ນາຍົກລັດຖະມົນຕີຫວຽດນາມ ຕ້ອນຮັບລັດຖະມົນຕີກະຊວງການລົງທຶນ, ການຄ້າ ແລະອຸດສາຫະກຳມາເລເຊຍ
ກປ.ອອນໄລ - ຕອນບ່າຍວັນທີ 8 ກໍລະກົດ, ຢູ່ສຳນັກງານນາຍົກລັດຖະມົນຕີ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Zafrul Abdul Aziz ລັດຖະມົນຕີກະຊວງການລົງທຶນ, ການຄ້າ ແລະອຸດສາຫະກຳມາເລເຊຍ ທີ່ພວມຢ້ຽມຢາມ ແລະເຮັດວຽກຢູ່ ຫວຽດນາມ ແລະເປັນປະທານຮ່ວມກອງປະຊຸມຄັ້ງທີ 4 ຂອງຄະນະກໍາມະການປະສົມການຄ້າ ຫວຽດນາມ - ມາເລເຊຍ ຢູ່ຮ່າໂນ້ຍ.
ທີ່ການພົບປະ, ທ່ານນາຍົກລັດຖະມົນຕີຫວຽດນາມ ຢືນຢັນວ່າ ມາເລເຊຍ ແມ່ນຄູ່ຮ່ວມມືສຳຄັນຂອງຫວຽດນາມ, ພິເສດແມ່ນດ້ານການຄ້າ ແລະການລົງທຶນ. ບັນດາວິສາຫະກິດມາເລເຊຍ ນັບມື້ນັບເຂົ້າຮ່ວມການລົງທຶນຢູ່ຫວຽດນາມ ຫຼາຍຂຶ້ນ ແລະມີປະສິດທິຜົນກວ່າອີກ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຕ້ອນຮັບທ່ານ Zafrul Abdul Aziz ລັດຖະມົນຕີກະຊວງການລົງທຶນ, ການຄ້າ ແລະອຸດສາຫະກຳມາເລເຊຍ. ພາບ: ສໍານັກຂ່າວສານຫວຽດນາມ |
ທ່ານນາຍົກລັດຖະມົນຕີ ຖືວ່າ, ທ່າແຮງບົ່ມຊ້ອນການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ 2 ປະເທດແມ່ນໃຫຍ່ຫຼວງຢູ່, ເປົ້າໝາຍວົງເງິນການຄ້າ 20 ຕື້ໂດລາສະຫະລັດໃນຊຸມປີຈະມາເຖິງແມ່ນເປັນໄປໄດ້; ສະເໜີໃຫ້ສອງປະເທດສືບຕໍ່ເສີມຂະຫຍາຍທ່າແຮງທີ່ມີລັກສະນາໜູນຊ່ວຍກັນຂອງສອງພື້ນຖານເສດຖະກິດ, ຄົ້ນຄວ້າ ແລະຊອກຫາມາດຕະການສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ 2 ປະເທດ ກໍ່ຄືເຂົ້າຮ່ວມໃນລະບົບຮ່ວມສຳພັນ ແລະການສະໜອງທົ່ວໂລກ.
ທ່ານນາຍົກລັດຖະມົນຕີ ກໍ່ສະເໜີໃຫ້ຝ່າຍມາເລເຊຍ ສ້າງເງື່ອນໄຂສະດວກໃຫ້ສິນຄ້າຫວຽດນາມ ແຊກແຊງເຂົ້າຕະຫຼາດມາເລເຊຍ ໄດ້ດີກວ່າອີກ, ພິເສດແມ່ນບັນດາຜະລິດຕະພັນກະເສດປຸງແຕ່ງ, ສິນໃນນໍ້າ, ສະບຽງອາຫານ; ຮ່ວມມື ແລະໜູນຊ່ວຍຫວຽດນາມ ພັດທະນາຂະແໜງອຸດສາຫະກຳ Halal ແລະຊຸກຍູ້ບັນດາວິສາຫະກິດມາເລເຊຍ ມາລົງທຶນຢູ່ຫວຽດນາມ ໃນຂົງເຂດນີ້, ກໍ່ຄືບັນດາຂົງເຂດຫັນປ່ຽນດີຈີຕອນ, ຫັນປ່ຽນສີຂຽວ, ພະລັງງານສະອາດ, ການສົ່ງອອກພະລັງງານໄຟຟ້າແຮງລົມ; ຊຸກຍູ້ການຮ່ວມມືໃນຂົງເຂດທີ່ຫາກໍ່ພົ້ນເດັ່ນຂຶ້ນ ຄື ປ່ຽນແປງໃໝ່ປະດິດຄິດສ້າງ, ປັນຍາປະດິດ, ຮັບປະກັນຄວາມປອດໄພເຄືອຂ່າຍອິນເຕີເນັດ...
ເມື່ອແລກປ່ຽນກ່ຽວກັບບັນດາບັນຫາພາກພື້ນ ແລະສາກົນ, ທ່ານນາຍົກລັດຖະມົນຕີ ໄດ້ເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລ ແລະການບິນຢູ່ທະເລຕາເວັນອອກ; ແກ້ໄຂການຂັດແຍ່ງໂດຍສັນຕິວິທີບົນພື້ນຖານກົດໝາຍສາກົນ, ພິເສດແມ່ນກົດບັດສະຫະປະຊາຊາດ ແລະສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍຍທະເລປີ 1982 (UNCLOS 1982); ທ່ານໃຫ້ຮູ້ວ່າ, ຫວຽດນາມ ສະໜັບສະໜູນບົດບາດປະທານອາຊຽນ ໃນປີ 2025 ຂອງມາເລເຊຍ ແລະສະເໜີຝ່າຍ ມາເລເຊຍ ສະໜັບສະໜູນບັນດາຄວາມມານະພະຍາຍາມຂອງ ຫວຽດນາມ ເພື່ອຍົກເລີກ “ບັດເຫຼືອງ” ຂອງ IUU.
ເຫັນດີກັບຄຳເຫັນຂອງທ່ານນາຍົກລັດຖະມົນຕີຫວຽດນາມ, ທ່ານ Zafrul Abdul Aziz ໃຫ້ຮູ້ວ່າ: ຝ່າຍມາເລເຊຍ ມີຄວາມຄອງຄອຍ ແລະຕັ້ງຄວາມຫວັງຕໍ່ການຮ່ວມມືກັບຫວຽດນາມ, ປາດຖະໜາຢາກຊຸກຍູ້ການຮ່ວມມືລະຫວ່າງບັນດາວິສາຫະກິດ, ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ 2 ປະເທດໃຫ້ພັດທະນາຢ່າງແຮງກວ່າອີກ. ທ່ານລັດຖະມົນຕີ ຢືນຢັນວ່າ: ມາເລເຊຍ ຍາມໃດກໍ່ສະໜັບສະໜູນບົດບາດໃຈກາງຂອງອາຊຽນ ໃນບັນດາບັນຫາພາກພື້ນ ແລະມາເລເຊຍ ຫວັງວ່າ ຫວຽດນາມ ຈະສືບຕໍ່ສະໜັບສະໜູນມາເລເຊຍ ໃນບົດບາດເປັນປະທານອາຊຽນ ໃນປີ 2025.
ໂດຍ: ທະນາພອນ