ທ່ານນາຍົກລັດຖະມົນຕີ ຫງວຽນຊວນຟຸກ ເຂົ້າຮ່ວມກອງປະຊຸມສຸດຍອດ G7 ເປີດກວ້າງ ຢູ່ການາດາ
ກປ.ອອນໄລ - ໂດຍໄດ້ຮັບຄໍາເຊີນຂອງທ່ານ Justin Trudeau ນາຍົກລັດຖະມົນຕີການາດາ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ນໍາໜ້າຄະນະຜູ້ແທນຂັ້ນສູງຫວຽດນາມ ເຂົ້າຮ່ວມກອງປະຊຸມສຸດຍອດ G7 ເປີດກວ້າງ ເຊິ່ງຈັດຕັ້ງໃນວັນທີ 9 ມິຖຸນາ ຢູ່ການາດາ.
ໃນບົດກ່າວປາໄສທີ່ກອງປະຊຸມສຸດຍອດ G7 ເປີດກວ້າງ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຍົກໃຫ້ເຫັນສານກ່ຽວກັບຄວາມສໍາຄັນຂອງການເພີ່ມທະວີການຮ່ວມມືກັບສາກົນໃນການຮັບມືກັບການປ່ຽນແປງຂອງດິນຟ້າອາກາດ; ຍົກອອກຂໍ້ລິເລີ່ມສ້າງຕັ້ງເວທີປາໄສຮ່ວມມືເປີດກວ້າງລະຫວ່າງບັນດາປະເທດ G7 ແລະບັນດາປະເທດແຄມທະເລກ່ຽວກັບການຮັບມືກັບການປ່ຽນແປງຂອງດິນຟ້າອາກາດ, ນໍ້າທະເລເພີ່ມຂຶ້ນສູງ ແລະປົກປັກຮັກສາສິ່ງແວດລ້ອມຊີວະພາບທາງທະເລເພື່ອເພີ່ມທະວີການຮ່ວມມື, ແບ່ງປັນບົດຮຽນ, ຖ່າຍທອດເຕັກໂນໂລຢີ ແລະລະດົມບັນດາແຫຼ່ງກໍາລັງໃຫ້ປັບຕົວຢ່າງເໝາະສົມ ແລະຮັບມືກັບການປ່ຽນແປງຂອງດິນຟ້າອາກາດ.
|
|
ທ່ານນາຍົກລັດຖະມົນຕີ ຫງວຽນຊວນຟຸກ ພ້ອມດ້ວຍບັນດາຫົວໜ້າຄະນະ G7 ແລະ G7 ເປີດກວ້າງ. ພາບ: ສໍານັກຂ່າວສານຫວຽດນາມ. |
ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ ຫວຽດນາມ ແມ່ນໜຶ່ງໃນບັນດາປະເທດຖືກຜົນສະທ້ອນໜັກໜ່ວງທີ່ສຸດຈາກການປ່ຽນແປງຂອງດິນຟ້າອາກາດ, ນໍ້າທະເລເພີ່ມຂຶ້ນສູງ, ພ້ອມກັນນັ້ນກໍ່ຖືກຜົນກະທົບຫຍໍ້ທໍ້ຈາກການຂຸດຄົ້ນ ແລະນໍາໃຊ້ແຫຼ່ງຊັບພະຍາກອນນໍ້າແມ່ນໍ້າຂອງແບບບໍ່ຍືນຍົງ. ທ່ານ ຫງວຽນຊວນຟຸກ ຢັ້ງຢືນຄໍາໝັ້ນສັນຍາຂອງ ຫວຽດນາມ ກ່ຽວກັບການປະຕິບັດຫຼຸດຜ່ອນອາຍພິດຕາມຂໍ້ຕົກລົງ COP 21; ສະເໜີບັນດາປະເທດ G7 ແລະສາກົນສືບຕໍ່ໜູນຊ່ວຍ ແລະເພີ່ມທະວີການຮ່ວມມືກັບ ຫວຽດນາມ ເພື່ອແນໃສ່ຍົກສູງກໍາລັງຄວາມສາມາດຕິດຕາມກວດກາ ແລະປັບຕົວໃຫ້ເໝາະສົມກັບການປ່ຽນແປງຂອງດິນຟ້າອາກາດ, ຕ້ານນໍ້າທະເລເພີ່່ມຂຶ້ນສູງ ແລະນໍ້າທະເລຊຶມເຂົ້ກໍ່ຄື ການຄຸ້ມຄອງ ແລະນໍາໃຊ້ແຫຼ່ງນໍ້າຢູ່ຍ່ານລຸ່ມແມ່ນໍ້າຂອງແບບຍືນຍົງ.
ທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າການພັດທະນາດ້ານເສດຖະກິດທະເລຢ່າງແຮງນັ້ນຕ້ອງໄປຄຽງຄູ່ ກັບການປົກປັກຮັກສາສິ່ງແວດລ້ອມ ແລະລະບົບນິເວດທາງທະເລ ແມ່ນການກໍານົດທິດຍຸດທະສາດພັດທະນາຂອງຫວຽດນາມ. ທ່ານນາຍົກລັດຖະມົນຕີ ຊົມເຊີຍຂໍ້ລິເລີ່ມຂອງ ການາດາ ກ່ຽວກັບການສະກັດກັ້ນການຖີ້ມຂີ້ເຫຍື້ອຢາງລົງໃສ່ມະຫາສະໝຸດ ແລະຢັ້ງຢືນວ່າ ຫວຽດນາມ ພ້ອມແລ້ວທີ່ຈະຮ່ວມມືກັບ ການາດາ ແລະສາກົນຜັນຂະຫຍາຍຂໍ້ລິເລີ່ມນີ້.
ທ່ານນາຍົກລັດຖະມົນຕີ ໄດ້ຍົກອອກຂໍ້ລິເລີ່ມ ເພື່ອໃຫ້ບັນດາປະເທດ G7 ຊຸກຍູ້ການສ້າງຕັ້ງກົນໄກຮ່ວມມືທົ່ວໂລກກ່ຽວກັບການຫຼຸດຜ່ອນສິ່ງເສດເຫຼືອຢາງ ເພື່ອມຸ່ງໄປເຖິງເປົ້າໝາຍບັນດາມະຫາສະໝຸດຂຽວໃສ ແລະສະອາດ, ປາສະຈາກສິ່ງເສດເຫຼືອຢາງ.
ແປໂດຍ: ກວຽດເຕີມ