ຫວຽດນາມ ຊຸກຍູ້ການຮ່ວມມືດ້ານປ້ອງກັນຊາດກັບໄທ ແລະອິນໂດເນເຊຍ
ກປ.ອອນໄລ - ຕອນບ່າຍວັນທີ 19 ກຸມພາ, ຢູ່ນອກກອງປະຊຸມ ADMM ວົງແຄບ, ທ່ານພົນເອກ ໂງຊວນລິກ ມີການພົບປະສອງຝ່າຍກັບທ່ານພົນເອກ Chaichan Changmongkol ຮອງລັດຖະມົນຕີກະຊວງປ້ອງກັນປະເທດໄທ ແລະທ່ານພົນໂທ Agus Setiadji ເລຂາທິການໃຫຍ່ກະຊວງປ້ອງກັນປະເທດອິນໂດເນເຊຍ.
ທີ່ການພົບປະກັບທ່ານພົນເອກ Chaichan Changmongkol, ທ່ານພົນເອກ ໂງຊວນລິກ ໄດ້ຂອບໃຈ ໄທ ທີ່ໄດ້ສະໜັບສະໜູນຫວຽດນາມ ໃນປີເປັນປະທານອາຊຽນ 2020, ຂອບໃຈໄທ ໄດ້ສ້າງເງື່ອນໄຂໃຫ້ຫວຽດນາມ ຮໍ່າຮຽນ, ແລກປ່ຽນບົດຮຽນກ່ຽວກັບການຈັດຕັ້ງບັນດາການເຄື່ອນໄຫວ, ກອງປະຊຸມດ້ານປ້ອງກັນຊາດ, ການທະຫານໃນປີ 2020.
    |
 |
|
ທ່ານພົນເອກ ໂງຊວນລິກ ພົບປະສອງຝ່າຍກັບທ່ານພົນເອກ Chaichan Changmongkol ຮອງລັດຖະມົນຕີກະຊວງປ້ອງກັນປະເທດໄທ. ພາບ: qdnd.vn. |
ທ່ານພົນເອກ Chaichan Changmongkol ຕີລາຄາສູງວຽກງານກະກຽມຂອງປະເທດເຈົ້າພາບຫວຽດນາມ ກໍ່ຄືຜົນສໍາເລັດຂອງກອງປະຊຸມ ADMM ວົງແຄບ. ກ່ຽວກັບຫົວຂໍ້ບັນດາການເຄື່ອນໄຫວ, ກອງປະຊຸມດ້ານປ້ອງກັນຊາດ, ການທະຫານອາຊຽນ ໃນປີ 2020 ແມ່ນ “ການຮ່ວມມືດ້ານປ້ອງກັນຊາດເພື່ອອາຊຽນ ສະໜິດຕິດພັນ ແລະເປັນເຈົ້າການປັບຕົວ” ເຊິ່ງກະຊວງປ້ອງກັນປະເທດຫວຽດນາມ ໄດ້ກໍານົດ, ທ່ານພົນເອກ Chaichan Changmongkol ໃຫ້ຮູ້ວ່າໄທ ຖືນີ້ແມ່ນການກໍານົດທິດທີ່ດີເພື່ອໃຫ້ການຮ່ວມມືດ້ານປ້ອງກັນຊາດໃນຂອບເຂດ ADMM ແລະ ADMM+ ນັບມື້ນັບພັດທະນາ. ໃນໄລຍະຈະມາເຖິງ, ທ່ານພົນເອກ ໂງຊວນລິກ ແລະທ່ານພົນເອກ Chaichan Changmongkol ເຫັນດີເປັນເອກະພາບຈະສືບຕໍ່ຜັນຂະຫຍາຍບັນດາເນື້ອໃນການຮ່ວມມືຢ່າງຄົບຖ້ວນ ແລະມີປະສິດທິຜົນ, ຄື: ການແລກປ່ຽນຄະນະຜູ້ແທນ, ການພົບປະແລກປ່ຽນນາຍທະຫານໜຸ່ມ, ການເຈລະຈານະໂຍບາຍປ້ອງກັນຊາດ, ຮ່ວມມືປ້ອງກັນຄວາມສະຫງົບທາງທະເລ…
ທີ່ການພົບປະກັບເລຂາທິການໃຫຍ່ກະຊວງປ້ອງກັນປະເທດອິນໂດເນເຊຍ, ສອງຝ່າຍຕີລາຄາສູງບັນດາໝາກຜົນທີ່ບັນລຸໄດ້ໃນການຮ່ວມມືດ້ານປ້ອງກັນຊາດສອງຝ່າຍໃນໄລຍະຜ່ານມາ, ພົ້ນເດັ່ນແມ່ນບັນດາຂົງເຂດ, ຄື: ແລກປ່ຽນຄະນະຜູ້ແທນ, ການຮ່ວມມືກໍ່ສ້າງ, ແລກປ່ຽນຂໍ້ມູນຂ່າວສານ, ການຮ່ວມມືລະຫວ່າງບັນດາເຫຼົ່າທັບ, ເຫຼົ່າຮົບ. ດ້ວຍຄວາມຫວັງວ່າການຮ່ວມມືດ້ານປ້ອງກັນຊາດສອງປະເທດໃນໄລຍະຈະມາເຖິງສືບຕໍ່ພັດທະນາຢ່າງຮອບດ້ານ, ແທດຈິງ, ທ່ານພົນເອກ ໂງຊວນລິກ ແລະທ່ານພົນໂທ Agus Setiadji ເລຂາທິການໃຫຍ່ກະຊວງປ້ອງກັນປະເທດອິນໂດເນເຊຍ ເຫັນດີເປັນເອກະພາບສືບຕໍ່ຮັກສາການແລກປ່ຽນຄະນະຜູ້ແທນທຸກຂັ້ນ; ຍົກສູງປະສິດທິຜົນບັນດາກົນໄກການເຈລະຈາທີ່ມີຢູ່ແລ້ວໃນປະຈຸບັນ; ຍູ້ແຮງການເຄື່ອນໄຫວຮ່ວມມືລະຫວ່າງບັນດາເຫຼົ່າທັບເຫຼົ່າຮົບ; ສືບຕໍ່ສົມທົບກັນ ແລະສະໜັບສະໜູນເຊິ່ງກັນ ແລະກັນໃນບັນດາເວທີປາໄສຫຼາຍຝ່າຍ, ໂດຍສະເພາະແມ່ນບັນດາການເຄື່ອນໄຫວ, ກອງປະຊຸມປ້ອງກັນຊາດ, ການທະຫານໂດຍກະຊວງປ້ອງກັນປະເທດຫວຽດນາມ ຮັບຜິດຊອບຈັດຕັ້ງໃນປີປະທານອາຊຽນ 2020. ທ່ານພົນໂທ Agus Setiadji ຕີລາຄາສູງຂໍ້ສະເໜີແນະ ແລະຂໍ້ລິເລີ່ມຂອງຫວຽດນາມ ໃນການອອກຖະແຫຼງການລວມຂອງລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ກ່ຽວກັບການຮ່ວມມືດ້ານປ້ອງກັນຊາດໃນການປ້ອງກັນ, ຕ້ານ ໂລກພະຍາດ, ໃຫ້ຄໍາໝັ້ນສັນຍາຈະປະຕິບັດບັນດາເນື້ອໃນຂອງຖະແຫຼງການນີ້ຢ່າງຄົບຖ້ວນ.
ໂດຍ: ຈາງຫງວຽນ