ທ່ານນາງ ຫວໍທິແອັງຊວນ ຮັກສາການປະທານປະເທດ ຕອບບຸນແທນຄຸນບັນດາວິລະຊົນນັກຮົບເສຍສະຫຼະຊີວິດເພື່ອຊາດ, ນັກຮົບດ້ຽນບຽນ
ກປ.ອອນໄລ - ຕອນບ່າຍວັນທີ 21 ເມສາ, ຄະນະປະຕິບັດງານນໍາໂດຍທ່ານນາງ ຫວໍທິແອັງຊວນ ກໍາມະການສູນກາງພັກ, ຮັກສາການປະທານປະເທດ ໄດ້ຖະຫວາຍດອກໄມ້, ທູບທຽນຢູ່ວິຫານນັກຮົບເສຍສະຫຼະຊີວິດເພື່ອຊາດຢູ່ສະໜາມຮົບດ້ຽນບຽນຝູ ແລະສຸສານນັກຮົບເສຍສະຫຼະຊີວິດເພື່ອຊາດ ແຫ່ງຊາດ A1 ນະຄອນ ດ້ຽນບຽນຝູ, ແຂວງດ້ຽນບຽນ.
ໃນບັນຍາກາດອັນເຄັ່ງຂຶມ, ສະເທືອນໃຈ, ບັນດາຜູ້ແທນໄດ້ສະແດງຄວາມເຄົາລົບນັບຖື ແລະຮູ້ບຸນຄຸນຢ່າງເລິກເຊິ່ງຕໍ່ທ່ານປະທານໂຮ່ຈີມິນ ຜູ້ຍິ່ງໃຫຍ່, ອາໄລຫາພົນເອກ ຫວໍງວຽນຢາບ ພ້ອມດ້ວຍພະນັກງານ, ນັກຮົບ, ຊາວໜຸ່ມປະຈັນບານ, ແຮງງານເກນ ແລະປະຊາຊົນທີ່ໄດ້ຕໍ່ສູ້ ແລະເສຍສະຫຼະຊີວິດໃນດິນແດນດ້ຽນບຽນຝູ ຢ່າງພິລະອາດຫານ, ປະກອບສ່ວນສ້າງໄຊຊະນະປະຫວັດສາດ “ດ້ຽນບຽນໂດ່ງດັງ, ສັ່ນສະເທືອນໄປທົ່ວໂລກ”.
|
|
ທ່ານນາງ ຫວໍທິແອັງຊວນ ຮັກສາການປະທານປະເທດ ຖະຫວາຍທູບທຽນຢູ່ວິຫານນັກຮົບເສຍສະຫຼະຊີວິດ ເພື່ອຊາດຢູ່ສະໜາມຮົບດ້ຽນບຽນຝູ. ພາບ: qdnd.vn |
ຕໍ່ໜ້າດວງວິນຍານບັນດາວິລະຊົນນັກຮົບເສຍສະຫຼະຊີວິດເພື່ອຊາດ, ບັນດາຜູ້ແທນໄດ້ໝັ້ນໝາຍວ່າ ຈະເສີມຂະຫຍາຍຈິດໃຈໄຊຊະນະດ້ຽນບຽນຝູ, ສືບຕໍ່ມານະພະຍາຍາມພ້ອມກັບທົ່ວພັກ, ທົ່ວປວງຊົນ, ທົ່ວກອງທັບເພື່ອປະຕິບັດພາລະກິດປ່ຽນແປງໃໝ່, ຫັນປະເທດຊາດເປັນອຸດສາຫະກຳ, ຫັນເປັນທັນສະໄໝຢ່າງມີໄຊ, ສ້າງສາປະເທດຊາດຫວຽດນາມ ສັງຄົມນິຍົມໃຫ້ນັບມື້ນັບຈະເລີນຮັ່ງມີ, ວັດທະນາຖາວອນ.
ຕອນບ່າຍວັນດຽວກັນ, ຄະນະປະຕິບັດງານໄດ້ລົງໄປຢ້ຽມຢາມ ແລະມອບຂອງຂວັນໃຫ້ນັກຮົບເກົ່າ ຫງວຽນຮືວເຈິບ, ເກີດປີ 1931, ອາໄສຢູ່ເມືອງຮີມລາມ ແລະນັກຮົບເກົ່າ ຫງວຽນວຽດດ໊ຽມ, ເກີດປີ 1930, ອາໄສຢູ່ຕາແສງແທງບິ່ງ, ນະຄອນ ດ້ຽນບຽນຝູ ທີ່ເຂົ້າຮ່ວມບັ້ນຮົບ ດ້ຽນບຽນຝູ ໂດຍກົງ.
|
|
ທ່ານນາງ ຫວໍທິແອັງຊວນ ຮັກສາການປະທານປະເທດ ຢ້ຽມຊົມຫໍພິພິທະພັນໄຊຊະນະປະຫວັດສາດດ້ຽນບຽນຝູ. ພາບ: qdnd.vn |
ຕອນບ່າຍວັນທີ 21 ເມສາ, ທ່ານນາງ ຫວໍທິແອັງຊວນ ຮັກສາການປະທານປະເທດ ແລະຄະນະປະຕິບັດງານໄດ້ໄປຢ້ຽມຊົມຫໍພິພິທະພັນໄຊຊະນະປະຫວັດສາດ ດ້ຽນບຽນຝູ.
ໂດຍ: ທະນາພອນ