ທ່ານນາຍົກລັດຖະມົນຕີ ຟ້າມມິງຈິ໊ງ ພົບປະການນຳອົງການສື່ມວນຊົນ
ກປ.ອອນໄລ - ຕອນບ່າຍວັນທີ 20 ມິຖຸນາ, ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽດນາມ ຟ້າມມິງຈິ໊ງ ໄດ້ພົບປະການນຳອົງການສື່ມວນຊົນເນື່ອງໃນໂອກາດສະເຫຼີມສະຫຼອງ 96 ປີແຫ່ງວັນສື່ມວນຊົນປະຕິວັດຫວຽດນາມ (21-6-1925 / 21-6-2021).
ກ່າວຄຳເຫັນທີ່ການພົບປະ, ທ່ານນາຍົກລັດຖະມົນຕີ ເນັ້ນໜັກວ່າ ລັດຖະບານ ຍາມໃດກໍ່ຮັບຟັງ, ເຂົ້າໃຈ, ແບ່ງປັນຄວາມຫຍຸ້ງຍາກ, ສິ່ງທ້າທາຍ, ຕີລາຄາສູງ ແລະມີມາດຕະການສ້າງເງື່ອນໄຂສະດວກໃຫ້ແກ່ການເຄື່ອນໄຫວຂອງອົງການສ່ືມວນຊົນ, ນັກຂ່າວ, ຮັບປະກັນປະຕິບັດຖືກຕາມຂໍ້ກຳນົດຂອງກົດໝາຍໃນຂອບເຂດສິດອຳນາດຂອງລັດຖະບານ.
|
|
ທ່ານນາຍົກລັດຖະມົນຕີ ຟ້າມມິງຈິ໊ງ ສະແດງຄວາມຊົມເຊີຍນັກຂ່າວທີ່ມີການປະກອບສ່ວນໃຫ້ແກ່ພາລະກິດສື່ມວນຊົນ. ພາບ: ສຳນັກຂ່າວສານຫວຽດນາມ. |
ທ່ານນາຍົກລັດຖະມົນຕີ ຫວັງວ່າ ລັດຖະບານຈະໄດ້ຮັບການສະໜັບສະໜູນ, ການປະກອບຄຳເຫັນຈາກນັກຂ່າວເພື່ອສ້າງລັດຖະບານໃຫ້ມີຄວາມຊື່ກົງບໍລິສຸດ, ມີການກະທຳຢ່າງຂ້ຽວຂາດ, ມີປະສິດທິຜົນ, ເຂົ້າໃຈປະຊາຊົນ, ໃກ້ຊິດຕິດແທດກັບປະຊາຊົນ, ທຸກສິ່ງທຸກຢ່າງແມ່ນເພື່ອຜົນປະໂຫຍດຂອງຊາດ, ຂອງປະຊາຊົນ.
ໂດຍ: ແສງເດືອນ