ຫວຽດນາມ - ອຸສະເບກິດສະຖານ ຊຸກຍູ້ການຮ່ວມມືໃນທຸກຂົງເຂດທີ່ມີຮ່າແຮງ

ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ສົນທະນາທາງໂທລະສັບກັບທ່ານ Ilkhom Khaydarov ຮອງລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດອຸສະເບກິດສະຖານ ໃນຕອນບ່າຍວັນທີ 7 ມັງກອນ 2024. ພາບ: ກະຊວງການຕ່າງປະເທດ.

ທ່ານນາງ ເລທິທູຮັ່ງ ຢັ້ງຢືນວ່າ ຫວຽດນາມ ຍາມໃດກໍຖືເປັນສໍາຄັນ ແລະປາດຖະໜາຢາກຊຸກຍູ້ການພົວພັນມິດຕະພາບ ແລະການຮ່ວມມືຫຼາຍດ້ານທີ່ຕ່າງຝ່າຍຕ່າງມີຜົນປະໂຫຍດກັບບັນດາປະເທດເພື່ອນມິດທີ່ເປັນມູນເຊື້ອ, ໃນນັ້ນມີອຸສະເບກິດສະຖານ. ທ່ານ Ilkhom Khaydarov ສະແດງຄວາມປິຕິຊົມຊື່ນຕໍ່ບາດກ້າວພັດທະນາຢ່າງຕັ້ງໜ້າຂອງການພົວພັນສອງຝ່າຍ, ກຽມພ້ອມກັບຫວຽດນາມ ແລກປ່ຽນທິດທາງ ແລະມາດຕະການທີ່ເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງສອງປະເທດ ເລິກເຊິ່ງຂຶ້ນຕື່ມ; ຫວັງວ່າ ຫວຽດນາມ ຈະແບ່ງປັນບົດຮຽນໃນການພັດທະນາເສດຖະກິດ ແລະຜົນສໍາເລັດໃນບັນດາຂົງເຂດລະອຽດ. ຮອງລັດຖະມົນຕີສອງທ່ານ ເຫັນດີນຳກັນວ່າໃນໄລຍະຈະມາເຖິງສອງຝ່າຍ ຈະຮັກສາການພົບປະ ແລະແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນຂັ້ນສູງ ເພື່ອເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ສ້າງພື້ນຖານຊຸກຍູ້ການພົວພັນຮ່ວມມືໃນທຸກຂົງເຂດ ເຊິ່ງສອງຝ່າຍມີທ່າແຮງ ແລະຄວາມສາມາດບົ່ມຊ້ອນ, ໂດຍສະເພາະແມ່ນດ້ານການຄ້າ, ການລົງທຶນ, ການທ່ອງທ່ຽວ, ການຄົມມະນາຄົມຂົນສົ່ງ, ການສຶກສາ-ກໍ່ສ້າງ, ວິທະຍາສາດ-ເຕັກໂນໂລຊີ... ຫວຽດນາມ ພ້ອມແລ້ວທີ່ຈະເປັນຂົວຕໍ່, ຊຸກຍູ້ການພົວພັນລະຫວ່າງອຸສະເບກິດສະຖານ ແລະອາຊຽນ. ອຸສະເບກິດສະຖານ ພ້ອມແລ້ວຊຸກຍູ້ການພົວພັນລະຫວ່າງຫວຽດນາມ ກັບບັນດາປະເທດອາຊີກາງ ແລະບັນດາປະເທດໃນພາກພື້ນ.

ທ່ານນາງ ເລທິທູຮັ່ງ ກໍສະເໜີໃຫ້ສອງຝ່າຍເຫັນດີເປັນເອກະພາບຕໍ່ສັນຍາຍົກເວັ້ນວີຊາໃຫ້ແກ່ພົນລະເມືອງສອງປະເທດໂດຍໄວ ເພື່ອຊຸກຍູ້ການທ່ອງທ່ຽວ, ການພົບປະແລກປ່ຽນປະຊາຊົນ, ປະກອບສ່ວນເພີ່ມທະວີການພົວພັນມິດຕະພາບທີ່ເປັນມູນເຊື້ອອັນດີງາມ ແລະຊຸກຍູ້ການຮ່ວມມືລະຫວ່າງສອງປະເທດ. ທ່ານ Ilkhom Khaydarov ເຫັນດີກັບຄໍາສະເໜີຂອງທ່ານນາງ ເລທິທູຮັ່ງ ແລະຫວັງວ່າ ສອງຝ່າຍຈະພິຈາລະນາເປີດຫ້ອງການ, ອົງການຜູ້ຕາງໜ້າຂອງລັດ, ວິສາຫະກິດໃນຜືນແຜ່ນດິນຂອງກັນ ເພື່ອໜູນຊ່ວຍ ແລະຊຸກຍູ້ການພັດທະນາເສດຖະກິດຂອງແຕ່ລະປະເທດ ໂດຍກົງ.

ໂດຍ: ໄຊຊະນະ