ພົນເອກ ຟານວັນຢາງ ເຂົ້າຮ່ວມງານໂຮມຊຸມນຸມມິດຕິງສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ຢູ່ນະຄອນຫຼວງວຽງຈັນ
ກປ.ອອນໄລ - ຕອນບ່າຍວັນທີ 14 ກັນຍາ, ຢູ່ນະຄອນຫຼວງວຽງຈັນ, ປະເທດລາວ ໄດ້ດໍາເນີນພິທີສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022 ໂດຍກະຊວງປ້ອງກັນປະເທດລາວ ຈັດຕັ້ງພາຍໃຕ້ການເປັນປະທານຂອງສະຫາຍພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ.
|
|
ຜູ້ແທນເຂົ້າຮ່ວມພິທີ. ພາບ: qdnd.vn |
ກ່າວຄໍາເຫັນທີ່ພິທີ, ສະຫາຍພົນເອກ ຟານວັນຢາງ, ລັດຖະມົນຕີກະຊວງປ້ອງກັນປະເທດຫວຽດນາມ ສະແດງຄວາມເຊື່ອໝັ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ, ກອງທັບ ແລະປະຊາຊົນລາວອ້າຍນ້ອງ ຈະສືບຕໍ່ຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ, ສ້າງສາ ແລະປົກປັກຮັກສາສັນຕິພາບ, ເອກະລາດຂອງຊາດ ແລະກິດຈະການປ່ຽນແປງໃໝ່ຮອບດ້ານ; ຢັ້ງຢືນວ່າ ກະຊວງປ້ອງກັນປະເທດຫວຽດນາມ ຍາມໃດກໍ່ຄຽງບ່າຄຽງໄຫຼ່ພ້ອມກັບກະຊວງປ້ອງກັນປະເທດລາວ ໃນພາລະກິດສ້າງສາ ແລະປົກປັກຮັກສາປະເທດຊາດ ຢູ່ແຕ່ລະປະເທດ.
|
|
ລາຍການສະແດງສິລະປະທີ່ພິທີ. ພາບ: qdnd.vn |
ໃນໂອກາດນີ້, ສະຫາຍພົນເອກ ຟານວັນຢາງ ກໍ່ສະແດງຄວາມຂອບອົກຂອບໃຈຕໍ່ພັກ, ປະຊາຊົນ ແລະກອງທັບລາວ ທີ່ໄດ້ເອົາໃຈໃສ່, ສ້າງເງື່ອນໄຂໃຫ້ວຽກງານຊອກຄົ້ນ, ທ້ອນໄຮມ ແລະສົ່ງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດຢູ່ລາວ ກັບຄືນປະເທດ, ຕອບສະໜອງຄວາມຄອງຄອຍຂອງບ້ານເກີດເມືອງນອນ, ຄອບຄົວ ແລະຍາດຕິພີ່ນ້ອງບັນດານັກຮົບທີ່ເສຍສະຫຼະຊີວິດເພື່ອຊາດ.
*ໃນວັນດຽວກັນ, ສະຫາຍພົນເອກ ຟານວັນຢາງ ພ້ອມດ້ວຍຄະນະຜູ້ແທນການທະຫານຂັ້ນສູງຫວຽດນາມ ໄດ້ລົງຢ້ຽມຢາມກອງພົນທະຫານຮາບ ທີ 1, ກອງທັບປະຊາຊົນລາວ. ກອງພົນທະຫານຮາບ ທີ 1 ແມ່ນກອງພົນເປັນແຫຼ່ງກໍາລັງຫຼວງຂອງກອງທັບປະຊາຊົນລາວ, ມີໜ້າທີ່ເຄື່ອນທີ່ປົກປັກ ຮັກສານະຄອນຫຼວງວຽງຈັນ, ປົກປັກຮັກສາອົງການຫຼັກແຫຼ່ງຂອງພັກ, ລັດລາວ, ແມ່ນສະຖານທີ່ບໍາລຸງສ້າງການນໍາ, ພະນັກງານ, ຜູ້ບັນຊາການດີເດັ່ນຂອງກອງທັບປະຊາຊົນລາວ.
|
|
ສະຫາຍພົນເອກ ຟານວັນຢາງ ກວດແຖວກຽດຕິຍົດກອງພົນທະຫານຮາບ ທີ 1, ກອງທັບປະຊາຊົນລາວ. ພາບ: qdnd.vn |
|
|
ສະຫາຍພົນເອກ ຟານວັນຢາງ ຢ້ຽມຢາມກິດກະການກໍ່ສ້າງສໍານັກບັນຊາ ກອງພົນທະຫານຮາບ ທີ 1 ໂດຍກະຊວງປ້ອງກັນປະເທດຫວຽດນາມ ໜູນຊ່ວຍເງິນກໍ່ສ້າງ. ພາບ: qdnd.vn |
ສະຫາຍພົນເອກ ຟານວັນຢາງ ສະແດງຄວາມປະທັບໃຈຕໍ່ມູນເຊື້ອ, ການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງຂອງກອງພົນ ທັງດ້ານການຈັດຕັ້ງ, ກໍາລັງ ໃນໄລຍະທາງ 37 ປີແຫ່ງການກໍ່ສ້າງ, ສູ້ຮົບ ແລະເຕີບໃຫຍ່ຂະຫຍາຍຕົວ.
ໂດຍ: ທູຈາງ