ຊຸກຍູ້ການຮ່ວມມືລະຫວ່າງບັນດາອົງການນິຕິບັນຍັດຂອງຫວຽດນາມ ກັບເມັກຊີໂກ ແລະເວເນຊູເອລາ
ກປ.ອອນໄລ - ຕອນບ່າຍວັນທີ 3 ກັນຍາ, ທີ່ຮ່າໂນ້ຍ, ທ່ານ ເຈິ່ນກວາງເຟືອງ ຮອງປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງພັກແຮງງານ ເມັກຊີໂກ (PT) ນໍາໂດຍທ່ານ Pedro Vazquez, ກຳມະການກົມການເມືອງພັກ PT, ປະທານກຳມາທິການຕ່າງປະເທດຂອງສະພາຕໍ່າ ເມັກຊີໂກ ທີ່ພວມຢ້ຽມຢາມຫວຽດນາມ ແລະເຂົ້າຮ່ວມພິທີສະເຫຼີມສະຫຼອງການປະຕິວັດເດືອນສິງຫາ ແລະວັນຊາດ ສສ ຫວຽດນາມ ຄົບຮອບ 80 ປີ.
    |
 |
|
ທ່ານ ເຈິ່ນກວາງເຟືອງ ຮອງປະທານສະພາແຫ່ງຊາດຫວຽດນາມ ແລະທ່ານ Pedro Vazquez, ກຳມະການກົມການເມືອງພັກແຮງງານເມັກຊີໂກ, ປະທານກຳມາທິການຕ່າງປະເທດຂອງສະພາຕໍ່າ ເມັກຊີໂກ. ພາບ: daibieunhandan.vn |
ທີ່ການຕ້ອນຮັບ, ສອງຝ່າຍໄດ້ເຫັນດີຊຸກຍູ້ບັນດາມາດຕະການ ຄື: ສືບຕໍ່ຊຸກຍູ້ການພົບປະ ແລະການຢ້ຽມຢາມຂັ້ນສູງລະຫວ່າງການນຳສະພາແຫ່ງຊາດ, ບັນດາກໍາມາທິການ; ສະໜັບສະໜູນ ແລະສ້າງເງື່ອນໄຂໃຫ້ແກ່ບັນດາການເຄື່ອນໄຫວຮ່ວມມື, ໂດຍສະເພາະແມ່ນການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງບັນດາອົງການຈັດຕັ້ງ, ວິສາຫະກິດຂອງສອງປະເທດ, ເພື່ອຂຸດຄົ້ນທ່າແຮງ, ຄວາມສາມາດບົ່ມຊ້ອນຮ່ວມມື; ສົ່ງເສີມ ແລະເຊື່ອມຕໍ່ວິສາຫະກິດຂອງສອງປະເທດຜ່ານບັນດາຮູບການແນະນຳ, ໂຄສະນາກ່ຽວກັບປະເທດ, ຜູ້ຄົນ ແລະກາລະໂອກາດຮ່ວມມື.
* ໃນວັນດຽວກັນ, ຢູ່ຫໍສະພາແຫ່ງຊາດ, ທ່ານ ເຈິ່ນກວາງເຟືອງ ຮອງປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນພັກສັງຄົມນິຍົມເອກະພາບ ເວເນຊູເອລາ (PSUV) ນຳໂດຍທ່ານ Jesús German Faria Tortosa ຮອງປະທານພັກສັງຄົມນິຍົມເອກະພາບ ເວເນຊູເອລາ, ເນື່ອງໃນໂອກາດມາຢ້ຽມຢາມຫວຽດນາມ ແລະເຂົ້າຮ່ວມພິທີສະເຫຼີມສະຫຼອງການປະຕິວັດເດືອນສິງຫາ ແລະວັນຊາດ ສສ ຫວຽດນາມ ຄົບຮອບ 80 ປີ.
|
|
 |
|
ທ່ານ ເຈິ່ນກວາງເຟືອງ ຮອງປະທານສະພາແຫ່ງຊາດຫວຽດນາມ ແລະທ່ານ Jesús German Faria Tortosa ຮອງປະທານພັກສັງຄົມນິຍົມເອກະພາບເວເນຊູເອລາ. ພາບ: daibieunhandan.vn |
ທີ່ການຕ້ອນຮັບ, ທ່ານ ເຈິ່ນກວາງເຟືອງ ສະເໜີສອງປະເທດເພີ່ມທະວີການແລກປ່ຽນຄະນະຜູ້ແທນການນຳພັກ, ລັດ ແລະສະພາແຫ່ງຊາດ ເພື່ອແນໃສ່ສືບຕໍ່ຫັນການພົວພັນຮ່ວມມືໃນບັນດາຂົງເຂດທີ່ມີທ່າແຮງໃຫ້ເປັນລະອຽດ. ພ້ອມກັນນັ້ນ, ສົມທົບກັນຊຸກຍູ້ບັນດາອົງການນິຕິບັນຍັດຂອງສອງປະເທດສືບຕໍ່ເພີ່ມທະວີການຮ່ວມມື, ແລກປ່ຽນບົດຮຽນໃນການກໍ່ສ້າງ ແລະປະຕິບັດກົດໝາຍ, ກໍ່ສ້າງລັດແຫ່ງກົດໝາຍ; ປັບປຸງລະບອບລະບຽບການໃຫ້ສົມບູນແບບ ເພື່ອຮັບໃຊ້ການພັດທະນາຂອງແຕ່ລະປະເທດ.
ໂດຍ: ໄຊຊະນະ