ປະທານສະພາແຫ່ງຊາດຫວຽດນາມ ເຂົ້າຮ່ວມລາຍການສະແດງສິລະປະ “ຂົວຕໍ່ມິດຕະພາບ” ຢູ່ປັກກິ່ງ
ກປ.ອອນໄລ - ຕອນທ່ຽງວັນທີ 10 ກໍລະກົດ (ຕາມເວລາທ້ອງຖິ່ນ), ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ໄປຮອດນະຄອນຫຼວງປັກກິ່ງ, ສືບຕໍ່ການຢ້ຽມຢາມສາທາລະນະລັດ ປະຊາຊົນຈີນ ຢ່າງເປັນທາງການໃນລະຫວ່າງວັນທີ 8 – 12 ກໍລະກົດ ຕາມຄໍາເຊີນຂອງທ່ານ ລີ ຈ້ານຊູ, ກຳມະການປະຈໍາກົມການເມືອງສູນກາງພັກກອມມູນິດຈີນ, ປະທານຄະນະປະຈຳສະພາຜູ້ແທນປະຊາຊົນທົ່ວປະເທດ ຈີນ.
ຕອນຄໍ່າວັນດຽວກັນ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ແລະທ່ານ ລີ ຈ້ານຊູ ປະທານຄະນະປະຈຳສະພາຜູ້ແທນປະຊາຊົນທົ່ວປະເທດ ຈີນ ໄດ້ເຂົ້າຮ່ວມລາຍການສະແດງສິລະປະ “ຂົວຕໍ່ມິດຕະພາບ” ທີ່ນອນໃນບັນດາເຫດການ “ຊຸມວັນວັດທະນະທໍາຫວຽດນາມ ຢູ່ ຈີນ” ໂດຍກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ສົມທົບກັບກະຊວງການຕ່າງປະເທດຫວຽດນາມ ຈັດຕັ້ງ.
|
|
ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ແລະທ່ານ ລີ ຈ້ານຊູ ປະທານຄະນະປະຈຳສະພາຜູ້ແທນປະຊາຊົນທົ່ວປະເທດ ຈີນ ຢ້ຽມຊົມງານວາງສະແດງຮູບພາບກ່ຽວກັບປະເທດຊາດ, ຜູ້ຄົນ ແລະວັດທະນະທໍາຫວຽດນາມ. ພາບ: ສໍານັກຂ່າວສານຫວຽດນາມ. |
ບັນດາລາຍການສະແດງຂອງນັກສິລະປິນທີ່ມາຈາກໂຮງລະຄອນຟ້ອນລໍາທໍາເພງຫວຽດນາມ ໄດ້ສະແດງໃຫ້ເຫັນຮູບພາບຂອງປະເທດຫວຽດນາມ ທີ່ສວຍງາມ, ຮັກແຂກແພງຄົນດ້ວຍບັນດາຈຸດທີ່ເປັນເອກະລັກສະເພາະ, ຂະຫຍັນຂັນເຄື່ອນ ແລະກໍາລັງເຊື່ອມໂຍງເຂົ້າກັບສາກົນຢ່າງຕັ້ງໜ້າ...
ຕອນຄໍ່າຂອງວັນດຽວກັນ, ໃນຂອບເຂດ “ຊຸມວັນວັດທະນະທໍາຫວຽດນາມ ຢູ່ ຈີນ”, ທີ່ໂຮງລະຄອນຊົນເຜົ່າປັກກິ່ງ, ທ່ານນາງ ຫງວຽນທິກິມເງິນ ແລະທ່ານ ລີ ຈ້ານຊູ ໄດ້ໄປຢ້ຽມຊົມງານວາງສະແດງຮູບພາບກ່ຽວກັບປະເທດຊາດ, ຜູ້ຄົນ, ວັດທະນະທໍາຫວຽດນາມ ແລະບັນດາຜົນງານໃນການພັດທະນາເສດຖະກິດ-ສັງຄົມຂອງຫວຽດນາມ.
ກ່ອນໜ້ານັ້ນ, ຕອນບ່າຍວັນທີ 10 ກໍລະກົດ, ທ່ານນາງ ຫງວຽນທິກິມເງິນ ໄດ້ຕ້ອນຮັບການນໍາກຸ່ມບໍລິສັດກໍ່ສ້າງພະລັງງານຈີນ, ກຸ່ມບໍລິສັດອະສັງຫາລິມະຊັບ Alpha King, ກຸ່ມບໍລິສັດປະກັນໄພ ບິ່ງອານ, ກຸ່ມບໍລິສັດຮ່ວມມືເສດຖະກິດເຕັກນິກສາກົນ ຈ່ຽງຊີ...
ໂດຍ: ໄຊຊະນະ