ກູບາ ພ້ອມແລ້ວທີ່ຈະຮ່ວມມືກັບຫວຽດນາມ ໃນການສະໜອງ, ຜະລິດວັກຊິນ
ກປ.ອອນໄລ - ຕອນຄໍ່າວັນທີ 16 ມິຖຸນາ, ທ່ານ ສຈ. ປອ ຫງວຽນແທັງລອງ, ລັດຖະມົນຕີກະຊວງສາທາລະນະສຸກ ໄດ້ເຮັດວຽກທາງອອນລາຍ ກັບທ່ານ Jose Angel Portal Miranda ລັດຖະມົນຕີກະຊວງສາທາລະນະສຸກກູບາ; ການນໍາຂອງສູນເຕັກນິກ Gene ແລະເຕັກໂນໂລຢີຊີວະພາບກູບາ (CIGB), ກຸ່ມບໍລິສັດການຢາ-ຊີວະພາບກູບາ (BIOCUBAFARMA) ກ່ຽວກັບບັນຫາສະໜອງວັກຊິນປ້ອງກັນໂຄວິດ-19 ໂດຍກູບາ ຜະລິດ ແລະຖ່າຍທອດເຕັກໂນໂລຢີໃນການຜະລິດ, ໃສ່ກ້ອງ ແລະອັດວັກຊິນນີ້ຢູ່ຫວຽດນາມ.
    |
 |
|
ທ່ານ ຫງວຽນແທັງລອງ, ລັດຖະມົນຕີກະຊວງສາທາລະນະສຸກຫວຽດນາມ ເຮັດວຽກທາງອອນລາຍກັບທ່ານ Jose Angel Portal Miranda ລັດຖະມົນຕີກະຊວງສາທາລະນະສຸກກູບາ. ພາບ: ເຈິ່ນມິງ. |
ຝ່າຍກູບາ ໃຫ້ຮູ້ວ່າ ວັກຊິນປ້ອງກັນໂຄວິດ-19 Abdala ຂອງກູບາ ໄດ້ຜ່ານ 3 ໄລຍະທົດລອງເບື້ອງຕົ້ນມາແລ້ວ. ຜົນການທົດລອງໄດ້ສະແດງໃຫ້ເຫັນວ່າວັກຊິນ Abdala ສາມາດສະກັດກັ້ນ SARS-CoV-2 ສາຍພັນໃໝ່ປະເພດຕ່າງໆໄດ້ ເຊິ່ງເປັນຄັ້ງທໍາອິດທີ່ກວດພົບຢູ່ອາຟຣີກາ ແລະບຣາຊີນ, ມີຄວາມປອດໄພສູງ, ມີຄວາມຕ້ານທານຕໍ່ພະຍາດໄດ້ດີ. ຝ່າຍກູບາ ສະແດງຄວາມພ້ອມໃນການລົງນາມຮ່ວມມືກັບຫວຽດນາມ ກ່ຽວກັບການສະໜອງວັກຊິນ Abdala, ພ້ອມທັງຮ່ວມມືກັບຫວຽດນາມ ເພື່ອຖ່າຍທອດເຕັກໂນໂລຢີໃນການຜະລິດວັກຊິນນີ້. ຖ້າຫວຽດນາມ ຕ້ອງການວັກຊິນທີ່ກູບາ ກຳລັງຜະລິດຢູ່ຫຼາຍກວ່າຈໍານວນທີ່ມີໃນປັດຈຸບັນນັ້ນ ກູບາ ຈະເປີດໂຮງງານຜະລິດຕື່ມອີກ 2 ແຫ່ງເພື່ອຕອບສະໜອງຄວາມຕ້ອງການຂອງຫວຽດນາມ.
ທ່ານລັດຖະມົນຕີ ຫງວຽນແທັງລອງ ສະແດງຄວາມຂອບໃຈຕໍ່ເຈດຕະນາດີຂອງກູບາ ໃນການຮ່ວມມືກັບຫວຽດນາມ. ກະຊວງສາທາລະນະສຸກຫວຽດນາມ ສະໜັບສະໜູນການຮ່ວມມືນີ້ ແລະມອບໃຫ້ສູນວັກຊິນ ແລະຢາຊີວະພາບ ຍາຈາງ (IVAC) ເປັນຫົວໜ່ວຍຕິດຕໍ່ພົວພັນໃນການຮັບເອົາການຖ່າຍທອດເຕັກໂນໂລຢີ ແລະຜະລິດວັກຊິນ Abdala.
ໂດຍ: ກວຽດເຕິມ