ສະພາແຫ່ງຊາດຫວຽດນາມ ພ້ອມແລ້ວທີ່ຈະແບ່ງປັນບົດຮຽນກ່ຽວກັບການຕິດຕາມກວດກາການເງິນກັບກະຊວງການເງິນລາວ
ກປ.ອອນໄລ - ຢູ່ນະຄອນຫຼວງວຽງຈັນ, ໃນຂອບເຂດການຢ້ຽມຢາມລາວ ຢ່າງເປັນທາງການ, ຕອນຫົວຄໍ່າວັນທີ 16 ພຶດສະພາ, ທ່ານ ເວືອງດີ່ງເຫ້ວ ປະທານສະພາແຫ່ງຊາດຫວຽດນາມ ໄດ້ຕ້ອນຮັບທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນລາວ.
ທ່ານ ເວືອງດີ່ງເຫ້ວ ໃຫ້ຮູ້ວ່າ ໃນສະພາບການໂລກພວມມີສິ່ງທ້າທາຍ, ຄວາມຫຍຸ້ງຍາກຫຼາຍຢ່າງ ແລະກາລະໂອກາດ, ຂະແໜງການເງິນມີບົດບາດໜ້າທີ່ສໍາຄັນທີ່ສຸດ. ທ່ານປະທານສະພາແຫ່ງຊາດໄດ້ສະແດງຄວາມໄວ້ເນື້ອເຊື່ອໃຈວ່າ ດ້ວຍລະດັບຄວາມຮູ້, ບົດຮຽນຂອງທ່ານ ບຸນໂຈມ ອຸບົນປະເສີດ ຈະນໍາພາຂະແໜງການເງິນລາວ ໝູນໃຊ້ບັນດາກາລະໂອກາດ, ຜ່ານຜ່າສິ່ງທ້າທາຍ, ຄວາມຫຍຸ້ງຍາກເພື່ອເປັນເສນາທິການຊ່ວຍພັກ, ລັດຖະບານ ແລະສະພາແຫ່ງຊາດລາວ ພັດທະນາໂດຍໄວ, ໝັ້ນຄົງ ແລະຍືນຍົງກວ່າອີກ.
|
|
ທ່ານ ເວືອງດີ່ງເຫ້ວ ປະທານສະພາແຫ່ງຊາດຫວຽດນາມ ຕ້ອນຮັບທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນລາວ. ພາບ: ສໍານັກຂ່າວສານຫວຽດນາມ |
ທ່ານ ເວືອງດີ່ງເຫ້ວ ໃຫ້ຮູ້ວ່າ ສະພາແຫ່ງຊາດຫວຽດນາມ ແລະໃນນາມສ່ວນຕົວຍາມໃດກໍ່ສະໜັບສະໜູນ, ສ້າງເງື່ອນໄຂໃຫ້ຂະແໜງການເງິນສອງປະເທດເພີ່ມທະວີການພົບປະແລກປ່ຽນໜູນຊ່ວຍເຊິ່ງກັນແລະກັນ; ທ່ານຢັ້ງຢືນວ່າ ຖ້າກະຊວງການເງິນລາວ ປາດຖະໜາຢາກເຮັດວຽກກັບກໍາມາທິການການເງິນ-ງົບປະມານຂອງສະພາແຫ່ງຊາດກ່ຽວກັບບົດຮຽນຕິດຕາມກວດກາການເງິນ ແລະສາຍພົວພັນລະຫວ່າງສະພາແຫ່ງຊາດ ແລະລັດຖະບານໃນຂົງເຂດນີ້, ສະພາແຫ່ງຊາດຫວຽດນາມ ຍາມໃດກໍ່ພ້ອມແລ້ວທີ່ຈະໃຫ້ການຮ່ວມມື ແລະ ແລກປ່ຽນ.
ທ່ານ ບຸນໂຈມ ອຸບົນປະເສີດ ໃຫ້ຮູ້ວ່າ ໃນໄລຍະຈະມາເຖິງ, ກະຊວງການເງິນລາວ ສະເໜີໄປຢ້ຽມຢາມ ແລະແລກປ່ຽນການຮ່ວມມືຂອງສອງກະຊວງການເງິນໃນ 5 ປີຈະມາເຖິງ, ພ້ອມທັງຮຽນເອົາບົດຮຽນຈາກກະຊວງການເງິນຫວຽດນາມ ໃນການປະຕິຮູບວິສາຫະກິດ ແລະແກ້ໄຂໜີ້ສິນສາທາລະນະ. ສະເພາະໃນປີ 2022, “ປີສາມັກຄີມິດຕະພາບຫວຽດນາມ-ລາວ”, ສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມືລະຫວ່າງສອງປະເທດ, ສອງຝ່າຍຈະມີການເຄື່ອນໄຫວທີ່ເປັນຫຼາຍຮູບຫຼາຍແບບກວ່າອີກ.
ໂດຍ: ຈາງຫງວຽນ