ທີ່ການພົບປະ, 2 ຝ່າຍໄດ້ປຶກສາຫາລືກ່ຽວກັບຄວາມສາມາດບົ່ມຊ້ອນໃນການຮ່ວມມືດ້ານເສດຖະກິດ ແລະຕົກລົງຜັນຂະຫຍາຍບັນດາກົນໄກຮ່ວມມືສອງຝ່າຍໂດຍໄວ, ພິເສດແມ່ນຄະນະກຳມະການປະສົມດ້ານເສດຖະກິດ (JETCO), ພ້ອມທັງສົມທົບກັນຢ່າງແໜ້ນແຟ້ນເພື່ອສືບຕໍ່ປະຕິບັດສັນຍາການຄ້າສອງຝ່າຍ UKVFTA ຢ່າງມີປະສິດທິຜົນ.

ໃນສະພາບການທັງສອງປະເທດມານະພະຍາຍາມ ເພື່ອປະຕິບັດບັນດາເປົ້າໝາຍເຕີບໂຕດ້ານເສດຖະກິດ ແລະຕ້ານການປ່ຽນແປງຂອງດິນຟ້າອາກາດ, 2 ຝ່າຍຢືນຢັນຈະສືບຕໍ່ຊຸກຍູ້ການຮ່ວມມືດ້ານການຫັນປ່ຽນພະລັງງານໃນຂອບເຂດການພົວພັນຄູ່ຮ່ວມມືຫັນປ່ຽນພະລັງງານຢ່າງສະເໝີພາບ (JETP). ຝ່າຍ ອັງກິດ ໃຫ້ຄຳໝັ້ນສັນຍາໜູນຊ່ວຍຫວຽດນາມ ໃນການກໍ່ສ້າງສູນການເງິນສາກົນຢູ່ນະຄອນໂຮ່ຈີມິນ, ສ້າງກຳລັງໜູນໃໝ່ໃຫ້ແກ່ການຮ່ວມມືດ້ານເສດຖະກິດລະຫວ່າງ 2 ປະເທດ.

leftcenterrightdel
ທ່ານເອກອັກຄະລັດຖະທູດ ໂດມິງຮຸ່ງ ແລະຜູ້ແທນຖ່າຍຮູບລວມ. ພາບ: ສໍານັກຂ່າວສານຫວຽດນາມ

ທີ່ການພົບປະ, ທ່ານເອກອັກຄະລັດຖະທູດ ໂດມິງຮຸ່ງ ໄດ້ແບ່ງປັນໝາກຜົນແຫ່ງການພັດທະນາເສດຖະກິດ - ສັງຄົມຂອງຫວຽດນາມ ຢ່າງຕັ້ງໜ້າ, ແມ່ນພື້ນຖານເສດຖະກິດພັດທະນາຢ່າງຂະຫຍັນຂັນເຄື່ອນດ້ວຍລະດັບເຕີບໂຕ GDP ປີ 2024 ສູງສຸດໃນພາກພື້ນບັນລຸ 7,09%. ຫວຽດນາມ ກໍ່ແມ່ນພື້ນຖານເສດຖະກິດເປີດດ້ວຍ 17 ສັນຍາການຄ້າເສລີ (FTA), ໃນນັ້ນມີ FTA ຮຸ່ນໃໝ່ຫຼາຍສະບັບ, ເຊື່ອມຕໍ່ຫວຽດນາມ ກັບຫຼາຍສູນເສດຖະກິດໃຫຍ່.

ການຮ່ວມມືດ້ານເສດຖະກິດການຄ້າແມ່ນຈຸດພົ້ນເດັ່ນໃນການພົວພັນລະຫວ່າງຫວຽດນາມ - ອັງກິດ. ນັບແຕ່ປີ 2021, ມູນຄ່າການຄ້າສອງຝ່າຍໃນແຕ່ລະປີໄດ້ເພີ່ມຂຶ້ນຢ່າງບໍ່ຢຸດຢັ້ງ. ປີ 2024 ແມ່ນປີພິເສດດ້ວຍມູນຄ່າການຄ້າສອງສົ້ນລື່ນກາຍ 8 ຕື້ໂດລາສະຫະລັດ, ບັນລຸກວ່າ 8,4 ຕື້ໂດລາສະຫະລັດ, ເພີ່ມຂຶ້ນ 18% ເມື່ອທຽບໃສ່ປີ 2023, ໃນນັ້ນ ເປັນຄັ້ງທຳອິດທີ່ມູນຄ່າສົ່ງອອກສິນຄ້າຫວຽດນາມ ໄປອັງກິດ ລື່ນກາຍ 7 ຕື້ໂດລາສະຫະລັດ, ບັນລຸຫຼາຍກວ່າ 7,5 ຕື້ໂດລາສະຫະລັດ, ເພີ່ມຂຶ້ນ 18,9% ເມື່ອທຽບໃສ່ປີ 2023.

ສິນຄ້າສົ່ງອອກຕົ້ນຕໍເກືອບທັງໝົດຂອງຫວຽດນາມ ໄດ້ເຕີບໂຕດີສົມຄວນ, ໃນນັ້ນມີຄອມພິວເຕີ, ຜະລິດຕະພັນເອເລັກໂຕນິກ ແລະເຄື່ອງປະກອບ, ຜັກໝາກໄມ້, ໝາກພິກໄທ, ກາເຟ, ຜະລິດຕະພັນຢາງພາລາ, ເຄື່ອງປຸງແຕ່ງ ແລະທັນຍາຫານ, ເຄື່ອງຈັກ, ອຸປະກອນ,...

ໂດຍ: ດັ້ງເກື່ອງ