ປະທານປະເທດຫວຽດນາມ ຢ້ຽມຢາມສະຖານທູດ ແລະປະຊາຄົມຊາວຫວຽດນາມ ປະຈຳ ຈີເລ

ພິທີຕ້ອນຮັບທ່ານ ເລືອງເກື່ອງ ປະທານປະເທດຫວຽດນາມ ທີ່ສະໜາມບິນສາກົນ Santiago. ພາບ: qdnd.vn

ກ່າວຄຳເຫັນທີ່ການພົບປະ, ທ່ານ ຫງວຽນຫວຽດເກື່ອງ ເອກອັກຄະລັດຖະທູດຫວຽດນາມ ປະຈຳ ຈີເລ ຢືນຢັນວ່າ ບົນພື້ນຖານການພົວພັນມິດຕະພາບທີ່ເປັນມູນເຊື້ອ, ໄດ້ຮັບການເພີ່ມພູນຄູນສ້າງຈາກການນຳ ແລະປະຊາຊົນສອງປະເທດຫຼາຍລຸ້ນຄົນ, ໜ້າທີ່ຈຸດສຸມ ແລະລຸລ່ວງຂອງສະຖານທູດຫວຽດນາມ ປະຈຳ ຈີເລ ແມ່ນການຮັກສາການພົວພັນທາງການເມືອງອັນດີງາມລະຫວ່າງສອງປະເທດ. ພະນັກງານ, ພາລະກອນສະຖານທູດ ແລະປະຊາຄົມຊາວຫວຽດນາມ ປະຈຳ ຈີເລ ຍາມໃດກໍ່ເຊື່ອໝັ້ນຕໍ່ແນວທາງ, ນະໂຍບາຍຂອງພັກ, ລັດ, ກໍ່ຄື ທີ່ຕັ້ງຂອງປະເທດນັບມື້ນັບເພີ່ມຂຶ້ນ ແລະມີຄວາມໄວ້ເນື້ອເຊື່ອໃຈຕໍ່ການບືນຕົວຂຶ້ນຂອງປະເທດຊາດ, ສ້າງສາປະເທດຫວຽດນາມ ໃຫ້ພັດທະນາ.

ໃນທ່າມກາງບັນຍາກາດທີ່ສະໜິດສະໜົມ, ອົບອຸ່ນ, ຕາງໜ້າການນຳພັກ ແລະລັດ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ສົ່ງສານອວຍພອນອັນດີງາມທີ່ສຸດເຖິງປະຊາຄົມຊາວຫວຽດນາມ ທີ່ພວມດຳລົງຊີວິດ ແລະເຮັດວຽກຢູ່ຈີເລ, ບັນດາພະນັກງານ, ພາລະກອນສະຖານທູດ ແລະຄອບຄົວ ດ້ວຍອາລົມຈິດຄວາມຮັກແພງທີ່ຈິງໃຈ. ທ່ານປະທານປະເທດ ໄດ້ຍ້ອງຍໍຊົມເຊີຍ ແລະຕີລາຄາສູງຕໍ່ຄວາມມານະພະຍາຍາມ, ຜົນງານຂອງສະຖານທູດ ແລະປະຊາຄົມຊາວຫວຽດນາມ ປະຈຳ ຈີເລ ໃນການຜັນຂະຫຍາຍແນວທາງ, ນະໂຍບາຍການພົວພັນຕ່າງປະເທດຂອງພັກ ແລະລັດ, ປະກອບສ່ວນສືບຕໍ່ພັດທະນາການພົວພັນຮ່ວມມືຮອບດ້ານ ຫວຽດນາມ - ຈີເລ.

ທ່ານ ເລືອງເກື່ອງ ປະທານປະເທດຫວຽດນາມ ກ່າວຄຳເຫັນທີ່ການພົບປະກັບພະນັກງານ, ພາລະກອນສະຖານທູດ ແລະຜູ້ຕາງໜ້າປະຊາຄົມຊາວຫວຽດນາມ ປະຈຳ ຈີເລ. ພາບ: qdnd.vn

ທ່ານປະທານປະເທດ ຢືນຢັນວ່າ ພັກ ແລະລັດ ຍາມໃດກໍ່ເອົາໃຈໃສ່ ແລະຖືປະຊາຄົມຊາວຫວຽດນາມ ຢູ່ຕ່າງປະເທດແມ່ນພາກສ່ວນໜຶ່ງທີ່ຂາດບໍ່ໄດ້, ແມ່ນແຫຼ່ງກໍາລັງຂອງວົງຄະນະຍາດແຫ່ງຊາດ ແລະແມ່ນປັດໄຈສຳຄັນປະກອບສ່ວນເພີ່ມທະວີການພົວພັນຮ່ວມມື, ມິດຕະພາບລະຫວ່າງຫວຽດນາມ ກັບບັນດາປະເທດ. ທ່ານປະທານປະເທດ ສະເໜີໃຫ້ສະຖານທູດສືບຕໍ່ເສີມຂະຫຍາຍບົດບາດເປັນຂົວເຊື່ອມຕໍ່ຊຸກຍູ້ ແລະເຮັດໃຫ້ການພົວພັນແບບພິເສດລະຫວ່າງຫວຽດນາມ ແລະຈີເລ ເລິກເຊິ່ງກວ່າອີກ. ທ່ານປະທານປະເທດ ເຊື່ອໝັ້ນວ່າ ປະຊາຄົມຊາວຫວຽດນາມ ຢູ່ ຈີເລ ຈະນັບມື້ນັບພັດທະນາ, ຕັ້ງໜ້າເຊື່ອມໂຍງເຂົ້າກັບສັງຄົມຂອງປະເທດປະຈໍາຖິ່ນ, ສືບຕໍ່ປະຕິບັດກົດໝາຍຂອງປະເທດປະຈໍາຖິ່ນ, ຮັກສາສີສັນຊາດ ແລະບ້ານເກີດເມືອງນອນ, ເປັນຂົວເຊື່ອມຕໍ່ທີ່ເຂັ້ມແຂງໃຫ້ແກ່ການພົວພັນມິດຕະພາບລະຫວ່າງສອງປະເທດໃຫ້ນັບມື້ນັບພັດທະນາຍິ່ງໆຂຶ້ນ.

ໂດຍ: ຈາງຫງວຽນ