ສາຍພົວພັນຫວຽດນາມ-ກໍາປູເຈຍ ນັບມື້ນັບໄດ້ຮັບການພັດທະນາ, ເຂົ້າສູ່ລວງເລິກ
ກປ.ອອນໄລ - ໂດຍໄດ້ຮັບຄໍາເຊີນຂອງຫ້ອງວ່າການສູນກາງພັກປະຊາຊົນກໍາປູເຈຍ (CPP), ທ່ານ ຫງວຽນວັນເນັນ, ເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກກອມມູນິດຫວຽດນາມ ໄດ້ໄປຢ້ຽມຢາມ ແລະເຮັດວຽກຢູ່ກໍາປູເຈຍ ໃນລະຫວ່າງວັນທີ 18-20 ສິງຫາ.
ວັນທີ 19 ສິງຫາ, ທີ່ນະຄອນຫຼວງພະນົມເປັນ, ທ່ານ Samdech Hun Sen ປະທານພັກ CPP, ນາຍົກລັດຖະມົນຕີກໍາປູເຈຍ; ທ່ານ Samdech Say Chhum ຮອງປະທານພັກ CPP, ປະທານສະພາສູງລາຊະອານາຈັກກໍາປູເຈຍ ໄດ້ໃຫ້ການຕ້ອນຮັບທ່ານ ຫງວຽນວັນເນັນ, ຫົວໜ້າຫ້ອງວ່າການສູນກາງພັກກອມມູນິດຫວຽດນາມ.
|
|
ທ່ານ Samdech Hun Sen ຕ້ອນຮັບທ່ານ ຫງວຽນວັນເນັນ. ພາບ: vov.vn. |
ທີ່ການຕ້ອນຮັບ, ທ່ານ ຫງວຽນວັນເນັນ ຢັ້ງຢືນວ່າ, ຫວຽດນາມ ຈະພ້ອມກັບກໍາປູເຈຍ ຮັກສາ ແລະພັດທະນາສາຍພົວພັນຖານບ້ານໃກ້ເຮືອນຄຽງອັນດີງາມ, ນໍ້າໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຄວາມໝັ້ນຄົງອັນຍາວນານລະຫວ່າງສອງປະເທດ, ເພື່ອການພັດທະນາວັດທະນາຖາວອນຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.
|
|
ທ່ານ Samdech Say Chhum ຕ້ອນຮັບທ່ານ ຫງວຽນວັນເນັນ. ພາບ: ສໍານັກຂ່າວສານຫວຽດນາມ. |
ທີ່ບັນດາການຕ້ອນຮັບ, ທ່ານ Samdech Hun Sen ແລະທ່ານ Samdech Say Chhum ລ້ວນແຕ່ເນັ້ນໜັກເຖິງຄວາມສໍາຄັນຂອງການພົວພັນລະຫວ່າງສອງພັກ ແລະການພົວພັນຮ່ວມມືລະຫວ່າງບັນດາແຂວງຕິດກັບຊາຍແດນ. ທ່ານ Samdech Hun Sen ແລະທ່ານ Samdech Say Chhum ໄດ້ສະແດງຄວາມຂອບໃຈຕໍ່ການສະໜັບສະໜູນ, ການຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະມີປະສິດທິຜົນ ເຊິ່ງຫວຽດນາມ ສະຫງວນໃຫ້ກໍາປູເຈຍ ໃນພາລະກິດປົດປ່ອຍປະເທດຊາດ, ກູ້ຊ່ວຍປະຊາຊົນກໍາປູເຈຍ ຫຼຸດພົ້ນອອກຈາກລະບອບດັບສູນເຊື້ອຊາດຂະແມແດງ ກໍ່ຄືໃນພາລະກິດສ້າງສາ ແລະປົກປັກຮັກສາປະເທດຊາດໃນປະຈຸບັນ.
ທ່ານ Samdech Hun Sen ແລະທ່ານ Samdech Say Chhum ສະເໜີວ່າ, ສອງຫ້ອງວ່າການສູນກາງຂອງສອງພັກສົມທົບກັນຢ່າງແໜ້ນແຟ້ນ, ເພີ່ມທະວີການຮ່ວມມື, ແລກປ່ຽນຂໍ້ມູນຂ່າວສານ, ແບ່ງປັນບົດຮຽນກ່ຽວກັບວຽກງານກໍ່ສ້າງພັກ; ຢັ້ງຢືນວ່າ ກໍາປູເຈຍ ຈະເຮັດຈົນສຸດຄວາມສາມາດຂອງຕົນ ເພື່ອພ້ອມກັບຫວຽດນາມ ຮັກສາ ແລະເພີ່ມພູນຄູນສ້າງສາຍພົວພັນຖານບ້ານໃກ້ເຮືອນຄຽງອັນດີງາມ, ນໍ້າໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຄວາມໝັ້ນຄົງອັນຍາວນານລະຫວ່າງກໍາປູເຈຍ-ຫວຽດນາມ ໃຫ້ນັບມື້ນັບພັດທະນາ, ນໍາມາເຊິ່ງຜົນປະໂຫຍດຢ່າງແທດຈິງໃຫ້ແກ່ປະຊາຊົນສອງປະເທດ.
ໂດຍ: ທະນາພອນ