ກະກຽມເງື່ອນໄຂທີ່ດີເພື່ອເລີ່ມເຄື່ອນໄຫວໂຮງງານໄຟຟ້ານິວເຄຼຍ ນິງທ້ວນ ຄືນໃໝ່
ກປ.ອອນໄລ - ວັນທີ 5 ທັນວາ, ຢູ່ແຂວງ ນິງທ້ວນ, ທ່ານເລຂາທິການໃຫຍ່ ໂຕເລິມ ແລະຄະນະປະຕິບັດງານສູນກາງພັກ ໄດ້ມີການເຮັດວຽກກັບການນຳແຂວງນິງທ້ວນ ກ່ຽວກັບສະພາບການ, ຜົນການຜັນຂະຫຍາຍປະຕິບັດມະຕິຂອງກອງປະຊຸມໃຫຍ່ ຄັ້ງທີ XIII ຂອງພັກ, ມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ XIV, ຄໍາສັ່ງຊີ້ນໍາ ສະບັບເລກທີ 35-CT/TW ຂອງກົມການເມືອງ (ສໍາສັ່ງຊີ້ນໍາ 35) ກ່ຽວກັບກອງປະຊຸມໃຫຍ່ອົງຄະນະພັກທຸກຂັ້ນ ມຸ່ງໄປເຖິງກອງປະຊຸມໃຫຍ່ ຄັ້ງທີ XIV ຂອງພັກ ແລະວິວັດການຜັນຂະຫຍາຍແຜນນະໂຍບາຍລົງທຶນໂຄງການໄຟຟ້ານິວເຄຼຍ ນິງທ້ວນ.
ກ່າວຄຳເຫັນສະຫຼຸບທີ່ການເຮັດວຽກ, ທ່ານເລຂາທິການໃຫຍ່ ໂຕເລິມ ເນັ້ນໜັກວ່າ ໄລຍະຜ່ານມາ, ສະພາແຫ່ງຊາດໄດ້ຕັດສິນໃຈສືບຕໍ່ປະຕິບັດ ແຜນນະໂຍບາຍລົງທຶນໄຟຟ້ານິວເຄຼຍ ນິງທ້ວນ ພາຍຫຼັງຢຸດຕິໂຄງການມາເປັນເວລາ 8 ປີ. ນີ້ແມ່ນໂອກາດ ເພື່ອໃຫ້ຫວຽດນາມ ພັດທະນາແຫຼ່ງ ຊັບພະຍາກອນມະນຸດທີ່ມີຄຸນນະພາບສູງ, ຍົກສູງຄວາມສາມາດບົ່ມຊ້ອນທາງດ້ານວິທະຍາສາດເຕັກໂນໂລຢີແຫ່ງຊາດ, ເຂົ້າຮ່ວມລະບົບສະໜອງເຕັກໂນໂລຢີໄຟຟ້ານິວເຄຼຍ ທົ່ວໂລກ, ອາດຈະຮ່ຳຮຽນ ແລະເປັນເຈົ້າຂອງເຕັກໂນໂລຢີນິວເຄຼຍຂອງໂລກໃນອະນາຄົດ.
    |
 |
|
ທ່ານເລຂາທິການໃຫຍ່ ໂຕເລິມ ເປັນປະທານການເຮັດວຽກ. ພາບ: ສໍານັກຂ່າວສານຫວຽດນາມ |
ທ່ານເລຂາທິການໃຫຍ່ ຢັ້ງຢືນວ່າ: ຊາວນິງທ້ວນ ແລະບັນດາທ້ອງຖິ່ນໃກ້ຄຽງໄດ້ແບ່ງປັນ, ບໍລິຈາກແຫຼ່ງກຳລັງດ້ານທີ່ດິນ, ຊັບພະຍາກອນ ເພື່ອພັດທະນາໂຄງການພະລັງງານຮັບໃຊ້ການພັດທະນາຂອງທົ່ວປະເທດ, ແນ່ນອນວ່າ ຕ້ອງໄດ້ຮັບການແຈກຢາຍ, ຊົມໃຊ້ບັນດາໝາກຜົນຄືນໃໝ່ໃຫ້ສົມກັບການພັດທະນາ. ພັກ ແລະລັດຮັບປະກັນວ່າຈະເລືອກເອົາເຕັກໂນໂລຢີນິວເຄຼຍ ດີທີ່ສຸດ, ເລືອກເອົາຄູ່ຮ່ວມມືໃຫ້ຄຳປຶກສາທີ່ດີທີ່ສຸດ, ບຳລຸງສ້າງຊັບພະຍາກອນຄຸ້ມຄອງດີທີ່ສຸດ ເພື່ອຮັບປະກັນການເຄື່ອນໄຫວໂຄງການພະລັງງານແຫ່ງຊາດຢ່າງປອດໄພ ແລະມີປະສິດທິຜົນ, ບໍ່ພຽງແຕ່ ເພື່ອຄົນລຸ້ນປັດຈຸບັນເທົ່ານັ້ນ ຫາກຍັງເພື່ອຄົນລຸ້ນຫຼັງອີກດ້ວຍ.
ແລະກໍ່ໃນຕອນບ່າຍວັນດຽວກັນ, ທ່ານເລຂາທິການໃຫຍ່ ໂຕເລິມ ໄດ້ລົງກວດກາສະຖານທີ່ວາງແຜນຜັງກໍ່ສ້າງໂຮງງານໄຟຟ້ານິວເຄຼຍ ນິງທ້ວນເລກ 1 (ບ້ານວິງເຕື່ອງ, ຕາແສງເຟືອກຢິງ, ເມືອງທ້ວນນາມ, ແຂວງນິງທ້ວນ). ນະທີ່ນີ້, ທ່ານເລຂາທິການໃຫຍ່ ຮຽກຮ້ອງໃຫ້ປະຕິບັດເອກະສານໂຄງການໂດຍໄວ, ລາຍງານຕໍ່ລັດຖະບານເພື່ອພິຈາລະນາ, ອະນຸມັດ ແລະຈັດແບ່ງທຶນ, ຮັບປະກັນຄວາມຄືບໜ້າ.
ໂດຍ: ທະນາພອນ