ທ່ານເລຂາທິການໃຫຍ່ ຫງວຽນຝູຈ້ອງ ສົນທະນາທາງໂທລະສັບກັບປະທານາທິບໍດີສະຫະພັນລັດເຊຍ
ກປ.ອອນໄລ - ວັນທີ 5 ເມສາ, ທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ມີການສົນທະນາທາງໂທລະສັບກັບທ່ານ Vladimir Putin ປະທານາທິບໍດີສະຫະພັນລັດເຊຍ.
ທີ່ການສົນທະນາທາງໂທລະສັບ, ທ່ານ ຫງວຽນຝູຈ້ອງ ໄດ້ຢັ້ງຢືນວ່າ ພັກ ແລະລັດຫວຽດນາມ ຖືເປັນສໍາຄັນສາຍພົວພັນມິດຕະພາບທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ-ສະຫະພັນລັດເຊຍ; ສະແດງຄວາມຂອບອົກຂອບໃຈຕໍ່ປະຊາຊົນໂຊວຽດໃນເມື່ອກ່ອນ ແລະປະຊາຊົນລັດເຊຍອ້າຍນ້ອງໃນປະຈຸບັນ ທີ່ຍາມໃດກໍ່ໃຫ້ການຊ່ວຍເຫຼືອຢ່າງສຸດຈິດສຸດໃຈແກ່ຫວຽດນາມ, ພ້ອມທັງສະແດງຄວາມປາດຖະໜາວ່າ ສາຍພົວພັນຫວຽດນາມ-ສະຫະພັນລັດເຊຍ ນັບມື້ນັບພັດທະນາ, ນໍາມາເຊິ່ງຜົນປະໂຫຍດຢ່າງແທດຈິງໃຫ້ປະຊາຊົນສອງປະເທດ, ປະກອບສ່ວນໃຫ້ສັນຕິພາບ, ການພັດທະນາຂອງພາກພື້ນ ແລະສາກົນ.
|
|
ບັນຍາກາດທີ່ການສົນທະນາທາງໂທລະສັບ. ພາບ: ສໍານັກຂ່າວສານຫວຽດນາມ. |
ທ່ານເລຂາທິການໃຫຍ່ ຫງວຽນຝູຈ້ອງ ແລະທ່ານ Vladimir Putin ປະທານາທິບໍດີສະຫະພັນລັດເຊຍ ໄດ້ແລກປ່ຽນກ່ຽວກັບສະພາບການສອງປະເທດໃນໄລຍະມໍ່ໆມານີ້, ສະແດງຄວາມປິຕິຊົມຊື່ນຕໍ່ໝາກຜົນເຊິ່ງສອງຝ່າຍບັນລຸໄດ້, ພ້ອມທັງເນັ້ນໜັກວ່າ ສາຍພົວພັນສອງຝ່າຍຫວຽດນາມ-ສະຫະພັນລັດເຊຍ ມີບາດກ້າວພັດທະນາອັນດີງາມທີ່ສຸດໃນຫຼາຍຂົງເຂດ. ໃນໄລຍະຈະມາເຖິງ, ສອງຝ່າຍຈະສືບຕໍ່ມານະພະຍາຍາມມີມາດຕະການລະອຽດ ເພື່ອຊຸກຍູ້ການຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ພະລັງງານ, ນໍ້າມັນອາຍແກັສ, ເສດຖະກິດ, ການຄ້າ, ການສຶກສາ-ບໍາລຸງສ້າງ, ການທ່ອງທ່ຽວ, ການປ້ອງກັນ, ຕ້ານພະຍາດໂຄວິດ-19.
ແບ່ງປັນທັດສະນະລວມກ່ຽວກັບຄວາມຈໍາເປັນຕ້ອງການກໍ່ສ້າງສາຍພົວພັນສາກົນທີ່ປອດໃສ, ເຄົາລົບນັບຖືເຊິ່ງກັນ ແລະກັນ, ມິດຕະພາບ, ສະເໝີພາບ, ການຮ່ວມມືຕ່າງຝ່າຍຕ່າງມີຜົນປະໂຫຍດ, ແກ້ໄຂຄວາມບໍ່ລົງລອຍກັນຜ່ານການເຈລະຈາ ແລະບັນດາມາດຕະການສັນຕິພາບໃນສະພາບການສາກົນຄືປັດຈຸບັນ, ຫວຽດນາມ ແລະສະຫະພັນລັດເຊຍ ຈະສືບຕໍ່ສົມທົບກັນຢ່າງມີປະສິດທິຜົນກວ່າອີກທີ່ບັນດາເວທີປາໄສພາກພື້ນ ແລະສາກົນ, ເພື່ອສັນຕິພາບ, ສະຖຽນລະພາບ, ການພັດທະນາຢູ່ພາກພື້ນອາຊີ-ປາຊີຟິກ ແລະໃນໂລກ.
ໂດຍ: ທູຈາງ