ການເຄື່ອນໄຫວຕ່າງໆຂອງທ່ານປະທານປະເທດ ເລືອງເກື່ອງ ຢູ່ ຈີເລ

ທີ່ການຕ້ອນຮັບ, ຕາງໜ້າການນໍາພັກ, ລັດ, ປະຊາຊົນຫວຽດນາມ, ທ່ານປະທານປະເທດ ເລືອງເກື່ອງ ຂອບໃຈປະຊາຊົນ, ພັກກອມມູນິດ ຈີເລ ແລະບັນດາກໍາລັງຝ່າຍຊ້າຍ, ກ້າວໜ້າ, ຮັກຫອມສັນຕິພາບທີ່ໄດ້ສະໜັບສະໜູນ, ສາມັກຄີກັບປະຊາຊົນຫວຽດນາມ ໃນພາລະກິດຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ ໃນເມື່ອກ່ອນກໍຄືໃນພາລະກິດສ້າງສາ, ພັດທະນາປະເທດພາຍໃຕ້ການນໍາຂອງພັກກອມມູນິດຫວຽດນາມ ໃນປັດຈຸບັນ.

ທ່ານປະທານປະເທດ ຕີລາຄາສູງ ແລະເຊື່ອໝັ້ນວ່າ ພັກກອມມູນິດ ຈີເລ ໃນຖານະເປັນພັກປະຊາທິປະໄຕ ຈະມີການປະກອບສ່ວນຕັ້ງໜ້າຫຼາຍຢ່າງເຂົ້າໃນຜົນການບໍລິຫານຂອງລັດຖະບານຝ່າຍຊ້າຍ ຢູ່ຈີເລ, ຊຸກຍູ້ນະໂຍບາຍການຕ່າງປະເທດທີ່ຕັ້ງໜ້າ, ເປີດກວ້າງການພົວພັນຕ່າງປະເທດ ແລະການເຊື່ອມຕໍ່ກັບບັນດາປະເທດ, ພາກພື້ນອື່ນໃນໂລກ, ປະກອບສ່ວນເຂົ້າໃນການແກ້ໄຂສິ່ງທ້າທາຍລວມ ແລະບັນຫາສາກົນ.

ທ່ານປະທານປະເທດ ເລືອງເກື່ອງ ຕ້ອນຮັບທ່ານ Lautaro Carmona Soto ປະທານພັກກອມມູນິດ ຈີເລ. ພາບ: qdnd.vn

ທ່ານປະທານປະເທດ ເນັ້ນໜັກວ່າ ພັກກອມມູນິດຫວຽດນາມ ມີແຜນນະໂຍບາຍຖືເປັນສໍາຄັນ ແລະປາດຖະໜາຢາກພັດທະນາກວ່າອີກການພົວພັນຮ່ວມມືກັບບັນດາພັກການເມືອງກໍາອໍານາດ, ພັກປະຊາທິປະໄຕ ແລະພັກການເມືອງທີ່ມີການພົວພັນທີ່ເປັນມູນເຊື້ອ, ໃນນັ້ນມີພັກກອມມູນິດຈີເລ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ການຮ່ວມມື, ການພັດທະນາຢູ່ພາກພື້ນ ແລະໃນໂລກ.

ສ່ວນທ່ານ Lautaro Carmona Soto ຢັ້ງຢືນວ່າ ຫວຽດນາມ ຍາມໃດກໍເປັນແບບຢ່າງໃຫ້ທົ່ວໂລກ, ໃນນັ້ນມີ ຈີເລ. ພັກກອມມູນິດ ຈີເລ ໄດ້ຮໍ່າຮຽນບົດຮຽນປະສົບການຂອງຫວຽດນາມ ໃນການຕໍ່ສູ້ປົດປ່ອຍຊາດ, ກໍານົດພາລະກິດປະຕິວັດແມ່ນຂອງທົ່ວປວງຊົນ; ເພື່ອພັດທະນາປະເທດຕ້ອງມີການເຂົ້າຮ່ວມຂອງທຸກຄົນໃນສັງຄົມ. ປັດຈຸບັນ ຍັງມີຄວາມຫຍຸ້ງຍາກ, ສິ່ງທ້າທາຍຫຼາຍຢ່າງຕໍ່ບັນດາພັກໃນສໍາພັນກໍາອໍານາດ, ໃນນັ້ນມີພັກກອມມູນິດຈີເລ. ເພາະສະນັ້ນ, ພັກກອມມູນິດ ຈີເລ ກໍຊຸກຍູ້ຍົກສູງກໍາລັງແຮງສູ້ຮົບຂອງຕົນ; ເອົາໃຈໃສ່ຮ່ຳຮຽນເອົາຮູບແບບຂອງຫວຽດນາມ, ເປັນຕົ້ນແມ່ນມາດຕະການຕ່າງໆທີ່ສອດຄ່ອງກັບສະພາບຕົວຈິງຂອງຈີເລ.

ທ່ານ Lautaro Carmona Soto ໃຫ້ຮູ້ວ່າ ສໍາລັບ ຈີເລ ເຖິງວ່າ ພັກໃດກໍ່ຕາມ ກໍລ້ວນແຕ່ສະໜັບສະໜູນການພົວພັນຮ່ວມມືໃນທຸກຂົງເຂດລະຫວ່າງສອງປະເທດ ເພາະວ່າ ຫວຽດນາມ ແມ່ນປະເທດທີ່ສຸດຍອດ, ໄດ້ຮັບການນໍາພາ ໂດຍພັກກອມມູນິດ, ຍາມໃດກໍສະແດງໃຫ້ເຫັນແນວທາງການຕ່າງປະເທດສັນຕິພາບ, ຮ່ວມມື, ເພື່ອຜົນປະໂຫຍດຂອງປະຊາຊົນສອງປະເທດ.

ຕອນບ່າຍວັນທີ 10 ພະຈິກ, ທ່ານປະທານປະເທດ ເລືອງເກື່ອງ ໄດ້ຕ້ອນຮັບ ທ່ານນາງ Paulina Voda Novic ປະທານພັກສັງຄົມ ຈີເລ

ທີ່ການຕ້ອນຮັບ, ທ່ານປະທານປະເທດ ເລືອງເກື່ອງ ຕີລາຄາສູງເລື່ອງສອງປະເທດ, ສອງພັກ ແບ່ງປັນຫຼາຍຈຸດທີ່ຄ້າຍຄືກັນກ່ຽວກັບຄວາມປາດຖະໜາເສລີພາບ, ເອກະລາດ, ຍຸຕິທໍາ, ສະເໝີພາບ, ຄວາມກ້າວໜ້າທາງສັງຄົມບົນພື້ນຖານການພົວພັນອັນໝັ້ນແກ່ນ, ແບ່ງປັນຜົນປະໂຫຍດລວມ, ມີຄວາມສາມາດບົ່ມຊ້ອນເພື່ອເປີດກວ້າງການຮ່ວມມື, ເພີ່ມເຕີມ ແລະໜູນຊ່ວຍກັນໃນວິວັດການພັດທະນາ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ການຮ່ວມມື, ພັດທະນາຢູ່ພາກພື້ນ ແລະໃນໂລກ.

ທ່ານປະທານປະເທດ ເລືອງເກື່ອງ ແລະຄະນະຜູ້ແທນຂັ້ນສູງຫວຽດນາມ ຢ້ຽມຢາມສໍານັກງານ ແລະພົບປະກັບທ່ານນາງ Paulina Voda Novic ປະທານພັກສັງຄົມ ຈີເລ. ພາບ: qdnd.vn

ທ່ານປະທານປະເທດ ເນັ້ນໜັກວ່າ ຫວຽດນາມ ປາດຖະໜາຢາກຮ່ວມມືກັບບັນດາປະເທດເພື່ອນມິດທີ່ເປັນມູນເຊື້ອຢູ່ພາກພື້ນອາເມລິກາລາຕິນ, ເປັນຕົ້ນແມ່ນກັບ ຈີເລ, ປະເທດສໍາຄັນແຖວໜ້າ, ມີບົດບາດນໍາພາວິວັດການເຊື່ອມໂຍງເຂົ້າກັບພາກພື້ນ, ເຊື່ອມຈອດພາກພື້ນ ແລະນັບມື້ນັບສວມບົດບາດສໍາຄັນກວ່າໃນບັນດາບັນຫາທົ່ວໂລກ. ທ່ານປະທານປະເທດ ຫວັງວ່າ ໃນໄລຍະຈະມາເຖິງ, ສອງພັກ ຕ້ອງເພີ່ມທະວີການປະສານສົມທົບກັນຢ່າງແໜ້ນແຟ້ນ ແລະຜັນຂະຫຍາຍຂໍ້ຕົກລົງຮ່ວມມືລະຫວ່າງສອງພັກຢ່າງມີປະສິດທິຜົນ, ພ້ອມທັງສືບຕໍ່ປັບປຸງຄວາມໄວ້ເນື້ອເຊື່ອໃຈຂັ້ນສູງ ແລະການພົວພັນດ້ານການເມືອງ ເພື່ອເປັນພື້ນຖານ ແລະກໍານົດທິດພັດທະນາການພົວພັນຮ່ວມມືຮອບດ້ານລະຫວ່າງສອງປະເທດ, ເປັນຕົ້ນແມ່ນໃນບັນດາຂົງເຂດທີ່ສອງຝ່າຍມີທ່າແຮງ.

ສ່ວນທ່ານນາງ Paulina Voda Novic ເນັ້ນໜັກວ່າ ການຢ້ຽມຢາມມີຄວາມໝາຍສໍາຄັນໃນການຊຸກຍູ້ການພົວພັນສອງປະເທດ ເວົ້າລວມ ແລະກັບສອງພັກເວົ້າສະເພາະ. ທ່ານນາງປະທານພັກສັງຄົມ ຈີເລ ຫວັງວ່າ ຫວຽດນາມ ຈະແບ່ງປັນບົດຮຽນທີ່ຕ່າງຝ່າຍຕ່າງມີຄວາມສົນໃຈ ຄື ບັນຫາຮັບປະກັນສະຫວັດດີການສັງຄົມ, ຮັບປະກັນຄວາມໝັ້ນຄົງ, ຄວາມປອດໄພໃຫ້ແກ່ປະຊາຊົນ, ພ້ອມທັງຢາກຮ່ວມມືກັບຫວຽດນາມ ໃນບັນຫາອົບພະຍົບຜິດກົດໝາຍ ແລະຕໍ່ສູ້ສະກັດກັ້ນ ແລະຕ້ານອາດຊະຍາກໍາ. ທ່ານນາງ Paulina Voda Novic ຢັ້ງຢືນວ່າ ໃນຖານະບົດບາດຂອງຕົນ, ພັກສັງຄົມ ຈີເລ ຈະສືບຕໍ່ຮັກສາ ແລະເສີມສ້າງການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ ໃຫ້ນັບມື້ນັບເຂົ້າສູ່ລວງເລິກ ແລະມີປະສິດທິຜົນ.

ຕອນບ່າຍວັນທີ 10 ພະຈິກ, ທ່ານປະທານປະເທດ ເລືອງເກື່ອງ ໄດ້ຕ້ອນຮັບຄະນະຜູ້ແທນສະຖາບັນວັດທະນະທໍາ ຈີເລ - ຫວຽດນາມ  ນໍາໂດຍທ່ານນາງ Patricia Abarzua ປະທານສະຖາບັນວັດທະນະທໍາ ຈີເລ - ຫວຽດນາມ.

ກ່າວຄໍາເຫັນທີ່ການຕ້ອນຮັບ, ທ່ານປະທານປະເທດ ເລືອງເກື່ອງ ຕີລາຄາສູງ ແລະເຄົາລົບນັບຖືການປະກອບສ່ວນຂອງສະຖາບັນວັດທະນະທໍາມິດຕະພາບ ຈີເລ - ຫວຽດນາມ ກໍຄືສ່ວນຕົວທ່ານນາງ Patricia Abarzua ໃຫ້ແກ່ການພົວພັນສອງປະເທດ, ພິເສດແມ່ນອາລົມຈິດອັນດີງາມ ເຊິ່ງ ທ່ານນາງ Patricia Abarzua ແລະສະມາຊິກຂອງສະຖາບັນສະຫງວນໃຫ້ແກ່ປະເທດ ແລະປະຊາຊົນຫວຽດນາມ; ກໍຄືຄວາມພະຍາຍາມບໍ່ຮູ້ອິດຮູ້ເມື່ອຍຂອງສະຖາບັນໃນການເພີ່ມທະວີຄວາມເຂົ້າໃຈໃຫ້ປະຊາຊົນຈີເລ ກ່ຽວກັບຫວຽດນາມ.

ທ່ານປະທານປະເທດ ເລືອງເກື່ອງ ຕ້ອນຮັບຄະນະຜູ້ແທນສະຖາບັນວັດທະນະທໍາ ຈີເລ - ຫວຽດນາມ ນໍາໂດຍທ່ານນາງ Patricia Abarzua ປະທານສະຖາບັນວັດທະນະທໍາ ຈີເລ - ຫວຽດນາມ. ພາບ: qdnd.vn

ທ່ານປະທານປະເທດ ສະແດງຄວາມປາດຖະໜາວ່າ ທ່ານນາງ Patricia Abarzua ແລະສະຖາບັນ ຈະສືບຕໍ່ເປັນຂົວຕໍ່ຊຸກຍູ້ການພົບປະແລກປ່ຽນປະຊາຊົນລະຫວ່າງຫວຽດນາມ ແລະຈີເລ ແລະສືບຕໍ່ຮ່ວມເດີນທາງກັບໝູ່ເພື່ອນເຖິງຫວຽດນາມ ແນໃສ່ເພີ່ມທະວີຄວາມເຂົ້າໃຈໃຫ້ປະຊາຊົນຈີເລ ແລະບັນດາປະເທດອາເມລິກາໃຕ້ ກ່ຽວກັບວັດທະນະທໍາ, ປະຫວັດສາດ, ປະເທດ ແລະຄົນຫວຽດນາມ.

ສ່ວນທ່ານນາງ Patricia Abarzua ຢັ້ງຢືນວ່າ ຈະສືບຕໍ່ພ້ອມກັບບັນດາສະມາຊິກໃນສະຖາບັນ ມານະພະຍາຍາມຊຸກຍູ້ການເຄື່ອນໄຫວສາມັກຄີ, ເປັນຂົວຕໍ່ເພື່ອໃຫ້ປະຊາຊົນ ຈີເລ ເຂົ້າໃຈແຈ້ງກວ່າກ່ຽວກັບປະເທດ ແລະຄົນຫວຽດນາມ, ພິເສດແມ່ນພາລະກິດສ້າງສາ ແລະພັດທະນາປະເທດໃນປັດຈຸບັນຂອງຫວຽດນາມ. ດ້ານໜຶ່ງອີກ, ສະຖາບັນ ກໍຈະສືບຕໍ່ປ່ຽນແປງໃໝ່ແບບວິທີການເຄື່ອນໄຫວ, ຮັບເອົາສະມາຊິກໃໝ່ແມ່ນຮຸ່ນໜຸ່ມຈີເລ ເທື່ອລະກ້າວ ເພື່ອສືບທອດມູນເຊື້ອ, ຕັ້ງໜ້າປະກອບສ່ວນເຂົ້າໃນການປັບປຸງ ແລະເຮັດໃຫ້ການພົວພັນມິດຕະພາບລະຫວ່າງສອງປະເທດເລິກເຊິ່ງກວ່າອີກ.

ຕອນຄໍ່າວັນທີ 10 ພະຈິກ, ທ່ານປະທານປະເທດ ເລືອງເກື່ອງ ໄດ້ໄປຢ້ຽມຢາມເຮືອນຂອງອະດີດປະທານາທິບໍດີ ຈີເລ Salvador Allende - ເພື່ອນຜູ້ຍິ່ງໃຫຍ່ຂອງປະທານໂຮ່ຈີມິນ ແລະປະຊາຊົນຫວຽດນາມ.

ທ່ານປະທານປະເທດ ສົ່ງຄໍາຢ້ຽມຢາມຖາມຂ່າວ ແລະອວຍພອນສຸຂະພາບບັນດາສະມາຊິກໃນຄອບຄົວ, ໃນນັ້ນມີທ່ານນາງ Isabel Allende ສະມາຊິກລັດຖະສະພາສູງ, ລູກສາວຂອງອະດີດປະທານາທິບໍດີ ຈີເລ Salvador Allende, ຜູ້ທີ່ມີອາລົມຈິດຄວາມຮັກແພງພິເສດຕໍ່ປະເທດ ແລະປະຊາຊົນຫວຽດນາມ.

ສະແດງຄວາມປິຕິຊົມຊື່ນທີ່ໄດ້ຕ້ອນຮັບທ່ານປະທານປະເທດ ເລືອງເກື່ອງ ແລະຄະນະຜູ້ແທນຫວຽດນາມ, ທ່ານນາງ Isabel Allende ຖືວ່າ ການຢ້ຽມຢາມຂອງຄະນະຜູ້ແທນຂັ້ນສູງຫວຽດນາມ ເຖິງຈີເລ ໃນຄັ້ງນີ້ປະກອບສ່ວນປັບປຸງ ແລະເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດກວ່າອີກ.

ທ່ານປະທານປະເທດ ເລືອງເກື່ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ຢ້ຽມຢາມເຮືອນອະດີດປະທານາທິບໍດີຈີເລ Salvador Allende. ພາບ: qdnd.vn

ທ່ານປະທານປະເທດ ເນັ້ນໜັກວ່າ ປະຊາຊົນຫວຽດນາມ ຮູ້ຈັກອະດີດປະທານາທິບໍດີ ຈີເລ Salvador Allende ຄືດັ່ງສັນຍາລັກຂອງຂະບວນການສາກົນສະໜັບສະໜູນຫວຽດນາມ ໃນການຕໍ່ສູ້ຕ້ານຈັກກະພັດອາເມລິກາ, ເປັນເພື່ອນ, ເປັນສະຫາຍ ແລະນັກການເມືອງຕ່າງປະເທດຜູ້ສຸດທ້າຍທີ່ໄດ້ພົບປະທານ ໂຮ່ຈີມິນ ກ່ອນທີ່ເພິ່ນລ່ວງລັບ. ການຢ້ຽມຢາມພິເສດນັ້ນຂອງອະດີດປະທານາທິບໍດີ ຈີເລ Salvador Allende  ໄດ້ນໍາເອົາອາລົມຈິດຄວາມສາມັກຄີ, ແຫຼ່ງລະດົມກໍາລັງໃຈອັນໃຫຍ່ຫຼວງມາໃຫ້ປະຊາຊົນຫວຽດນາມ ໃນການຕໍ່ສູ້ປົດປ່ອຍຊາດ ແລະກາຍເປັນສັນຍາລັກແຫ່ງນໍ້າໃຈມິດຕະພາບລະຫວ່າງສອງຊາດຫວຽດນາມ ແລະຈີເລ, ພ້ອມກັນນັ້ນ, ອະດີດປະທານາທິບໍດີ ຈີເລ Salvador Allende  ກໍ່ແມ່ນຜູ້ນໍາທີ່ມີບົດບາດຕັດສິນໃນການສ້າງຕັ້ງການພົວພັນທາງການທູດລະຫວ່າງສອງປະເທດ, ຜ່ານນັ້ນນໍາ ຈີເລ ກາຍເປັນປະເທດທໍາອິດຢູ່ອາເມລິກາໃຕ້ ແລະປະເທດທີສອງຢູ່ອາເມລິກາລາຕິນ ແລະCaribe ມີການພົວພັນກັບຫວຽດນາມ.

ທ່ານປະທານປະເທດ ຢັ້ງຢືນວ່າ ບົນພື້ນຖານການພົວພັນອັນສະໜິດແໜ້ນ ໂດຍປະທານ ໂຮ່ຈີມິນ ແລະອະດີດປະທານາທິບໍດີ ຈີເລ Salvador Allende ເປັນຜູ້ກໍ່ຕັ້ງ, ການພົວພັນລະຫວ່າງສອງປະເທດໄດ້ຮັບການເພີ່ມພູນຄູນສ້າງຜ່ານລູ້ນຕ່າງໆ ນັບມື້ນັບເຂົ້າສູ່ລວງເລິກ ແລະແທດຈິງ; ພ້ອມກັນນັ້ນ, ຜ່ານການຢ້ຽມຢາມຄັ້ງນີ້, ສອງຝ່າຍຈະກໍານົດບັນດາຂົງເຂດຮ່ວມມືຈຸດສຸມທີ່ມີລັກສະນະບຸກທະລຸຍຸດທະສາດ ເພື່ອສະໜິດຕິດພັນສອງພື້ນຖານເສດຖະກິດກວ່າອີກ, ປະກອບສ່ວນຢ່າງແທດຈິງເຂົ້າໃນພາລະກິດພັດທະນາຂອງຫວຽດນາມ ແລະຈີເລ.

ໂອກາດນີ້, ທ່ານປະທານປະເທດ ເລືອງເກື່ອງ ແລະທ່ານນາງ Isabel Allende ຍັງໄດ້ແລກປ່ຽນກ່ຽວກັບບົດຮຽນທີ່ຫວຽດນາມ ໄດ້ຜ່ານຜ່າໃນໄລຍະແກ້ໄຂຜົນຮ້າຍຢ້ອນຫຼັງຈາກສົງຄາມ, ດໍາເນີນພາລະກິດປ່ຽນແປງໃໝ່ ແລະກໍ່ສ້າງຫວຽດນາມ ເປັນປະເທດທີ່ມີພື້ນຖານເສດຖະກິດພັດທະນາຂະຫຍັນຂັນເຄື່ອນ,  ມີບົດບາດ, ຖານະທີ່ຕັ້ງ ແລະອິດທິພົນຊື່ສຽງສາກົນ ຄືໃນປັດຈຸບັນ.

ໂດຍ: ໄຊຊະນະ