ມອບຈຳນວນເງິນ 20 ຕື້ດົ່ງຈາກການຂາຍປະມູນໝາກບານ ແລະເສື້ອຂອງທີມຊາດ U23 ຫວຽດນາມ ໃຫ້ແກ່ເມືອງທຸກຍາກ
ກປ.ອອນໄລ - ຕອນເຊົ້າວັນທີ 11 ມີນາ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ເຂົ້າຮ່ວມພິທີມອບຈຳນວນເງິນ 20 ຕື້ດົ່ງທີ່ເກັບມາໄດ້ຜ່ານການຂາຍປະມູນໝາກບານ ແລະເສື້ອຂອງທີມຊາດ U23 ຫວຽດນາມ ໃຫ້ຜູ້ຕາງໜ້າ 20 ເມືອງທຸກຍາກທີ່ສຸດໃນທົ່ວປະເທດ.
ທີ່ພິທີ, ທ່ານນາຍົກລັດຖະມົນຕີ ຫງວຽນຊວນຟຸກ ຊົມເຊີຍກະຊວງແຮງງານ, ທະຫານເສຍອົງຄະ ແລະສັງຄົມ, ກະຊວງຖະແຫຼງຂ່າວ ແລະສື່ສານ, ສະຖານີໂທລະພາບຫວຽດນາມ ໄດ້ສົມທົບກັນຈັດຕັ້ງເຫດການທີ່ມີຄວາມໝາຍນີ້. ຕີລາຄາສູງບັນດາໝູ່ຄະນະ, ສ່ວນບຸກຄົນໃນທົ່ວປະເທດທີ່ໄດ້ຕັ້ງໜ້າຕອບສະໜອງການຂາຍປະມູນ.
|
|
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ມອບຈຳນວນເງິນ 20 ຕື້ດົ່ງທີ່ເກັບມາໄດ້ຜ່ານການຂາຍປະມູນໝາກບານ ແລະເສື້ອຂອງທີມຊາດ U23 ຫວຽດນາມ ໃຫ້ຜູ້ຕາງໜ້າ 20 ເມືອງທຸກຍາກ. ພາບ: ທູເຮືອງ. |
ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຮຽກຮ້ອງການນຳ 20 ເມືອງທຸກຍາກນຳໃຊ້ຈຳນວນເງິນນີ້ເພື່ອກໍ່ສ້າງເຮືອນ 500 ຫຼັງ (ແຕ່ລະຫຼັງມີມູນຄ່າ 40 ລ້ານດົ່ງ) ໃຫ້ແກ່ຜູ້ທີ່ມີຄຸນງາມຄວາມດີ, ຜູ້ທຸກຍາກທີ່ຍັງປະສົບກັບຄວາມຫຍຸ້ງຍາກ, ຮັບປະກັນຄວາມຍຸຕິທຳ, ໂປ່ງໃສ, ຖືກເປົ້າໝາຍ, ສະແດງໃຫ້ເຫັນຈຸດປະສົງມະນຸດສະທຳອັນດີງາມຂອງການຂາຍປະມູນນີ້.
ທ່ານນາຍົກລັດຖະມົນຕີ ຫງວຽນຊວນຟຸກ ປາດຖະໜາວ່າກະຊວງແຮງງານ, ທະຫານເສຍອົງຄະ ແລະສັງຄົມ, ບັນດາແຂວງ, ນະຄອນສັງກັດສູນກາງສືບຕໍ່ປຸກລະດົມທົ່ວສັງຄົມໃນການປະຕິບັດບັນດານະໂຍບາຍສໍາລັບບັນດາເປົ້າໝາຍຜູ້ທີ່ມີຄຸນງາມຄວາມດີຕໍ່ການປະຕິວັດ, ຜູ້ທຸກຍາກ-ປັດຈຸບັນກວມເອົາ 7% ຂອງຈຳນວນພົນລະເມືອງ ໃຫ້ເປັນຢ່າງດີ.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ໄດ້ຕີລາຄາສູງທີມຊາດ U23 ຫວຽດນາມ ພາຍໃຕ້ການນໍາພາຂອງຄູຝຶກ Park Hang Seo ໄດ້ແຂ່ງຂັນຈົນສຸດຄວາມສາມາດຂອງຕົນ, ບັນລຸໄດ້ຜົນງານດີເດັ່ນ, ນໍາມາເຊິ່ງຄວາມສະຫງ່າອົງອາດໃຫ້ແກ່ປະເທດຊາດ.
ແປໂດຍ: ເຈິ່ນຮວ່ຽນ