ນັກຂ່າວ: ຂໍຮຽນທ່ານເອກອັກຄະລັດຖະທູດ, ຂໍທ່ານໃຫ້ຮູ້ຄວາມໝາຍການຢ້ຽມຢາມສໍາລັບການພົວພັນສອງປະເທດ.
ທ່ານເອກອັກຄະລັດຖະທູດ ຟ້າມກວາງຮ້ຽວ: ໂດຍໄດ້ຮັບຄໍາເຊີນຂອງສະພາສູງຍີ່ປຸ່ນ, ທ່ານປະທານສະພາແຫ່ງຊາດຫວຽດນາມ ຈະຢ້ຽມຢາມຍີ່ປຸ່ນ ຢ່າງເປັນທາງການຄັ້ງທຳອິດໃນລະຫວ່າງວັນທີ 3-7 ທັນວາ. ນີ້ກໍ່ແມ່ນການຢ້ຽມຢາມຍີ່ປຸ່ນ ຄັ້ງທຳອິດຂອງທ່ານປະທານສະພາແຫ່ງຊາດຫວຽດນາມ ພາຍຫຼັງ 12 ປີ ນັບແຕ່ປີ 2012. ໃນການຢ້ຽມຢາມ, ທ່ານປະທານສະພາແຫ່ງຊາດ ຈະເຂົ້າເຝົ້າພະເຈົ້າຈັກກະພັດຍີ່ປຸ່ນ; ພົບປະກັບທ່ານປະທານສະພາສູງ, ມີການພົບປະກັບນາຍົກລັດຖະມົນຕີ, ປະທານສະພາຕໍ່າ, ການນຳບາງພັກໃຫຍ່, ການນຳອົງການຈັດຕັ້ງເສດຖະກິດໃຫຍ່ຂອງຍີ່ປຸ່ນ; ພົບປະກັບຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ ຍີ່ປຸ່ນ; ທ່ານປະທານສະພາແຫ່ງຊາດ ເຈິ່ນແທັງເໝິນ ກໍ່ຈະໄປຢ້ຽມຢາມນະຄອນ Nagasaki.
    |
 |
|
ທ່ານ ຟ້າມກວາງຮ້ຽວ ເອກອັກຄະລັດຖະທູດຫວຽດນາມ ປະຈຳ ຍີ່ປຸ່ນ. ພາບ: ສໍານັກຂ່າວ ສານຫວຽດນາມ |
ການຢ້ຽມຢາມດຳເນີນໄປໃນໂອກາດທີ່ສອງປະເທດຫາກໍ່ສະເຫຼີມສະຫຼອງ 1 ປີແຫ່ງການຍົກລະດັບການພົວພັນ “ຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະຄວາມວັດທະນາຖາວອນຢູ່ ອາຊີ ແລະໂລກ”; ການພົວພັນ ຫວຽດນາມ-ຍີ່ປຸ່ນ ສືບຕໍ່ພັດທະນາຢ່າງແຂງແຮງ ແລະຮອບດ້ານໃນທຸກຂົງເຂດດ້ວຍຄວາມໄວ້ເນື້ອເຊື່ອໃຈດ້ານການເມືອງສູງ, ການພົບປະແລກປ່ຽນຂັ້ນສູງ ແລະທຸກຂັ້ນດໍາເນີນຢ່າງສະໜິດສະໜົມ. ບົນພື້ນຖານສາຍພົວພັນອັນດີງາມນັ້ນ, ການຢ້ຽມຢາມຍີ່ປຸ່ນ ຂອງທ່ານປະທານສະພາແຫ່ງຊາດ ເຈິ່ນແທັງເໝິນ ຈະເຮັດໃຫ້ການພົວພັນ ຫວຽດນາມ-ຍີ່ປຸ່ນ ໃນຂອບເຂດການພົວພັນຮ່ວມມືໃໝ່, ເປັນຕົ້ນແມ່ນລະຫວ່າງອົງການນິຕິບັນຍັດຂອງສອງປະເທດເລິກເຊິ່ງກວ່າອີກ, ສ້າງກຳລັງໜູນທີ່ແຂງແຮງໃຫ້ແກ່ການພັດທະນາໃນຂົງເຂດເສດຖະກິດ, ການຄ້າ, ການລົງທຶນ, ການອອກແຮງງານ, ນຳມາເຊິ່ງຜົນປະໂຫຍດແທດຈິງຫຼາຍຢ່າງໃຫ້ປະຊາຊົນສອງປະເທດ. ໃນສະພາບການທີ່ປະເທດເຮົາ ກ້າວເຂົ້າສູ່ສັງກາດໃໝ່, ສັງກາດບືນຕົວຂຶ້ນຂອງຊາດ, ການຮ່ວມເດີນທາງ, ໜູນຊ່ວຍຂອງເພື່ອນມິດສາກົນ, ເປັນຕົ້ນແມ່ນ ຍີ່ປຸ່ນ, ສວມບົດບາດສຳຄັນທີ່ສຸດ.
ນັກຂ່າວ: ຂໍຮຽນທ່ານເອກອັກຄະລັດຖະທູດ, ທ່ານຈົ່ງໃຫ້ຮູ້ ທ່າແຮງໃນການພົວພັນສອງປະເທດແມ່ນຍັງແດ່?
ທ່ານເອກອັກຄະລັດຖະທູດ ຟ້າມກວາງຮ້ຽວ: ໃນ 50 ປີຜ່ານມາ, ດ້ວຍຂີດໝາຍປະຫວັດສາດນັ້ນແມ່ນສອງປະເທດໄດ້ຍົກລະດັບການພົວພັນຂຶ້ນເປັນ “ຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະຄວາມວັດທະນາຖາວອນຢູ່ອາຊີ ແລະໃນໂລກ” ໃນເດືອນ ພະຈິກ 2023, ການພົວພັນສອງປະເທດໄດ້ຮັບການພັດທະນາຢ່າງແຂງແຮງ, ກະໂດດຂັ້ນ ແລະຮອບດ້ານ ດ້ວຍຄວາມໄວ້ເນື້ອເຊື່ອໃຈດ້ານການເມືອງສູງ.
ການນຳສອງປະເທດ ໄດ້ພົບປະ, ແລກປ່ຽນເປັນປະຈໍາ ແລະວາງທິດທາງໃຫຍ່ໃຫ້ແກ່ການພັດທະນາການພົວພັນໃນທຸກຂົງເຂດຢ່າງມີປະສິດທິຜົນ, ນັ້ນແມ່ນທ່າແຮງອັນໃຫຍ່ຫຼວງໃນການພົວພັນສອງປະເທດ. ນອກຈາກນັ້ນ, ເສດຖະກິດຫວຽດນາມ ແລະຍີ່ປຸ່ນ ມີລັກສະນະເພີ່ມເຕີມໃຫ້ກັນ. ຫວຽດນາມ ມີປະຊາກອນກວ່າ 100 ລ້ານຄົນ, ມີພື້ນຖານເສດຖະກິດຂະຫຍັນຂັນເຄື່ອນ, ມີການເຕີບໂຕຢ່າງວ່ອງໄວ, ມີກຳລັງແຮງງານໜຸ່ມ, ມີທັກສະ ແລະລະດັບວິຊາການທີ່ດີ; ສະພາບແວດລ້ອມທາງດ້ານເສດຖະກິດ, ການເມືອງໝັ້ນຄົງ, ເປັນເງື່ອນໄຂສະດວກໃຫ້ແກ່ການລົງທຶນ, ດໍາເນີນທຸລະກິດ, ປະຊາຊົນເປັນມິດ ແລະໄດ້ຮັບການຕີລາຄາສູງຈາກບັນດານັກລົງທຶນຍີ່ປຸ່ນ ແລະເຂົາເຈົ້າຢາກລົງທຶນໄລຍະຍາວຢູ່ຫວຽດນາມ
ນອກຈາກນັ້ນ, ປະຊາຊົນສອງປະເທດຫວຽດນາມ ແລະຍີ່ປຸ່ນ ກໍ່ມີຫຼາຍສິ່ງຫຼາຍຢ່າງທີ່ຄ້າຍຄືກັນທາງດ້ານວັດທະນະທໍາ, ຮີດຄອງປະເພນີ ແລະການພົບປະແລກປ່ຽນທີ່ມີມາແຕ່ດົນນານ. ສາຍພົວພັນນີ້ໄດ້ຮັບການເພີ່ມພູນຄູນສ້າງຈາກຫຼາຍລຸ້ນຄົນກາຍເປັນສາຍພົວພັນສະໜິດຕິດພັນປະຈຸບັນ.
ນັກຂ່າວ: ຕາມທ່ານເອກອັກຄະລັດຖະທູດ ແລ້ວ, ໃນໄລຍະຈະມາເຖິງ, ສະພາແຫ່ງຊາດຫວຽດນາມ ແລະລັດຖະສະພາຍີ່ປຸ່ນ ຕ້ອງເຮັດຫຍັງແດ່ ເພື່ອພ້ອນກັນຊຸກຍູ້ການຫັນຂອບເຂດການພົວພັນຄູ່ຮ່ວມມືຍຸດທະສາດຮອບດ້ານທີ່ສ້າງຂຶ້ນໃໝ່ເປັນລະອຽດ?
ທ່ານເອກອັກຄະລັດຖະທູດ ຟ້າມກວາງຮ້ຽວ: ການຮ່ວມມືລະຫວ່າງອົງການນິຕິບັນຍັດສອງປະເທດສວມບົດບາດສຳຄັນໃນການພົວພັນ ຫວຽດນາມ-ຍີ່ປຸ່ນ. ສະນັ້ນ, ການຢ້ຽມຢາມ, ແລກປ່ຽນຂັ້ນສູງ ແລະທຸກຂັ້ນ; ການເພີ່ມທະວີການພົວພັນຮ່ວມມືລະຫວ່າງອົງການວິຊາການຂອງສະພາແຫ່ງຊາດສອງປະເທດມີຄວາມໝາຍແທດຈິງ ແລະຍາວນານ.
ໃນໄລຍະຜ່ານມາ, ສອງປະເທດໄດ້ມີຄວາມຕັດສິນໃຈດ້ານການເມືອງສູງແນໃສ່ເພີ່ມທະວີເຊື່ອມຕໍ່ພື້ນຖານເສດຖະກິດສອງປະເທດ. ສະພາແຫ່ງຊາດຫວຽດນາມ ແລະລັດຖະສະພາຍີ່ປຸ່ນ ຈະເພີ່ມທະວີບັນດາກົນໄກແລກປ່ຽນບົດຮຽນປະສົບການໃນວຽກງານນິຕິບັນຍັດ, ເປັນຕົ້ນແມ່ນໃນການກໍ່ສ້າງລະບອບລະບຽບການສ້າງເງື່ອນໄຂໃຫ້ເສດຖະກິດ-ສັງຄົມຂອງປະເທດ ພັດທະນາຢ່າງແຂງແຮງ, ເປັນຕົ້ນແມ່ນເມື່ອປະເທດເຮົາ ກ້າວເຂົ້າສູ່ສັງກາດໃໝ່, ສັງກາດບືນຕົວຂຶ້ນຂອງຊາດ. ໂດຍແມ່ນປະເທດທີ່ຫຼາຍບົດຮຽນປະສົບການໃນວຽກງານກໍ່ສ້າງກົດໝາຍ ແລະບໍາລຸງສ້າງນັກຊ່ຽວຊານດ້ານກົດໝາຍ, ຍີ່ປຸ່ນ ສາມາດໜູນຊ່ວຍຫວຽດນາມ ໃນການຍົກສູງຄວາມສາມາດສ້າງກົດໝາຍຢ່າງມີປະສິດທິຜົນ. ສອງຝ່າຍກໍ່ຈະສືບຕໍ່ສົມທົບກັນຢ່າງແໜ້ນແຟ້ນ ແລະມີປະສິດທິຜົນຢູ່ເວທີປາໄສລັດຖະສະພາຫຼາຍຝ່າຍຢູ່ພາກພື້ນ ແລະໂລກ, ຄື: ສະຫະພັນລັດຖະສະພາສາກົນ (IPU), ສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ (AIPA), ເວທີປາໄສລັດຖະສະພາອາຊີ-ປາຊີຟິກ (APPF)…
ນັກຂ່າວ: ຂໍຮຽນທ່ານເອກອັກຄະລັດຖະທູດ, ຂໍທ່ານໃຫ້ຮູ້ຕ້ອງເຮັດແນວໃດເພື່ອໃຫ້ການພົວພັນສອງປະເທດນັບມື້ນັບເຂົ້າສູ່ລວງເລິກ?
ທ່ານເອກອັກຄະລັດຖະທູດ ຟ້າມກວາງຮ້ຽວ: ຄວາມສາມາດບົ່ມຊ້ອນຮ່ວມມືລະຫວ່າງສອງປະເທດຍັງໃຫຍ່ຫຼວງຢູ່, ເພາະວ່າສອງປະເທດມີຄວາມໄວ້ເນື້ອເຊື່ອໃຈ ແລະທ່າແຮງສາມາດເພີ່ມເຕີມໃຫ້ກັນເພື່ອພ້ອມກັນພັດທະນາ. ໃນໄລຍະຈະມາເຖິງ, ພາກເຮົາ ຄວນສຸມໃສ່ຊຸກຍູ້ຜັນຂະຫຍາຍການປະຕິບັດຂໍ້ຕົກລົງຂັ້ນສູງ, ສຸມໃສ່ບັນດາຂົງເຂດ, ຄື: ທີໜຶ່ງ, ສືບຕໍ່ເພີ່ມທະວີການພົວພັນດ້ານການເມືອງທີ່ໄວ້ເນື້ອເຊື່ອໃຈຜ່ານການຢ້ຽມຢາມ, ການພົບປະທຸກຂັ້ນ, ເປັນຕົ້ນແມ່ນຂັ້ນສູງ.
ທີສອງ, ຂຸດຄົ້ນທ່າແຮງເພີ່ມເຕີມເຊິ່ງກັນ ແລະກັນຂອງສອງພື້ນຖານເສດຖະກິດ, ເພີ່ມທະວີການເຊື່ອມຕໍ່ເສດຖະກິດລະຫວ່າງສອງປະເທດ, ຖື ຍີ່ປຸ່ນ ເປັນຄູ່ຮ່ວມມືແຖວໜ້າຂອງຫວຽດນາມ ກ່ຽວກັບ ODA, ການລົງທຶນ, ການຄ້າ ແລະແຮງງານ...
ທີສາມ, ຊຸກຍູ້ການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນ, ຄື: ການຫັນເປັນດີຈີຕອນ, ເສດຖະກິດດີຈີຕອນ, ສັງຄົມດີຈີຕອນ, ການຫັນເປັນສີຂຽວ...
ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!
ໂດຍ: ເຈິ່ນຮວ່ຽນ