເຊົ້າວັນທີ 28 ພະຈິກ, ທີ່ສໍານັກງານກະຊວງປ້ອງກັນປະເທດ, ທ່ານພົນເອກ ຟານວັນຢາງ, ກຳມະການກົມການເມືອງສູນກາງພັກ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ ໄດ້ຕ້ອນຮັບທ່ານນາງ Oh Young Ju, ເອກອັກຄະລັດຖະທູດ ສ. ເກົາຫຼີ ປະຈໍາ ຫວຽດນາມ.
ຊົມເຊີຍທ່ານນາງ Oh Young Ju ໄດ້ຮັບແຕ່ງຕັ້ງເປັນເອກອັກຄະລັດຖະທູດຍິງຜູ້ທໍາອິດ ຂອງ ສ. ເກົາຫຼີ ປະຈຳ ຫວຽດນາມ, ທ່ານພົນເອກ ຟານວັນຢາງ ເນັ້ນໜັກວ່າ ໃນຊຸມປີຜ່ານມາ, ການພົວພັນ ຫວຽດນາມ - ສ.ເກົາຫຼີ ຍາມໃດກໍ່ໄດ້ຮັບການຮັກສາທ່າພັດທະນາເປັນປົກກະຕິ ແລະຮອບດ້ານ; ສອງປະເທດໄດ້ກາຍເປັນຄູ່ຮ່ວມມືແຖວໜ້າ ແລະສຳຄັນຂອງກັນ, ໂດຍສະເພາະແມ່ນໃນບັນດາຂົງເຂດເສດຖະກິດ, ການຄ້າ ແລະການລົງທຶນ.
|
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ແລກປ່ຽນກັບທ່ານນາງເອກອັກຄະລັດຖະທູດ Oh Young Ju. ພາບ: ແອັງຫວູ. |
ໃນໄລຍະຜ່ານມາ, ການຮ່ວມມືດ້ານປ້ອງກັນຊາດ ໄດ້ຮັບຄວາມເອົາໃຈໃສ່ຊຸກຍູ້ຈາກສອງຝ່າຍ, ແລະບັນລຸໄດ້ໝາກຜົນຕັ້ງໜ້າຫຼາຍຢ່າງ. ຕົ້ນເດືອນກັນຍາ 2022, ການເຈລະຈານະໂຍບາຍປ້ອງກັນຊາດປະຈຳປີຂັ້ນຮອງລັດຖະມົນຕີ ຄັ້ງທີ 10 ໄດ້ຈັດຕັ້ງ ຢູ່ ສ.ເກົາຫຼີ ປະສົບຜົນສຳເລັດຢ່າງຈົບງາມ ແລະເຫັນດີເປັນເອກະພາບຫຼາຍເນື້ອໃນຮ່ວມມື ເພື່ອແນໃສ່ນຳການພົວພັນດ້ານປ້ອງກັນຊາດສອງຝ່າຍເຂົ້າສູ່ລວງເລິກ, ແທດຈິງ, ປະກອບສ່ວນເຂົ້າໃນການພົວພັນ ຫວຽດນາມ-ສ.ເກົາຫຼີ.
ທ່ານພົນເອກ ຟານວັນຢາງ ປາດຖະໜາວ່າ ໃນອາຍຸການປະຕິບັດງານຢູ່ຫວຽດນາມ, ທ່ານນາງເອກອັກຄະລັດຖະທູດ Oh Young Ju ຈະເອົາໃຈໃສ່, ຊຸກຍູ້ການຮ່ວມມືລະຫວ່າງສອງປະເທດເວົ້າລວມ ແລະໃນຂົງເຂດຮ່ວມມືດ້ານປ້ອງກັນຊາດເວົ້າສະເພາະໃຫ້ເຂົ້າສູ່ລວງເລິກ, ແທດຈິງ, ມີປະສິດທິຜົນ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ; ພ້ອມທັງຢືນຢັນວ່າ ກະຊວງປ້ອງກັນປະເທດຫວຽດນາມ ຍາມໃດກໍ່ສ້າງເງື່ອນໄຂສະດວກເພື່ອໃຫ້ທ່ານນາງເອກອັກຄະລັດຖະທູດ ປະຕິບັດສຳເລັດໜ້າທີ່ເປັນຢ່າງດີ.
|
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ມອບຂອງຂວັນເປັນທີ່ລະນຶກໃຫ້ທ່ານນາງເອກອັກຄະລັດຖະທູດ Oh Young Ju. ພາບ: ແອັງຫວູ. |
ທ່ານນາງເອກອັກຄະລັດຖະທູດ Oh Young Ju ສະແດງຄວາມຂອບອົກຂອບໃຈຕໍ່ທ່ານພົນເອກ ຟານວັນຢາງ ທີ່ໄດ້ສະຫຼະເວລາຕ້ອນຮັບ; ຕີລາຄາສູງຜົນການພົບປະເຈລະຈາລະຫວ່າງລັດຖະມົນຕີກະຊວງປ້ອງກັນປະເທດຫວຽດນາມ ແລະສ. ເກົາຫຼີ ຢູ່ນອກກອງປະຊຸມລັດຖະມົນຕີປ້ອງກັນປະເທດອາຊຽນ ເປີດກວ້າງ (ADMM+) ທີ່ຫາກໍ່ດໍາເນີນຢູ່ກໍາປູເຈຍ. ທ່ານນາງເອກອັກຄະລັດຖະທູດ ຢືນຢັນວ່າ ໃນຖານະຕໍາແໜ່ງ, ພາລະໜ້າທ່ີຂອງຕົນ ຈະມານະພະຍາຍາມຈົນສຸດຄວາມສາມາດ ເພື່ອແນໃສ່ປະກອບສ່ວນຢ່າງຕ້ັງໜ້າເຂົ້າໃນການພັດທະນາການພົວພັນ ຫວຽດນາມ - ສ.ເກົາຫຼີ ເວົ້າລວມ, ການຮ່ວມມືດ້ານປ້ອງກັນຊາດລະຫວ່າງສອງປະເທດ ເວົ້າສະເພາະ.
ໂດຍ: ແສງເດືອນ