    |
 |
|
ທ່ານ ໂຕເລີມ ເລຂາທິການໃຫຍ່ ພົບປະກັບທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ທີ່ສຳນັກງານສູນກາງພັກ ໃນວັນທີ 2 ກັນຍາ 2025. ພາບ: ສໍານັກຂ່າວສານຫວຽດນາມ |
ຕາມທ່ານນາງ ຄຳເພົາ ເອີນທະວັນ ແລ້ວ, ການເດີນທາງໄປເຮັດວຽກຢູ່ລາວ ຂອງທ່ານ ໂຕເລີມ ເລຂາທິການໃຫຍ່ ໄດ້ສະແດງໃຫ້ເຫັນການຖືເປັນສຳຄັນພິເສດຂອງຫວຽດນາມ ທີ່ມີຕໍ່ລາວ. ນີ້ແມ່ນສານທີ່ເຂັ້ມແຂງເຊິ່ງໄດ້ຢືນຢັນໃນນະໂຍບາຍການຕ່າງປະເທດຂອງຕົນ, ຫວຽດນາມ ຍາມໃດກໍ່ສະຫງວນບຸລິມະສິດແຖວໜ້າໃຫ້ແກ່ການພົວພັນກັບລາວ. ສິ່ງເຫຼົ່ານີ້ມີຄວາມໝາຍອັນໃຫຍ່ຫຼວງໃນສະພາບການ ພາກພື້ນ ແລະໂລກມີການຜັນແປຢ່າງສັບສົນຫຼາຍຢ່າງ, ຍິ່ງສະແດງໃຫ້ເຫັນການຕັດສິນໃຈຂອງສອງພັກ, ສອງລັດໃນການຮັກສາ, ພັດທະນາສາຍພົວພັນທີ່ເປັນແບບຢ່າງ, ສັດຊື່ບໍລິສຸດ ແລະຫາຍາກໃນໂລກ.
ການໄປປະຕິບັດງານໃນຄັ້ງນີ້ ກໍ່ຈະສ້າງກໍາລັງແຮງໃໝ່ໃຫ້ແກ່ການຮ່ວມມືຍຸດທະສາດລະຫວ່າງສອງປະເທດຍ້ອນວ່າສອງຝ່າຍຈະຮ່ວມກັນກວດກາຄືນ ແລະຊຸກຍຸ້ການຈັດຕັ້ງປະຕິບັດຂໍ້ຕົກລົງຂັ້ນສູງ, ເປີດທິດທາງການຮ່ວມມືໃໝ່ທີ່ເໝາະສົມກັບເງື່ອນໄຂຕົວຈິງຂອງແຕ່ລະປະເທດ. “ພວກເຮົາຫວັງວ່າ ການໄປປະຕິບັດງານຄັ້ງນີ້ຂອງທ່ານ ໂຕເລີມ ຈະສ້າງກໍາລັງແຮງທີ່ເຂັ້ມແຂງ ແລະວິໄສທັດໃໝ່ໃຫ້ແກ່ການພົວພັນລະຫວ່າງສອງປະເທດ. ນີ້ແມ່ນຈຸດເວລາທີ່ທັງຫວຽດນາມ ແລະລາວ ພວມກ້າວໄປເຖິງເປົ້າໝາຍການພັດທະນາທີ່ສຳຄັນ. ທ່ານນາງ ຄຳເພົາ ເອີນທະວັນ ເນັ້ນໜັກວ່າ, "ພວກຂ້າພະເຈົ້າ ເຊື່ອໝັ້ນວ່າ ຜົນຂອງການປະຕິບັດງານຄັ້ງນີ້ຈະປະກອບສ່ວນເຂົ້າໃນການປັບປຸງຄວາມໄວ້ເນື້ອເຊື່ອໃຈທາງດ້ານການເມືອງ, ເປີດທິດທາງການຮ່ວມມືໃໝ່, ສ້າງເງື່ອນໄຂໃຫ້ທັງສອງປະເທດພ້ອມກັນພັດທະນາໃຫ້ຈະເລີນຮຸ່ງເຮືອງໃນໄລຍະໃໝ່ທີ່ເຕັມໄປດ້ວຍໂອກາດແຕ່ກໍ່ຍັງມີສິ່ງທ້າທາຍຫຼາຍຢ່າງ."
|
|
 |
|
ການນຳພັກ ແລະລັດຫວຽດນາມ ພ້ອມກັບທ່ານນາງ ຄຳເພົາ ເອີນທະວັນ ເອກອັກຄະລັດຖະທູດລາວ ປະຈຳ ຫວຽດນາມ ແລະຄະນະຜູ້ແທນເຂົ້າຮ່ວມງານລ້ຽງ ສະເຫຼີມສະຫຼອງແຫ່ງວັນຊາດລາວ ຄົບຮອບ 50 ປີ ຈັດຢູ່ສະຖານທູດລາວ ປະຈຳຫວຽດນາມ ໃນວັນທີ 26 ພະຈິກ. ພາບ: ຫວູຮວ່າງ |
ທ່ານນາງເອກອັກຄະລັດຖະທູດ ໃສ່ໃຈວ່າ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ແລະທ່ານ ຟ້າມມິງຈິງ ນາຍົກລັດຖະມົນຕີແຫ່ງ ສສຫວຽດນາມ ຈະເປັນປະທານຮ່ວມໃນກອງປະຊຸມຄັ້ງທີ 48 ຂອງຄະນະກຳມະການລະຫວ່າງລັດຖະບານ ຫວຽດນາມ-ລາວ ສະແດງໃຫ້ເຫັນເຖິງຄວາມເອົາໃຈໃສ່ເປັນພິເສດຂອງການນຳຂັ້ນສູງຕໍ່ການຮ່ວມມືສອງຝ່າຍ. ໃນຊຸມປີມໍ່ໆມານີ້, ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງລາວ ແລະຫວຽດນາມ ສືບຕໍ່ພັດທະນາຢ່າງແຂງແຮງ, ບັນລຸໄດ້ຜົນງານເປັນໜ້າຊົມຊື່ນ. ຫຼາຍໂຄງການລົງທຶນຍຸດທະສາດຂອງຫວຽດນາມ ໄດ້ ແລະພວມໄດ້ຜັນຂະຫຍາຍຢ່າງມີປະສິດທິຜົນ, ປະກອບສ່ວນຢ່າງແທດຈິງເຂົ້າໃນການພັດທະນາເສດຖະກິດ-ສັງຄົມຂອງລາວ, ສ້າງເງື່ອນໄຂຊຸກຍູ້ການຄ້າສອງຝ່າຍໃຫ້ພັດທະນາແບບຍືນຍົງ. ທ່ານນາງ ຄຳເພົາ ເອີນທະວັນ ໄດ້ກ່າວວ່າ “ດ້ວຍຄໍາໝັ້ນສັນຍາຂອງລັດຖະບານສອງປະເທດ ແລະການເຄື່ອນໄຫວທີ່ຂະຫຍັນຂັນເຄື່ອນຂອງປະຊາຄົມວິສາຫະກິດ, ຂ້າພະເຈົ້າເຊື່ອໝັ້ນວ່າ ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງລາວ ແລະຫວຽດນາມ ຈະສືບຕໍ່ພັດທະນາຢ່າງແຂງແຮງ, ເລິກເຊິ່ງກວ້າງຂວາງກວ່າເກົ່າໃນອະນາຄົດ, ປະກອບສ່ວນສຳຄັນເຂົ້າໃນການປັບປຸງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ.”
|
|
 |
|
ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດລາວ ປະຈໍາຫວຽດນາມ. ພາບ: ສະຖານທູດສະໜອງ |
ການໄປປະຕິບັດງານຢູ່ລາວຂອງທ່ານ ໂຕເລີມ ແລະທ່ານ ຟ້າມມິງຈິງ ໄດ້ດຳເນີນໄປໃນໂອກາດທີ່ສອງປະເທດຫວຽດນາມ ແລະລາວ ແບ່ງປັນຄວາມປິຕິຊົມຊື່ນໃນການສະເຫຼີມສະຫຼອງວັນຊາດລາວ ຄົບຮອບ 50 ປີ (2-12-1975 / 2-12-2025). ທ່ານນາງເອກອັກຄະລັດຖະທູດ ໄດ້ຊີ້ແຈ້ງວ່າ: ໃນຕະຫຼອດເຄິ່ງສະຕະວັດທີ່ຜ່ານມາ, ໃນໄລຍະທາງແຫ່ງການສ້າງສາ, ປົກປັກຮັກສາ ແລະພັດທະນາປະເທດຊາດ, ລາວ ຍາມໃດກໍ່ໄດ້ຮັບການສະໜັບສະໜູນອັນລໍ້າຄ່າ, ສຸດອົກສຸດໃຈຂອງຫວຽດນາມ. ນັ້ນແມ່ນແຫຼ່ງກຳລັງໃຈອັນຍິ່ງໃຫຍ່, ປະກອບສ່ວນເຂົ້າໃນການຊ່ວຍເຫຼືອປະຊາຊົນລາວບັນດາເຜົ່າຜ່ານຜ່າຄວາມຫຍຸ້ງຍາກ ແລະສິ່ງທ້າທາຍ, ບັນລຸໄດ້ຜົນງານທີ່ສຳຄັນ. “ຫວຽດນາມ ຍາມໃດກໍ່ສະຫງວນໃຫ້ລາວ ອາລົມຈິດຄວາມຮັກແພງແບບພິເສດ, ສັດຊື່, ບໍລິສຸດຜຸດຜ່ອງ. ນັ້ນແມ່ນຊັບສົມບັດອັນລ້ຳຄ່າທີ່ພວກຂ້າພະເຈົ້າເຄົາລົບ. ເນື່ອງໃນໂອກາດອັນສຳຄັນຍິ່ງນີ້, ຕາງໜ້າພັກ, ລັດ ແລະປະຊາຊົນລາວ, ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງມາຍັງພັກ, ລັດ ແລະປະຊາຊົນຫວຽດນາມ ອ້າຍນ້ອງ, ພ້ອມທັງຢືນຢັນວ່າ ລາວ ຍາມໃດກໍຈົດຈໍາ, ເຄົາລົບນໍ້າໃຈສາມັກຄີແບບພິເສດເຊິ່ງສອງຊາດໄດ້ທຸ້ມເທເຫື່ອແຮງເພີ່ມພູນຄູນສ້າງ. ພວກຂ້າພະເຈົ້າປາດຖະໜາຢາກສືບຕໍ່ພ້ອມກັບຫວຽດນາມ ເພື່ອຮັກສາ, ເສີມຂະຫຍາຍ ແລະຖ່າຍທອດສາຍພົວພັນທີ່ຈົງຮັກພັກດີ, ຫາຍາກນີ້ໃຫ້ຄົນລຸ້ນຫຼັງ. ທ່ານນາງ ຄຳເພົາ ເອີນທະວັນ ຢືນຢັນວ່າ, “ຂ້າພະເຈົ້າເຊື່ອໝັ້ນວ່າ, ດ້ວຍພື້ນຖານປະຫວັດສາດທີ່ເລິກເຊິ່ງ, ຄວາມໄວ້ເນື້ອເຊື່ອໃຈທາງດ້ານການເມືອງທີ່ໜັກແໜ້ນ, ການຕັດສິນໃຈຂອງການນໍາ ແລະປະຊາຊົນສອງປະເທດ, ສາຍພົວພັນລະຫວ່າງລາວ-ຫວຽດນາມ ຈະສົດໃສ, ເຂັ້ມແຂງ, ສືບຕໍ່ເປັນແບບຢ່າງໃຫ້ແກ່ນໍ້າໃຈມິດຕະພາບສາກົນ”.
ໂດຍ: ໄຊນີດາ