ໂດຍໄດ້ຮັບຄຳເຊີນຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຈະນຳໜ້າຄະນະຜູ້ແທນຂັ້ນສູງຫວຽດນາມ ຢ້ຽມຢາມທາງລັດຖະກິດຢູ່ລາວ ໃນວັນທີ 5 ກຸມພາ.
ເມື່ອແລກປ່ຽນກັບສື່ມວນຊົນ, ທ່ານ ທອງສະຫວັນ ພົມວິຫານ ຢືນຢັນວ່າ ການຢ້ຽມຢາມຄັ້ງນີ້ຂອງທ່ານເລຂາທິການໃຫຍ່ ຈະມີຄວາມໝາຍປະຫວັດສາດ ແລະຂອບຂະໜາດຍຸດທະສາດ, ຊຸກຍູ້ການເຊື່ອມໂຍງຮອບດ້ານລະຫວ່າງສອງປະເທດ ລາວ-ຫວຽດນາມ ໃນທຸກຂົງເຂດ.
    |
 |
|
ທ່ານ ທອງສະຫວັນ ພົມວິຫານ ລັດຖະມົນຕີການຕ່າງປະເທດລາວ ຕອບສຳພາດຕໍ່ສື່ມວນຊົນ. ພາບ: ສຳນັກຂ່າວສານຫວຽດນາມ |
ຕາມທ່ານລັດຖະມົນຕີການຕ່າງປະເທດລາວ ແລ້ວ, ການຢ້ຽມຢາມມີຄວາມສຳຄັນທີ່ສຸດຍ້ອນວ່ານີ້ແມ່ນການຢ້ຽມຢາມຕ່າງປະເທດທຳອິດຂອງທ່ານເລຂາທິການໃຫຍ່ ພາຍຫຼັງຫວຽດນາມ ຈັດຕັ້ງກອງປະຊຸມໃຫຍ່ຜູ້ແທນທົົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມ ປະສົບຜົນສຳເລັດຢ່າງຈົບງາມ.
ພາຍຫຼັງໄດ້ຮັບການເລືອກຕັ້ງໃຫ້ດຳລົງຕຳແໜ່ງເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ສະໄໝທີ XIV ຄືນໃໝ່, ສະຫາຍ ໂຕເລິມ ໄດ້ເລືອກເອົາລາວ ແມ່ນປະເທດທຳອິດເພື່ອມາຢ້ຽມຢາມ, ສິ່ງນີ້ມີຄວາມໝາຍສຳຄັນພິເສດ.
ກ່ອນໜ້ານີ້ບໍ່ດົນ, ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ກໍ່ມີການຢ້ຽມຢາມທາງລັດຖະກິດຢູ່ຫວຽດນາມ ພາຍຫຼັງ ລາວ ຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ ປະສົບຜົນສຳເລັດຢ່າງຈົບງາມ.
ການຢ້ຽມຢາມເຊິ່ງກັນ ແລະກັນຂອງເລຂາທິການໃຫຍ່ສອງປະເທດ ລາວ-ຫວຽດນາມ ໄດ້ດຳເນີນໄປພາຍຫຼັງສອງປະເທດຍົກລະດັບການພົວພັນຂຶ້ນເປັນ “ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະຫຸ້ນສ່ວນຍຸດທະສາດ”. ນີ້ແມ່ນຈຸດໃໝ່ ແລະເພາະສະນັ້ນຈຶ່ງມີຄວາມໝາຍສຳຄັນທີ່ສຸດ.
ກ່ອນໜ້ານີ້, ສອງປະເທດ ລາວ-ຫວຽດນາມ ໄດ້ມີກົນໄກນັ້ນແມ່ນພາຍຫຼັງກອງປະຊຸມໃຫຍ່ຂອງແຕ່ລະພັກ ຈະດຳເນີນການຢ້ຽມຢາມເພື່ອອວຍພອນເຊິ່ງກັນ ແລະກັນ ແລະແຈ້ງໝາກຜົນໃຫ້ກັນຮັບຊາບ. ນີ້ແມ່ນມູນເຊື້ອ ແລະປະຈຸບັນສອງປະເທດໄດ້ປະຕິບັດຕາມຮູບການຢ້ຽມຢາມທາງລັດຖະກິດໂດຍເລຂາທິການໃຫຍ່ ແຈ້ງຜົນກອງປະຊຸມໃຫຍ່ຂອງພັກຂອງແຕ່ລະຝ່າຍ. ສິ່ງນີ້ສະແດງອອກໃຫ້ເຫັນລັກສະນະພິເສດຂອງການພົວພັນ ລາວ-ຫວຽດນາມ.
|
|
 |
|
ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ. ພາບ: ເຟືອງຮວາ. |
ທ່ານລັດຖະມົນຕີການຕ່າງປະເທດລາວ ເນັ້ນໜັກວ່າ ເລື່ອງການນຳຂັ້ນສູງສຸດຂອງສອງປະເທດມີການພົບປະກັນເປັນປະຈຳບໍ່ພຽງແຕ່ສະແດງອອກໃຫ້ເຫັນລັກສະນະທີ່ມີຊີວິດຊີວາເທົ່ານັ້ນ ຫາກຍັງສ່ອງແສງໃຫ້ເຫັນເຖິງລັກສະນະພິເສດຂອງການພົວພັນລະຫວ່າງສອງປະເທດ, ການພັນພົວ “ໜຶ່ງບໍ່ມີສອງໃນໂລກ” ໃນໂລກ; ຊ່ວຍສ້າງຄວາມສະໜິດຕິດພັນ, ເພີ່ມພູນຄູນສ້າງນ້ຳໃຈມິດຕະພາບທີ່ຍິ່ງໃຫຍ່ແບບພິເສດ. ສິ່ງນີ້ກໍ່ຊ່ວຍໃຫ້ລຸ້ນໜຸ່ມສອງປະເທດເຂົ້າໃຈແຈ້ງກວ່າກ່ຽວກັບຄວາມສຳຄັນ ແລະລັກສະນະພິເສດຂອງສາຍພົວພັນລາວ-ຫວຽດນາມ.
ໃນສະພາບການຕົວຈິງ, ການພົວພັນແບບພິເສດ ລາວ-ຫວຽດນາມ ມີຕົ້ນກຳເນີດມາຈາກປະຫວັດສາດທີ່ສະໜິດຕິດພັນລະຫວ່າງສອງພັກ, ພັກປະຊາຊົນປະຕິວັດລາວ ແລະພັກກອມມູນິດຫວຽດນາມ ລ້ວນແຕ່ກຳເນີດມາຈາກພັກກອມມູນິດອິນດູຈີນ. ການນຳລຸ້ນຕ່າງໆຂອງສອງປະເທດ, ບັນດານັກຮົບປະຕິວັດ ແລະປະຊາຊົນສອງປະເທດ ຍາມໃດກໍ່ພ້ອມແລ້ວທີ່ຈະເສຍສະຫຼະຊີວິດເພື່ອກັນ, ສ້າງສາຍພົວພັນແບບພິເສດລາວ-ຫວຽດນາມ, ເປັນມໍລະດົກເຊິ່ງຮຸ່ນສືບທອດຕ້ອງມີຄວາມຮັບຜິດຊອບຮັກສາ ແລະພັດທະນາ.
ຕາມທ່ານ ທອງສະຫວັນ ພົມວິຫານ ແລ້ວ, ລາວ ແລະຫວຽດນາມ ແມ່ນສອງປະເທດບ້ານໃກ້ເຮືອນຄຽງທີ່ມີສາຍພູ ແລະແມ່ນ້ຳຕິດຈອດກັນ, ປະຊາຊົນສອງປະເທດມີຮີດຄອງປະເພນີຄ້າຍຄືກັນ. ໃນປະຫວັດສາດ, ສອງປະເທດ ລາວ-ຫວຽດນາມ ຍາມໃດກໍ່ຮ່ວມກັນຕໍ່ສູ້, ພ້ອມກັນຍາດເອົາເອກະລາດ ແລະປະຈຸບັນສືບຕໍ່ຄຽງບ່າຄຽງໄຫຼ່, ຮ່ວມເດີນທາງພ້ອມກັນພັດທະນາ.
ເລື່ອງ ລາວ-ຫວຽດນາມ ຍົກລະດັບການພົວພັນຂຶ້ນເປັນ “ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະຫຸ້ນສ່ວນຍຸດທະສາດ” ຄັ້ງນີ້ໄດ້ສຸມໃສ່ການພັດທະນາ, ເພື່ອໃຫ້ເໝາະສົມກັບການພົວພັນແບບພິເສດດັ່ງກ່າວ.
ໃນໄລຍະຜ່ານມາ, ການພົວພັນລະຫວ່າງລາວ ແລະຫວຽດນາມ ສຳລັບດ້ານການເມືອງ ແລະການປ້ອງກັນຊາດ-ປ້ອງກັນຄວາມສະຫງົບ ຍາມໃດກໍ່ຮັກສາບົດບາດຫຼັກແຫຼ່ງ, ກຳນົດທິດສັງລວມໃນການພົວພັນລະຫວ່າງສອງປະເທດ. ໃນໄລຍະຈະມາເຖິງ, ບົນພື້ນຖານຄວາມສາມາດບົ່ມຊ້ອນອັນໃຫຍ່ຫຼວງ ເຊິ່ງສອງປະເທດທີ່ມີຢູ່ແລ້ວ, ລາວ-ຫວຽດນາມ ຄວນຊຸກຍູ້ການຮ່ວມມືກ່ຽວກັບການພັດທະນາເສດຖະກິດ-ສັງຄົມຢ່າງແຂງແຮງ.
ເລື່ອງສອງປະເທດ ລາວ-ຫວຽດນາມ ຍົກລະດັບການພົວພັນຂຶ້ນເປັນ “ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະຫຸ້ນສ່ວນຍຸດທະສາດ” ມີຄວາມໝາຍເລິກເຊິ່ງ, ຮອບດ້ານ ແລະກວ້າງຂວາງທີ່ສຸດ. ສິ່ງນີ້ຮຽກຮ້ອງມາຍັງສອງປະເທດຕ້ອງເພີ່ມທະວີຄວາມສະໜິດຕິດພັນ, ເຊື່ອມຕໍ່ ແລະເຊື່ອມໂຍງ.
ບັນດາຂົງເຂດ, ຄື: ຄົມມະນາຄົມ-ຂົນສົ່ງ, ພະລັງງານ, ເສດຖະກິດ-ການຄ້າ, ໂລຈິດສະຕິກ, ການທ່ອງທ່ຽວ... ລ້ວນແຕ່ໄດ້ເຊື່ອມຕໍ່ຄົບຊຸດ, ລວມທັງບັນດາໂຄງການລົງທຶນເພື່ອສ້າງແຮງຂັບເຄື່ອນໃຫ້ແກ່ການເຕີບໂຕຂອງສອງປະເທດ.
ທ່ານລັດຖະມົນຕີການຕ່າງປະເທດລາວ ສະແດງຄວາມເຊື່ອໝັ້ນຢ່າງແນ່ວແນ່ວ່າ ການຢ້ຽມຢາມທາງລັດຖະກິດຢູ່ລາວ ຄັ້ງນີ້ຂອງທ່ານ ໂຕເລິມ ຈະປະສົບຜົນສຳເລັດຢ່າງຈົບງາມຕາມເປົ້າໝາຍວາງອອກ. ເພາະວ່າ ການນຳຂັ້ນສູງສຸດຂອງສອງພັກ, ສອງລັດ, ພ້ອມດ້ວຍທຸກກະຊວງ, ຂະແໜງການຂອງສອງປະເທດລ້ວນແຕ່ເຫັນດີເປັນເອກະພາບຢ່າງສູງ ແລະມີຄວາມຕັດສິນໃຈຊຸກຍູ້ການຮ່ວມມືພັດທະນາ.
|
|
 |
|
ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍພັນລະຍາ ແລະທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ. ພາບ: ສຳນັກຂ່າວສານຫວຽດນາມ. |
ທ່ານລັດຖະມົນຕີການຕ່າງປະເທດລາວ ໃຫ້ຮູ້ວ່າ ປີ 2026 ແມ່ນປີບານພັບຂອງວິວັດທະນາການນຳປະເທດລາວ ໃຫ້ຫຼຸດພົ້ນອອກຈາກສະພາບການປະເທດດ້ອຍພັດທະນາຕາມຂໍ້ກຳນົດຂອງສະຫະປະຊາຊາດ. ນີ້ທັງແມ່ນສິ່ງທ້າທາຍ, ທັງແມ່ນກາລະໂອກາດ ແລະແມ່ນຈຸດເວລາຕັດສິນເພື່ອນຳປະເທດລາວ ໃຫ້ພັດທະນາຢ່າງແຂງແຮງ, ຫັນການ “ກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ” ໃຫ້ປະກົດຜົນເປັນຈິງ. ໃນຄວາມມານະພະຍາຍາມນີ້, ຫວຽດນາມ ຍາມໃດກໍ່ສະຫງວນໃຫ້ລາວ ການສະໜັບສະໜູນຈົນສຸດຄວາມສາມາດຂອງຕົນ ແລະຝ່າຍລາວ ກໍ່ມີຄວາມເຊື່ອໝັ້ນວ່າ ຜົນສຳເລັດນີ້ຈະສ້າງກຳລັງຜັກດັນ ເພື່ອຊຸກຍູ້ການພັດທະນາຂອງລາວ.
ທ່ານລັດຖະມົນຕີການຕ່າງປະເທດລາວ ໄດ້ເນັ້ນໜັກເປັນພິເສດວ່າ ເຖິງວ່າສະພາບການພາກພື້ນ ແລະສາກົນ ຈະສືບຕໍ່ຜັນແປສັບສົນກໍ່ຕາມ, ແຕ່ ລາວ ຍັງຄົງຢຶດໝັ້ນພ້ອມກັບຫວຽດນາມ ຈັບມືກັນ, ພ້ອມກັນພັດທະນາ ແລະພ້ອມກັນຍາດໄດ້ຜົນສຳເລັດຄືຄວາມຄອງຄອຍ, ນຳເອົາຜົນປະໂຫຍດມາໃຫ້ປະຊາຊົນສອງປະເທດ ແລະຮັບໃຊ້ກິດຈະການສ້າງສາ ແລະພັດທະນາປະເທດຂອງແຕ່ລະປະເທດ.
ຝ່າຍລາວ ສະແດງຄວາມຂອບອົກຂອບໃຈຝ່າຍຫວຽດນາມ ທີ່ໄດ້ໜູນຊ່ວຍ, ຊ່ວຍເຫຼືອ ແລະອຳນວຍຄວາມສະດວກເພື່ອໃຫ້ລາວ ມີປະຕູອອກສູ່ທະເລ, ແຕ່ວ່າປະຈຸບັນ ລາວ ໄດ້ມີທ່າກຳປັ່ນແລ້ວ, ນີ້ແມ່ນສິ່ງທີ່ໜ້າເອກອ້າງທະນົງໃຈທີ່ສຸດ ແລະແມ່ນພື້ນຖານໂຄງລ່າງຄົມມະນາຄົມທີ່ມີຄວາມສຳຄັນທີ່ສຸດ.
ປະຈຸບັນ, ລາວ ແລະຫວຽດນາມ ພວມສຸມໃສ່ຊຸກຍູ້ການກໍ່ສ້າງເສັ້ນທາງດ່ວນວຽງຈັນ-ຮ່າໂນ້ຍ ແລະເສັ້ນທາງລົດໄຟເຊື່ອມຕໍ່ທ່າກຳປັ່ນ. ນີ້ແມ່ນບັນດາໂຄງການທີ່ມີຄວາມສຳຄັນທີ່ສຸດ ແລະຫວັງວ່າສອງປະເທດ ລາວ-ຫວຽດນາມ ຈະສົມທົບກັນຊອກຫາບັນດາຄູ່ຮ່ວມມືພາຍນອກມາເຂົ້າຮ່ວມວິວັດທະນາການພັດທະນາ, ຍ້ອນວ່ານີ້ແມ່ນບັນດາໂຄງການບໍ່ພຽງແຕ່ໃນຂອບເຂດພັດທະນາຂອງສອງປະເທດ ລາວ-ຫວຽດນາມ ເທົ່ານັ້ນ, ຫາກຍັງປະກອບສ່ວນເຂົ້າໃນການພັດທະນາລວມຂອງພາກພື້ນ.
ຖ້າວ່າ ລາວ ມີພື້ນຖານໂຄງລ່າງຄົມມະນາຄົມໄປຊອດທະເລຕາເວັນອອກ, ສິ່ງນີ້ກໍ່ມີຄວາມໝາຍວ່າແລວທາງເສດຖະກິດຕາເວັນອອກ-ຕາເວັນຕົກໄດ້ເປີດຊ່ອງທາງເຊື່ອມຕໍ່ແລ້ວ. ນີ້ແມ່ນຜົນປະໂຫຍດລວມຂອງອະນຸພາກພື້ນ ກໍ່ຄືໃນອາຊຽນ.
ໂດຍ: ແສງເດືອນ