ວັນທີ 24 ກັນຍາ, ຕາມເວລາທ້ອງຖິ່ນ, ຢູູ່ສຳນັກງານຄະນະຜູ້ຕາງໜ້າ ສສ ຫວຽດນາມ ປະຈຳ ສະຫະປະຊາຊາດ ທີ່ນິວຢອກ, ທ່ານ ເລຮວ່າຍຈຸງ, ຮັກສາການລັດຖະມົນຕີກະຊວງການຕ່າງປະເທດຫວຽດນາມ ແລະທ່ານ Paulson Panapa, ລັດຖະມົນຕີກະຊວງການຕ່າງປະເທດ, ແຮງງານ ແລະການຄ້າຕູວາລູ ໄດ້ເຊັນແຈ້ງການຮ່ວມກ່ຽວກັບການສ້າງຕັ້ງສາຍພົວພັນທາງການທູດລະຫວ່າງ ສສ ຫວຽດນາມ ແລະ ຕູວາລູ.

leftcenterrightdel
ທ່ານ ເລຮວ່າຍຈຸງ, ຮັກສາການລັດຖະມົນຕີກະຊວງການຕ່າງປະເທດຫວຽດນາມ ແລະ ທ່ານ Paulson Panapa, ລັດຖະມົນຕີກະຊວງການຕ່າງປະເທດ, ແຮງງານ ແລະການຄ້າຕູວາລູ. ພາບ: mofa.gov.vn

ການເຊັນແຈ້ງການຮ່ວມຄັ້ງນີ້, ຫວຽດນາມ ໄດ້ກາຍເປັນໜຶ່ງໃນຈຳນວນໜ້ອຍບັນດາປະເທດໃນໂລກໄດ້ສ້າງຕັ້ງສາຍພົວພັນທາງການທູດ ກັບທຸກປະເທດສະມາຊິກຂອງສະຫະປະຊາຊາດ (ປະຈຸບັນມີ 193 ປະເທດ).

ພາຍຫຼັງ ພິທີເຊັນ, ທ່ານ ເລຮວ່າຍຈຸງ, ຮັກສາການລັດຖະມົນຕີກະຊວງການຕ່າງປະເທດ ແລະ ທ່ານ Paulson Panapa, ລັດຖະມົນຕີກະຊວງການຕ່າງປະເທດ, ແຮງງານ ແລະການຄ້າຕູວາລູ ໄດ້ແລກປ່ຽນກ່ຽວກັບບັນດາທິດທາງຊຸກຍູ້ການພົວພັນສອງຝ່າຍໃນໄລຍະຈະມາເຖິງ. ສອງຝ່າຍ ຢືນຢັນວ່າ ການເຊັນແຈ້ງການຮ່ວມເປັນຂີດໝາຍປະຫວັດສາດ, ເປັນພື້ນຖານໃຫ້ການພົວພັນຮ່ວມມືລະຫວ່າງສອງປະເທດ; ເຫັນດີເປັນເອກະພາບສືບຕໍ່ແລກປ່ຽນເພື່ອຊຸກຍູ້ບັນດາກິດຈະການຮ່ວມມືໂດຍສະເພາະແມ່ນຢູ່ໃນບັນດາຂົງເຂດທີ່ສອງຝ່າຍມີຄວາມສາມາດບົ່ມຊ້ອນ ເຊັ່ນ: ເສດຖະກິດທະເລ, ການທ່ອງທ່ຽວ, ການສຶກສາ. ສອງຝ່າຍຍັງເຫັນດີເປັນເອກະພາບ ຈະປະສານສົມທົບກັນຢ່າງແໜ້ນແຟ້ນຢູ່ບັນດາເວທີພາໄສຫຼາຍຝ່າຍ ທີ່ສອງປະເທດເປັນສະມາຊິກ.

ຂ່າວ: ວິທະຍຸກະຈາຍສຽງຫວຽດນາມ