ພາຍຫຼັງພິທີປະດັບຫຼຽນໄຊ, ທ່ານ ເລຮ່ວາຍຈູງ ໄດ້ໃຫ້ການຕ້ອນຮັບທ່ານ  Marc Knapper ເນື່ອງໃນໂອກາດທີ່ທ່ານສໍາເລັດໜ້າທີ່ການທູດ ຢູ່ ສສ ຫວຽດນາມ ແລະກະກຽມເດີນທາງກັບຄືນປະເທດ.

ທີ່ການຕ້ອນຮັບ, ທ່ານ ເລຮ່ວາຍຈູງ ໄດ້ສະແດງຄວາມຊົມເຊີຍຕໍ່ທ່ານ Marc Knapper ທີ່ໄດ້ສໍາເລັດໜ້າທີ່ການທູດ ຢູ່ ສສ ຫວຽດນາມ; ຕີລາຄາສູງການປະກອບສ່ວນອັນສຳຄັນຂອງທ່ານທູດ ໃນການຊຸກຍູ້ການພົວພັນ ຫວຽດນາມ - ອາເມລິກາ ໃຫ້ນັບມື້ນັບເລິກເຊິ່ງກວ້າງຂວາງ ແລະແທດຈິງໃນຫຼາຍຂົງເຂດ, ພິເສດແມ່ນເລື່ອງສອງປະເທດຍົກລະດັບການພົວພັນ ຂຶ້ນເປັນຄູ່ຮ່ວມມືຍຸດທະສາດຮອບດ້ານໃນເດືອນກັນຍາ ປີ 2023.

leftcenterrightdel
ໂດຍໄດ້ຮັບການມອບສິດຈາກທ່ານ ເລືອງເກື່ອງ ປະທານປະເທດ, ທ່ານ ເລຮ່ວາຍຈູງ  ເລຂາທິການສູນກາງພັກ, ລັດຖະມົນຕີກະຊວງການຕ່າງປະເທດ ໄດ້ປະດັບຫຼຽນໄຊມິດຕະພາບໃຫ້ແກ່ທ່ານ  Marc Evans Knapper ເອກອັກຄະລັດຖະທູດອາເມລິກາ ປະຈໍາຫວຽດນາມ. ພາບ: mofa.gov.vn

ທ່ານ ເລຮ່ວາຍຈູງ ໄດ້ຕີລາຄາສູງການສົມທົບກັນຢ່າງແໜ້ນແຟ້ນລະຫວ່າງສະຖານທູດອາເມລິກາ ປະຈໍາຫວຽດນາມ ແລະກະຊວງການຕ່າງປະເທດຫວຽດນາມ ໃນການຜັນຂະຫຍາຍບັນດາຂໍ້ຕົກລົງຂັ້ນສູງ ແລະໂຄງການຮ່ວມມືລະອຽດ, ນໍາມາເຊິ່ງຜົນປະໂຫຍດແທດຈິງໃຫ້ແກ່ປະຊາຊົນສອງປະເທດ; ພ້ອມທັງສະເໜີໃຫ້ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນ ແລະ ຜັນຂະຫຍາຍບັນດາໂຄງການດໍາເນີນງານ ທີ່ການນຳຂັ້ນສູງສອງປະເທດໄດ້ເຫັນດີເປັນເອກະພາບໃຫ້ມີປະສິດທິຜົນ, ບົນພື້ນຖານເຄົາລົບເອກະລາດ, ອະທິປະໄຕ, ຜົນປະໂຫຍດຂອງແຕ່ລະປະເທດ, ເພື່ອສັນຕິພາບ, ການຮ່ວມມື, ພັດທະນາຢູ່ພາກພື້ນ ແລະ ໃນໂລກ.

ກ່າວຄຳເຫັນທີ່ການຕ້ອນຮັບ, ທ່ານ Marc Knapper ຢືນຢັນຄວາມເອກອ້າງທະນົງໃຈເມື່ອມີການປະກອບສ່ວນເຂົ້າໃນການພັດທະນາຢ່າງແຂງແຮງຂອງການພົວພັນລະຫວ່າງສອງປະເທດ, ພິເສດແມ່ນການຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ, ຜ່ານນັ້ນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເປີດກວ້າງການຄ້າ, ຍົກສູງປະສິດທິຜົນການຮ່ວມມືໃນຫຼາຍຂົງເຂດ ຄື: ການປ້ອງກັນຊາດ-ປ້ອງກັນຄວາມສະຫງົບ, ໜູນຊ່ວຍມະນຸດສະທຳ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ພະລັງງານ, ວິທະຍາສາດ-ເຕັກໂນໂລຊີ. ທ່ານ Marc Knapper ຢືນຢັນຄືນໃໝ່ວ່າ, ບໍ່ວ່າຈະດຳລົງຕຳແໜ່ງໃດໃນອະນາຄົດ, ທ່ານເອງ ຍາມໃດກໍ່ຈະເປັນເພື່ອນມິດຂອງຫວຽດນາມ, ສືບຕໍ່ສະໜັບສະໜູນ ແລະຮ່ວມເດີນທາງພ້ອມກັບການພັດທະນາຂອງການພົວພັນ ຫວຽດນາມ-ອາເມລິກາ.

ໂດຍ: ທູຈາງ