ຫວຽດນາມ ແລະອາເມລິກາ ລົງນາມໃນຂໍ້ຕົກລົງກຳຈັດມົນລະພິດດີໂອຊິນ ຢູ່ບຽນຮວ່າ
ກປ.ອອນໄລ - ຕອນບ່າຍວັນທີ 11 ພຶດສະພາ, ຢູ່ຮ່າໂນ້ຍ, ອົງການພັດທະນາສາກົນ ອາເມລິກາ (USAID) ແລະເຫຼົ່າທັບປ້ອງກັນອາກາດ-ທະຫານອາກາດ, ກະຊວງປ້ອງກັນປະເທດຫວຽດນາມ ໄດ້ຈັດຕັ້ງພິທີລົງນາມໃນຂໍ້ຕົກລົງຊ່ວຍເຫຼືອລ້າໃຫ້ໂຄງການກຳຈັດມົນລະພິດດີໂອຊິນ ຢູ່ເຂດສະໜາມບິນ ບຽນຮວ່າ.
ເຂົ້າຮ່ວມພິທີລົງນາມມີທ່ານພົນຕີ ເລຮຸຍວີ້ງ, ກໍາມະການສູນກາງພັກ, ຜູ້ບັນຊາການເຫຼົ່າທັບປ້ອງກັນອາກາດ-ທະຫານອາກາດ; ທ່ານ Michael Greene, ຜູ້ອຳນວຍການ USAID ປະຈຳ ຫວຽດນາມ; ພ້ອມກັບຜູ້ຕາງໜ້າບັນດາອົງການຂອງກະຊວງປ້ອງກັນປະເທດຫວຽດນາມ ແລະ USAID.
|
|
ທ່ານພົນຕີ ເລຮຸຍວີ້ງ ແລະທ່ານ Michael Greene ລົງນາມໃນຂໍ້ຕົກລົງ. ພາບ: ວັນຮ໋ຽວ. |
ເພື່ອກຳຈັດມົນລະພິດດີໂອຊິນ ຢູ່ບຽນຮວ່າ ຄາດຄະເນຄ່າໃຊ້ຈ່າຍແມ່ນ 390 ລ້ານໂດລາສະຫະລັດ ແລະວິວັດການກຳຈັດຈະສໍາເລັດໃນໄລຍະ 10 ປີ .
ບຽນຮວ່າ ແມ່ນຈຸດທີ່ມີມົນລະພິດດີໂອຊິນ ຕົກຄ້າງຫຼາຍທີ່ສຸດຢູ່ຫວຽດນາມ ແລະການກຳຈັດມົນລະພິດດີໂອຊິນ ສໍາເລັດຢູ່ເຂດນີ້ຈະປະກອບສ່ວນເຮັດໃຫ້ຫຼຸດຜ່ອນໄພອັນຕະລາຍທີ່ສົ່ງຜົນສະທ້ອນເຖິງສຸຂະພາບຂອງມະນຸດ.
ນັບແຕ່ປີ 2000 ເປັນຕົ້ນມາ, ອາເມລິກາ ຮ່ວມມືກັບຫວຽດນາມ ເພື່ອແກ້ໄຂບັນດາບັນຫາມະນຸດສະທຳ ແລະຜົນຮ້າຍຢ້ອນຫຼັງຈາກສົງຄາມ, ລວມມີ: ມ້າງທຳລາຍລະເບີດ, ໝາກມິນບໍ່ທັນແຕກທີ່ຍັງຕົກຄ້າງແຕ່ປາງສົງຄາມ, ລ້າງທາດພິດສີສົ້ມ/ດີໂອຊີນ.
ແປໂດຍ: ເຈິ່ນຮວ່ຽນ