REDP ຊ່ວຍເຫຼືອ ODA ໃຫ້ຫວຽດນາມ ດ້ວຍຈໍານວນເງິນກວ່າ 204 ລ້ານໂດລາສະຫະລັດ
ກປ.ອອນໄລ - ໂຄງການພັດທະນາພະລັງງານຜະລິດຄືນໃໝ່ (REDP) ຂອງທະນາຄານໂລກ (WB) ດ້ວຍແຫຼ່ງທຶນ ODA ອຸປະຖຳໃຫ້ຫວຽດນາມ ກວ່າ 204 ລ້ານໂດລາສະຫະລັດ, ໃນນັ້ນມີທຶນຊ່ວຍເຫຼືອລ້າແມ່ນເກືອບ 2,3 ລ້ານໂດລາສະຫະລັດ.
ດ້ວຍຄາດໝາຍແມ່ນພັດທະນາບັນດາແຫຼ່ງພະລັງງານຜະລິດຄືນໃໝ່ສະໜອງໃຫ້ເຄືອຂ່າຍໄຟຟ້າແຫ່ງຊາດບົນພື້ນຖານການຄ້າ, ຮັບປະກັນການພັດທະນາແບບຍືນຍົງ, REDP ໄດ້ໜູນຊ່ວຍບັນດາວິສາຫະກິດຫວຽດນາມ ໃນວຽກງານລົງທຶນກໍ່ສ້າງບັນດາໂຄງການພະລັງງານຜະລິດຄືນໃໝ່; ໜູນຊ່ວຍບັນດາອົງການຄຸ້ມຄອງລັດປັບປຸງກອບນະໂຍບາຍນິຕິກໍາກ່ຽວກັບພະລັງງານຜະລິດຄືນໃໝ່ໃຫ້ສົມບູບແບບ, ສຸມໃສ່ແກ້ໄຂຮົ້ວກີດຂວາງຈໍານວນໜຶ່ງສໍາລັບການລະດົມແຫຼ່ງທຶນການຄ້າໃນການພັດທະນາພະລັງງານຜະລິດຄືນໃໝ່.
|
|
ກອງປະຊຸມກ່ຽວກັບການໜູນຊ່ວຍພະລັງງານຜະລິດຄືນໃໝ່. ພາບ: ສໍານັກຂ່າວສານຫວຽດນາມ. |
ທີ່ກອງປະຊຸມດໍາເນີນໃນຕອນເຊົ້າວັນທີ 21 ມິຖຸນາ, ຢູ່ຮ່າໂນ້ຍ, ທ່ານ ຫງວຽນວັນແທ່ງ, ຮອງຫົວໜ້າກົມໄຟຟ້າ ແລະພະລັງງານຜະລິດຄືນໃໝ່ ໄດ້ຕີລາຄາສູງການໜູນຊ່ວຍຂອງທະນາຄານໂລກ (WB) ໃນວິວັດທະນາການພັດທະນາເສດຖະກິດ-ສັງຄົມຂອງຫວຽດນາມ. “ຫວຽດນາມ ແມ່ນພື້ນຖານເສດຖະກິດມີພົນລະເມືອງຫຼາຍ, ດ້ວຍຂອບຂະໜາດເສດຖະກິດໃນປັດຈຸບັນ ແລະລະດັບການເຕີບໂຕດ້ານເສດຖະກິດປະມານ 7%/ປີ, ຄວາມຕ້ອງການດ້ານພະລັງງານເວົ້າລວມ ແລະໄຟຟ້າເວົ້າສະເພາະຂອງຫວຽດນາມ ໃນໄລຍະຈະມາເຖິງແມ່ນຫຼາຍທີ່ສຸດ.
ທ່ານ ຫງວຽນວັນແທ່ງ ໃຫ້ຮູ້ວ່າໂຄງການ REDP ໂດຍ WB ແລະ SECO ອຸປະຖຳມີຄວາມໝາຍສໍາຄັນຕໍ່ປະຊາຄົມ, ການໜູນຊ່ວຍມີລັກສະນະຮອບດ້ານໃຫ້ແກ່ລັດຖະບານຫວຽດນາມ ກ່ຽວກັບນະໂຍບາຍພັດທະນາພະລັງງານຜະລິດຄືນໃໝ່ ແລະດຶງດູດບັນດາແຫຼ່ງກໍາລັງທາງສັງຄົມໃນການເຄື່່ອນໄຫວລົງທຶນພັດທະນາພະລັງງານຢູ່ຫວຽດນາມ.
ແປໂດຍ: ທູຈາງ