ທ່ານ ຟ້າມມິງຈີ້ງ ເນັ້ນໜັກວ່າ ສອງປະເທດດໍາເນີນການແລກປ່ຽນຄະນະຜູ້ແທນຂັ້ນສູງເປັນປະຈໍາແຕ່ການພົບປະແຕ່ລະຄັ້ງລ້ວນແຕ່ພິເສດ ຍ້ອນເພື່ອເປົ້າໝາຍທີ່ເຮັດໃຫ້ການພົວພັນສອງປະເທດເລິກເຊິ່ງຂຶ້ນຕື່ມ.
    |
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ແລະທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ລາວ. ພາບ: ສໍານັກຂ່າວສານຫວຽດນາມ. |
ທ່ານ ໄຊສົມພອນ ພົມວິຫານ ຢັ້ງຢືນວ່າ ສະພາແຫ່ງຊາດລາວ ຍາມໃດກໍຕິດຕາມກວດກາການເຄື່ອນໄຫວຮ່ວມມືກັບຫວຽດນາມ, ເພື່ອນໍາເອົາຜົນປະໂຫຍດອັນແທດຈິງມາໃຫ້ປະຊາຊົນສອງປະເທດ; ເນັ້ນໜັກວ່າ ການຮ່ວມມືຢ່າງແໜ້ນແຟ້ນ, ມີປະສິດທິຜົນລະຫວ່າງສະພາແຫ່ງຊາດສອງປະເທດດ້ວຍຫຼາຍການເຄື່ອນໄຫວພົບປະ, ແລກປ່ຽນບົດຮຽນໃນວຽກງານນິຕິບັນຍັດ, ຕິດຕາມກວດກາລະຫວ່າງອົງການວິຊາສະເພາະຂອງສອງສະພາແຫ່ງຊາດ ຈະປະກອບສ່ວນຮັດແໜ້ນ ແລະເຮັດໃຫ້ການພົວພັນລະຫວ່າງສອງອົງການນິຕິບັນຍັດ ເວົ້າສະເພາະ, ເວົ້າລວມແມ່ນສອງປະເທດ ເລິກເຊິ່ງຂຶ້ນຕື່ມ.
|
|
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ພົບປະກັບທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ລາວ. ພາບ: ສໍານັກຂ່າວສານຫວຽດ ນາມ. |
ສອງຝ່າຍ ເຫັນດີສົມທົບກັນຜັນຂະຫຍາຍບັນດາການເຄື່ອນໄຫວຕິດຕາມກວດກາລວມ, ເພື່ອປະກອບສ່ວນຜັນຂະຫຍາຍບັນດາຂໍ້ຕົກລົງ ແລະແຜນການຂັ້ນສູງສອງປະເທດເວົ້າລວມ ແລະຂໍ້ຕົກລົງຮ່ວມມືລະຫວ່າງສອງສະພາແຫ່ງຊາດ ເວົ້າສະເພາະຢ່າງມີປະສິດທິຜົນ; ສົມທົບກັນຢ່າງແໜ້ນແຟ້ນໃນການຈັດຕັ້ງບັນດາເຫດການສໍາຄັນຂອງສອງປະເທດ; ເພີ່ມທະວີການແລກປ່ຽນ, ແບ່ງປັນບົດຮຽນໃນບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈ, ພິເສດແມ່ນໃນການກໍ່ສ້າງ, ປັບປຸງລະບອບລະບຽບການ, ລະບົບກົດໝາຍ ແລະການຕິດຕາມກວດກາສູງສຸດການເຄື່ອນໄຫວຂອງບັນດາອົງການລັດໃຫ້ສົມບູນແບບ, ພ້ອມກັນຊຸກຍູ້ການຮ່ວມມືດ້ານເສດຖະກິດໃຫ້ສົມກັບການພົວພັນພິເສດລະຫວ່າງສອງປະເທດດ້ວຍບັນດາຈຸດສຸມ, ຈຸດໃຈກາງ.
ເນື່ອງໃນໂອກາດນີ້, ທ່ານປະທານສະພາແຫ່ງຊາດລາວ ສະແດງຄວາມຂອບໃຈຢ່າງເລິກເຊິ່ງຕໍ່ການໜູນຊ່ວຍອັນລ້ໍາຄ່າຂອງພັກ, ລັດ ແລະປະຊາຊົນຫວຽດນາມ ທີ່ສະຫງວນໃຫ້ແກ່ລາວ ໃນການຕໍ່ສູ້ຍາດເອົາເອກະລາດແຫ່ງຊາດ ແລະສ້າງສາປະເທດ ໃນປັດຈຸບັນ, ພິເສດເມື່ອ ລາວ ດໍາລົງຕໍາແໜ່ງປະທານອາຊຽນ ແລະໄອປາ.
ຕອນບ່າຍວັນດຽວກັນ, ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ໄດ້ຕ້ອນຮັບທ່ານ ບຸນທອງ ຈິດມະນີ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ລາວ.
|
|
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ພົບປະກັບທ່ານ ບຸນທອງ ຈິດມະນີ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ລາວ. ພາບ: ສໍານັກຂ່າວສານຫວຽດນາມ. |
ສອງຝ່າຍ ໄດ້ສະແດງຄວາມປິຕິຊົມຊື່ນຕໍ່ຜົນການຮ່ວມມືອັນດີງາມໃນທຸກຂົງເຂດລະຫວ່າງສອງພັກ, ສອງລັດ ໃນໄລຍະຜ່ານມາ; ຢັ້ງຢືນວ່າ ບໍ່ວ່າໃນສະພາບການໃດ, ສອງຝ່າຍກໍຈະຮ່ວມແຮງຮ່ວມໃຈຮັກສາ ແລະເພີ່ີມພູນຄູນສ້າງສາຍພົວພັນອັນສັດຊື່ບໍລິສຸດຜຸດຜ່ອງ ຫວຽດນາມ-ລາວ, ລາວ-ຫວຽດນາມ ຈົ່ງຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ, ນໍາເອົາຜົນປະໂຫຍດອັນແທດຈິງມາໃຫ້ປະຊາຊົນສອງປະເທດ.
ຕອນບ່າຍວັນທີ 10 ມັງກອນ, ທີ່ນະຄອນຫຼວງວຽງຈັນ, ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ໄດ້ພົບປະກັບທ່ານ ບຸນຍັງ ວໍລະຈິດ ອະດີດເລຂາທິການໃຫຍ່, ອະດີດປະທານປະເທດ ລາວ ແລະທ່ານ ທອງສິງ ທໍາມະວົງ ອະດີດນາຍົກລັດຖະມົນຕີ ລາວ.
|
|
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ພົບປະກັບທ່ານ ບຸນຍັງ ວໍລະຈິດ ອະດີດ ເລຂາທິການໃຫຍ່, ອະດີດປະທານປະເທດ ລາວ. ພາບ: ສໍານັກຂ່າວສານຫວຽດນາມ. |
ທ່ານ ຟ້າມມິງຈີ້ງ ເນັ້ນໜັກວ່າ ຫວຽດນາມ ຍາມໃດກໍເຄົາລົບນັບຖືການປະກອບສ່ວນອັນລໍ້າຄ່າຂອງບັນດາສະຫາຍອະດີດການນໍາພັກ, ລັດລາວ ຕໍ່ການພົວພັນພິເສດ ຫວຽດນາມ-ລາວ ແລະຫວັງວ່າ ດ້ວຍອິດທິພົນຊື່ສຽງ, ບົດຮຽນ, ປະສົບການຂອງຕົນ, ບັນດາສະຫາຍອະດີດການນໍາຂັ້ນສູງຂອງ ລາວ ຈະສືບຕໍ່ສະໜັບສະໜູນ, ມີຄໍາເຫັນປະກອບໃຫ້ແກ່ການປັບປຸງ ແລະເຮັດໃຫ້ການພົວພັນຮ່ວມມືລະຫວ່າງສອງພັກ, ສອງລັດ ເລິກເຊິ່ງຂຶ້ນຕື່ມ.
|
|
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ພົບປະກັບທ່ານ ທອງສິງ ທໍາມະວົງ ອະດີດນາຍົກລັດຖະມົນຕີ ລາວ. ພາບ: ສໍານັກຂ່າວສານຫວຽດ ນາມ. |
ບັນດາສະຫາຍອະດີດການນໍາຂັ້ນສູງລາວ ເຫັນດີເປັນເອກະພາບສູງ ຈະສືບຕໍ່ເອົາໃຈໃສ່ສຶກສາອົບຮົມ ແລະໂຄສະນາໃຫ້ປະຊາຊົນສອງປະເທດ, ໂດຍສະເພາະແມ່ນຄົນຮຸ່ນໜຸ່ມກ່ຽວກັບມູນເຊື້ອການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ, ຄວາມສະໜິດຕິດພັນສັດຊື່ບໍລິສຸດ ຫວຽດນາມ-ລາວ, ສືບຕໍ່ຄຽງບ່າຄຽງໄຫຼ່ຜ່ານຜ່າຄວາມຫຍຸ້ງຍາກ, ສິ່ງທ້າທາຍນາໆປະການ ເພື່ອຍາດໄດ້ໄຊຊະນະອັນໃຫຍ່ຫຼວງກວ່າເກົ່າ...
ຕອນບ່າຍວັນທີ 10 ມັງກອນ, ທີ່ນະຄອນຫຼວງວຽງຈັນ, ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ກໍໄດ້ຕ້ອນຮັບທ່ານ ບໍ່ວຽງຄໍາ ວົງດາຣາ ປະທານສູນກາງສະມາຄົມມິດຕະພາບ ລາວ-ຫວຽດນາມ ແລະທ່ານນາງ ອິນລະວັນ ແກ້ວບຸນພັນ ຮອງປະທານສູນກາງແນວລາວສ້າງຊາດ.
ທ່ານ ຟ້າມມິງຈີ້ງ ສະເໜີໃຫ້ບັນດາອົງການຈັດຕັ້ງຂອງສອງປະເທດ ສືບຕໍ່ຍົກສູງຄຸນນະພາບບັນດາການເຄື່ອນໄຫວພົບປະແລກປ່ຽນໃຫ້ຟົດຟື້ນກວ່າອີກ ເພື່ອນໍາມາເຊິ່ງໝາກຜົນລະອຽດ, ແທດຈິງກວ່າ, ເຊື່ອມຕໍ່ອະດີດ, ປັດຈຸບັນ ແລະອະນາຄົດ; ຍູ້ແຮງການເຄື່ອນໄຫວພົບປະແລກປ່ຽນປະຊາຊົນ, ສ້າງກໍາລັງແຜ່ຂະຫຍາຍຢ່າງເລິກເຊິ່ງກວ້າງຂວາງລະຫວ່າງປະຊາຊົນທຸກຊັ້ນວັນນະ, ພິເສດແມ່ນຄົນຮຸ່ນໜຸ່ມສອງປະເທດ; ຈັດຕັ້ງການພົບປະແລກປ່ຽນວັດທະນະທໍາໃຫ້ຫຼາຍກວ່າອີກ; ສຶກສາອົບຮົມມູນເຊື້ອສາມັກຄີ, ປະຫວັດສາດວັດທະນະທໍາທີ່ເປັນເອກະລັກສະເພາະຂອງແຕ່ລະຝ່າຍໃຫ້ແກ່ຮຸ່ນຕ່າງ ໆ.
|
|
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ຕ້ອນຮັບທ່ານ ບໍ່ວຽງຄໍາ ວົງດາຣາ ປະທານສູນກາງສະມາຄົມມິດຕະພາບ ລາວ-ຫວຽດນາມ. ພາບ: chinhphu.vn |
ຂອບໃຈທ່ານ ຟ້າມມິງຈີ້ງ ທີ່ໄດ້ສະຫຼະເວລາຕ້ອນຮັບ, ທ່ານ ບໍ່ວຽງຄໍາ ວົງດາຣາ ປະທານສູນກາງສະມາຄົມມິດຕະພາບ ລາວ-ຫວຽດນາມ ຖືວ່າ ເລື່ອງ ທ່ານ ຟ້າມມິງຈີ້ງ ເລືອກລາວ ແມ່ນປະເທດທໍາອິດໄປປະຕິບັດງານຢູ່ຕ່າງປະເທດໃນປີ 2025, ສະແດງໃຫ້ເຫັນອາລົມຈິດພິເສດ ເຊິ່ງ ພັກ, ລັດ ແລະປະຊາຊົນຫວຽດນາມ ແລະທ່ານ ຟ້າມມິງຈີ້ງ ເອງ ໄດ້ສະຫງວນໃຫ້ພັກ, ລັດ ແລະປະຊາຊົນລາວ ອ້າຍນ້ອງ. ທ່ານ ບໍ່ວຽງຄໍາ ວົງດາຣາ ຢັ້ງຢືນວ່າ ສະມາຄົມມິດຕະພາບ ລາວ-ຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອເພີີ່ມພູນຄູນສ້າງໃຫ້ແກ່ການພົວພັນ ລາວ-ຫວຽດນາມ ຄືຄໍາເຫັນຂອງ ທ່ານ ຟ້າມມິງຈີ້ງ.
ຕອນຄໍ່າວັນດຽວກັນ, ທ່ານນາຍົກລັດຖະມົນຕີ ຟ້າມມິງຈີ້ງ ແລະຄະນະຜູ້ແທນຫວຽດນາມ ໄດ້ອອກຈາກນະຄອນຫຼວງວຽງຈັນ ກັບຄືນປະເທດ, ສິ້ນສຸດການໄປປະຕິບັດງານດ້ວຍຜົນສໍາເລັດຢ່າງຈົບງາມ.
ໂດຍ: ໄຊຊະນະ