ທ່ານນາຍົກລັດຖະມົນຕີ ໄດ້ໄປຮອດກົວລາລຳເປີ, ເລີ່ມຕົ້ນການຢ້ຽມຢາມມາເລເຊຍ ແລະເຂົ້າຮ່ວມກອງປະຊຸມສຸດຍອດ
ກປ.ອອນໄລ - ພາຍຫຼັງບິນ 3 ກວ່າຊົ່ວໂມງ, ໃນເວລາ 23 ໂມງ 40 ນາທີ ຕາມເວລາທ້ອງຖິ່ນ (22 ໂມງ 40 ນາທີ ຕາມເວລາຮ່າໂນ້ຍ) ຂອງວັນທີ 24 ພຶດສະພາ, ເຮືອບິນພິເສດໂດຍສານ ທ່ານ ຟ້າມມິງຈີ້ງ ນາຍົກລັດຖະມົນຕີ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ໄດ້ໄປຮອດນະຄອນຫຼວງກົວລາລຳເປີ, ເລີ່ມຕົ້ນການຢ້ຽມຢາມມາເລເຊຍ ຢ່າງເປັນທາງການ ແລະເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 46 ແລະບັນດາກອງປະຊຸມສຸດຍອດທີ່ກ່ຽວຂ້ອງ ທີ່ກົວລາລຳເປີ ແຕ່ວັນທີ 24 ຫາວັນທີ 28 ພຶດສະພາ ຕາມຄໍາເຊີນຂອງ ທ່ານ Anwar Ibrahim ນາຍົກລັດຖະມົນຕີ ມາເລເຊຍ ແລະພັນລະຍາ.
ຕ້ອນຮັບທ່ານ ຟ້າມມິງຈີ້ງ ນາຍົກລັດຖະມົນຕີ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນສາກົນກົວລາລໍາເປີ ຝ່າຍມາເລເຊຍ ມີທ່ານ Aaron Ago Dagang ລັດຖະມົນຕີກະຊວງ ສາມັກຄີແຫ່ງຊາດ - ລັດຖະມົນຕີຕິດຕາມທ່ານນາຍົກລັດຖະມົນຕີ; ທ່ານ Dato’ Tan Yang Thai ເອກອັກຄະລັດຖະທູດມາເລເຊຍ ປະຈຳຫວຽດນາມ; ຮອງຫົວໜ້າກົມພິທີ, ກະຊວງການຕ່າງປະເທດ; ຜູ້ຕາງໜ້າສໍານັກງານນາຍົກລັດຖະມົນຕີ; ຜູ້ຕິດຕໍ່ສື່ສານຂອງນາຍົກລັດຖະມົນຕີ ແລະພັນລະຍາ. ຝ່າຍຫວຽດນາມ ມີທ່ານ ດິງຫງອັກລິງ ເອກອັກຄະລັດຖະທູດຫວຽດນາມ ປະຈຳມາເລເຊຍ; ພະນັກງານ, ລັດຖະກອນສະຖານທູດ ແລະຜູ້ຕາງໜ້າປະຊາຄົມຊາວຫວຽດນາມ ຢູ່ມາເລເຊຍ.
    |
 |
|
ພິທີຕ້ອນຮັບທ່ານ ຟ້າມມິງຈີ້ງ ນາຍົກລັດຖະມົນຕີ ແລະພັນລະຍາ ເຖິງນະຄອນຫຼວງກົວລາລໍາເປີ, ເລີ່ມຕົ້ນການຢ້ຽມຢາມມາເລເຊຍ ຢ່າງເປັນທາງການ ແລະເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 46. ພາບ: ສໍານັກຂ່າວສານຫວຽດນາມ. |
ໃນການໄປປະຕິບັດງານຄັ້ງນີ້, ພ້ອມກັບການຢ້ຽມຢາມມາເລເຊຍ ຢ່າງເປັນທາງການ - ປະເທດທີ່ດຳລົງຕຳແໜ່ງປະທານອາຊຽນ 2025, ທ່ານ ຟ້າມມິງຈີ້ງ ຈະເຂົ້າຮ່ວມບັນດາກອງປະຊຸມ, ຄື: ກອງປະຊຸມສຸດຍອດອາຊຽນ ຄັ້ງທີ 46; ກອງປະຊຸມສຸດຍອດອາຊຽນ - ສະພາການຮ່ວມມືເຂດອ່າວ (GCC) ຄັ້ງທີ 2; ກອງປະຊຸມສຸດຍອດອາຊຽນ - GCC ແລະ ຈີນ. ພ້ອມກັນນັ້ນ, ທ່ານນາຍົກລັດຖະມົນຕີ ກໍຈະມີບັນດາການເຄື່ອນໄຫວສອງຝ່າຍ ແລະຫຼາຍຝ່າຍ ທີ່ສຳຄັນອື່ນໆ; ເຂົ້າຮ່ວມເວທີປາໄສ ແລະກອງປະຊຸມທີ່ກ່ຽວຂ້ອງ.
ມາຢ້ຽມຢາມມາເລເຊຍ, ທ່ານ ຟ້າມມິງຈີ້ງ ຈະມີການພົບປະສອງຝ່າຍ, ພົບປະກັບການນຳຂັ້ນສູງຂອງປະເທດເຈົ້າພາບ, ຄື: ນາຍົກລັດຖະມົນຕີ, ປະທານສະພາສູງ, ປະທານສະພາຕ່ຳມາເລເຊຍ. ສອງຝ່າຍຈະແລກປ່ຽນເຫັນດີເປັນເອກະພາບບັນດາທິດທາງໃຫຍ່, ມາດຕະການລະອຽດນໍາກັນເພື່ອຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານທີ່ຫາກໍ່ສ້າງຕັ້ງລະຫວ່າງສອງປະເທດ. ການຢ້ຽມຢາມຢັ້ງຢືນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍຖືເປັນສໍາຄັນການພົວພັນກັບບັນດາປະເທດບ້ານໃກ້ເຮືອນຄຽງ ແລະອາຊຽນ, ໃນນັ້ນມີມາເລເຊຍ.
ຜ່ານບັນດາການເຄື່ອນໄຫວດັ່ງກ່າວ, ຫວຽດນາມ ຢືນຢັນຈະສະໜັບສະໜູນມາເລເຊຍ ປະຕິບັດບົດບາດເປັນປະທານອາຊຽນ 2025 ຢ່າງສຳເລັດຜົນ; ພ້ອມກັນນັ້ນ, ສືບຕໍ່ສະໜັບສະໜູນການກໍ່ສ້າງປະຊາຄົມອາຊຽນ “ຍືນຍົງ ແລະກວມລວມ”, ສາມັກຄີ, ໝັ້ນຄົງເຂັ້ມແຂງ, ປັບປຸງບົດບາດໃຈກາງຂອງອາຊຽນ ໃນໂຄງປະກອບພາກພື້ນ.
ການໄປປະຕິບັດງານຂອງທ່ານ ຟ້າມມິງຈີ້ງ ນາຍົກລັດຖະມົນຕີ ກໍ່ສະແດງໃຫ້ເຫັນການເປັນເຈົ້າການ, ຕັ້ງໜ້າເຂົ້າຮ່ວມບັນດາອົງການຈັດຕັ້ງ, ກົນໄກ ແລະເວທີປາໄສຫຼາຍຝ່າຍຂອງຫວຽດນາມ, ປະກອບຄໍາເຫັນ, ເຂົ້າຮ່ວມບັນດາການເຄື່ອນໄຫວລວມ ແລະປະຕິບັດຄວາມຮັບຜິດຊອບ ເພື່ອເປົ້າໝາຍສັນຕິພາບ, ສະຖຽນລະພາບ, ການຮ່ວມມື ແລະພັດທະນາຂອງແຕ່ລະປະເທດ, ຢູ່ພາກພື້ນ ແລະໃນໂລກ.
ໂດຍ: ໄຊຊະນະ